ގައިގައިން ނާރާ ބަލިތަކުން ރައްކާތެރިވުމަށް ޞިއްޙީ އާދަތަކަށް ޅައިރުއްސުރެ އަހުލުވެރިވުން މުހިންމުކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ ދުނިޔޭގެ ހަކުރުބަލީގެ ދުވަހާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ. ދުނިޔޭގެ ހަކުރު ބަލީގެ ދުވަސް ކޮންމެ އަހަރަކުވެސް ފާހަގަކުރަނީ، މި ބައްޔާ ބެހޭގޮތުން ބައިނަލްއަޤްވާމީ ގޮތުން ހޭލުންތެރިކަން އިތުރުކުރުމުގެ މަޤްޞަދުގައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދުވަހާ ގުޅިގެން ކުރެއްވި ޕޯސްޓުގައި ވަނީ ހަކުރުބަލި ފަދަ ގައިގައިން ނާރާ ބަލިތަކުން ރައްކާތެރިވުމަށްޓަކައި، ރަނގަޅު ޞިއްޙީ އާދަތައް ގެންގުޅެން ޖެހޭކަން ފާހަގަކުރައްވާފައެވެ. އެގޮތުން، ޞިއްޙީ ރަނގަޅު އާދަތައް ޅައިރުއްސުރެ ދަސްކޮށް، އެކަންކަމަށް އަހުލުވެރިވުން މުހިންމުކަން އެމަނިކުފާނު ފާހަގަކުރެއްވިއެވެ. މީގެއިތުރުން، ދުވަހުގެ ތާވަލު ރާވާލުމުގައި ހަރަކާތްތެރިވުމަށާއި، ޞިއްޙަތަށް ސަމާލުވުމަށް ގޮވާލައްވައި، ހަށިގަނޑަށް ގެއްލުން ހުރި ކަންކަމާ ދުރުހެލިވުމަށްވެސް އެމަނިކުފާނު ވަނީ އިލްތިމާސްކުރައްވާފައެވެ.
މިކަންކަމަށް މުޖްތަމަޢު ހޭލުންތެރިކުރުމަށް އަމިއްލަ ޖަމާޢަތްތަކާއި ފަރުދުންގެ ފެންވަރުގައި ކުރައްވާ މަސައްކަތް ރައީސުލްޖުމްހޫރިއްޔާ ވަނީ ފާހަގަކުރައްވާ ޝުކުރު އަދާކުރައްވާފައެވެ. އެމަނިކުފާނު ވިދާޅުވީ ދިވެހިންނަކީ ބަލިތަކާއި ދުރު ދުޅަހެޔޮ ބަޔެއްގެ ގޮތުގައި ދެމިތިބެ، ޤައުމު ބިނާކޮށް ބާއްޖަވެރި ދިރިއުޅުމެއް ހޯދުމުގެ ޢަޒުމު، މިފަދަ ދުވަސްތަކުގައި އައު ކުރަން ޖެހޭ ކަމަށެވެ.
ރައްޔިތުންގެ ޞިއްޙީ ދުޅަހެޔޮކަން ކަށަވަރުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން، ބަލިތައް ޖެހުމުގެ ކުރިން ރައްކާތެރިވުމަށާއި، ރައްޔިތުންނަށް ބޭނުންވާ ޒަމާނީ ރަނގަޅު ފެންވަރުގެ ފަރުވާ ލިބޭނެ ނިޒާމެއް ޤާއިމްކުރުމަށް ސަރުކާރުން އިސްކަންދެއްވާކަން މީގެ ކުރިން ވަނީ ހާމަކުރައްވާފައެވެ. އަދި މުޖްތަމަޢުގެ ތެރޭގައި ހުރި ޞިއްޙީ ނުރަނގަޅު އާދަތަކުން ރައްޔިތުން ދުރުހެލި ކުރުމަށް ފިޔަވަޅުތައްވެސް ދަނީ އަޅަމުންނެވެ. ދުނިޔޭގެ ހަކުރުބަލީގެ ދުވަސް ކޮންމެ އަހަރެއްގެވެސް ނޮވެމްބަރު މަހުގެ 14 ވަނަ ދުވަހު ފާހަގަކުރާއިރު، މިއަހަރުގެ ޝިޢާރަކީ "ހަކުރު ބައްޔާއި ދުޅަހެޔޮކަން" އެވެ.