ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ވަނީ ނިމިދިޔަ ހަފްތާގައި ވެސް ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ހިންގާ ގިނަ މަޝްރޫއުތަކެއްގައި ހަރަކާތްތެރިވެފައެވެ. މިކަން އެ ކުންފުނިން ހާމަކުރީ މިދިޔަ ހަފްތާގެ މަސައްކަތްތަކާ ގުޅިގެން ”އެކްސް“ (ކުރީގެ ޓްވިޓަރ) ގައި ކުރި ޕޯސްޓެއްގައެވެ. އާރްޑީސީން ދަނީ ރާއްޖޭގެ އެކި ކަންކޮޅުތަކުގައި ތަރައްޤީގެ ގިނަ މަޝްރޫޢުތައް ކުރިއަށް ގެންދަމުންނެވެ.
އެގޮތުން، އާރްޑީސީން ވަނީ ޕީއެސްއައިޕީގެ ދަށުން ޅ. ނައިފަރުގައި ހިންގުމަށް ހަމަޖެހިފައިވާ މަޝްރޫއުތަކަށް ބޭނުންވާ ސާމާނު އެ ރަށަށް ފޮނުވުމުގެ މުހިންމު މަސައްކަތް ނިންމާލާފައެވެ. މިއީ މަޝްރޫޢުތައް ހަލުވިކަމާއެކު ކުރިއަށް ގެންދިއުމަށް އެޅުނު މުހިންމު ފިޔަވަޅެކެވެ.
މީގެއިތުރުން، އާރްޑީސީން ވަނީ ރާއްޖޭގެ އެކި ކަންކޮޅުތަކުގައި ހިންގާ ފުލުހުންގެ ޕޯސްޓުތަކާއި ސްޓޭޝަންތަކުގެ މަސައްކަތްތައް ވެސް ކުރިއަށް ގެންގޮސްފައެވެ. ޅ. ހިންނަވަރު ޕޮލިސް ސްޓޭޝަންގެ ފައުންޑޭޝަން އެޅުމުގެ މަސައްކަތުގެ ތެރެއިން ލީން އެޅުމުގެ މަސައްކަތް ވަނީ ނިންމާލާފައެވެ.
އަދި މެދު ރާއްޖެތެރޭގެ މަސައްކަތްތަކަށް ބަލާއިރު، އާރްޑީސީން ވަނީ އދ. ކުނބުރުދޫ ޕޮލިސް ޕޯސްޓުގެ މަސައްކަތުގެ ތެރެއިން ކޮލަމްސް ކާސްޓިންގެ މަސައްކަތް ވެސް ނިމިދިޔަ ހަފްތާގައި ކޮށްފައެވެ.
ދެކުނުގެ ސަރަހައްދުގައި ހިންގާ މަޝްރޫއުތަކަށް ބަލާއިރު، ލ. ހިތަދޫ ޕޮލިސް ޕޯސްޓުގެ މަސައްކަތް ވެސް ވަނީ ކުރިއަށް ގެންގޮސްފައެވެ. މިގޮތުން، އެ މަޝްރޫއުގެ ބޭސްމެންޓް ބެކް ފިލިންގ އަދި ކޮލަމް ހިކިންގ (ކިޔުރިންގ) ގެ މަސައްކަތްތައް ނިމިދިޔަ ހަފްތާގައި ވަނީ ކޮށްފައެވެ.
އާރްޑީސީން ހާމަކުރި މި ތަފްސީލުތަކުން ދައްކުވައިދެނީ، އެ ކުންފުނިން ޕީއެސްއައިޕީގެ ދަށުން ރަށްރަށުގެ ތަރައްޤީގެ މަޝްރޫއުތައް ހަލުވިކަމާއެކު ކުރިއަށް ގެންދިއުމަށް ދެމުންދާ އިސްކަމެވެ. މި މަސައްކަތްތައް ކުރިއަށް އޮތް ތަނުގައި ވެސް ހުއްޓުމެއްނެތި ކުރިއަށް ދާނެކަމަށް ބެލެވެއެވެ.\