ދިވެހިރާއްޖޭގެ މިނިވަންކަން ދިފާއުކުރުމަށްޓަކައި، ގައުމީ ދިފާއީ ބާރު (އެމްއެންޑީއެފް) ގެ ގާބިލުކަން ހުރިހާ ދާއިރާތަކުން އިތުރުކުރުމުގެ މަސައްކަތްތައް ސަރުކާރުން ފަށާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ސަރުކާރަށް ދެ އަހަރު ފުރުން ފާހަގަކުރުމަށް ސޯޝަލް ސެންޓަރުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ގައުމީ ދިފާއީ ބާރުގެ ގާބިލުކަން އިތުރުކުރުމަކީ ރާއްޖޭގެ މިނިވަންކަމުގެ ފަލަ ރަތް ރޮނގު ދިފާއުކުރުމަށް ކޮންމެހެން ކުރަންޖެހޭ މަސައްކަތެއް ކަމަށެވެ.
ރައީސް މުޢިއްޒު ފާހަގަކުރެއްވި ގޮތުގައި، މި މަސައްކަތުގެ ތެރެއިން ކޯސްޓު ގާޑުގެ ފުލީޓު ދެގުނަ ބޮޑުކުރުމާއި، މެރިން ކޯގެ ގާބިލުކަން އިތުރުކުރުން ވަނީ ފަށާފައެވެ. އަދި، އެއާ ކޯ އުފައްދައި ގާބިލުކަން އިތުރުކޮށް ވަސީލަތްތައް ހޯދައިދިނުމުގެ މަސައްކަތްތައް ކުރެވިފައިވާކަން އެމަނިކުފާނު ފާހަގަކުރެއްވިއެވެ. މިގޮތުން، އިހަށް ދުވަހު އެމްއެންޑީއެފްގެ އެއާ ސްޓޭޝަނެއް އައްޑޫގައި ހުޅުވިފައިވާކަމަށާއި، ކުރިއަށް އޮތް ތަނުގައި އިތުރު ސްޓޭޝަނެއް ރާއްޖޭގެ އެންމެ އުތުރުގައި ހުޅުވިގެންދާނެ ކަމުގައި ރައީސް ވިދާޅުވިއެވެ.
ރައީސް ވިދާޅުވީ، ރާއްޖޭގެ ކަނޑުގެ ސަރަހައްދާއި ވައިގެ ސަރަހައްދު ބެލެހެއްޓުމުގެ ކެޕޭސިޓީ ބޮޑުކުރުމަކީ ދިވެހި ހުރިހާ ރައްޔިތުންވެސް ބޭނުންވާނެ ގޮތް ކަމަށެވެ. “އަޅުގަނޑުމެންގެ މިލިޓަރީ ވަރުގަދަކުރުމަކީ އަޅުގަނޑުމެންގެ ޒިންމާއެއް. އަޅުގަނޑުމެންނަކީ ނިކަމެތި ބައެއްކަމަށް ދުށުމަކީ އަޅުގަނޑުމެންގެ ވިސްނުމުގައި ހުރެގެންވާނެ ކަމެއް ކަމުގައި އަޅުގަނޑު ގަބޫލުނުކުރަން،” ރައީސް ވިދާޅުވިއެވެ. ރާއްޖެއަކީ ސަރަހައްދުގެ ގޮތުން ބޮޑު ގައުމެއްކަމާއި ފަހުރުވެރި ތާރީހެއް އޮތް ގައުމެއްކަން އެމަނިކުފާނު ފާހަގަކުރެއްވިއެވެ.
އަދި، މިނިވަންކަން ހިމާޔަތްކުރުމާއި ސަރަހައްދު ބެލެހެއްޓުމަކީ ރާއްޖެއަށް އަންނަ އިންވެސްޓަރުންވެސް އެކަމަށް ރިއާޔަތްކުރާނެ ކަމެއް ކަމުގައިވާތީ، ދިފާއީ ގޮތުން ރާއްޖޭގެ ވިއުގަ ވަރުގަދަކުރުމަށް ސިފައިންގެ ގާބިލުކަން އިތުރުކުރުމާއެކު އެހެނިހެން ގައުމުތަކާއެކު މަސައްކަތްކުރައްވަމުންދާކަން ރައީސް މުޢިއްޒު ފާހަގަކުރެއްވިއެވެ.