ދުޅަހެޔޮ މުސްތަޤުބަލެއް ކަށަވަރުކުރުމަށްޓަކައި، ބޭނުން ކުރާ ބޭހަކީ އޭގެ އެންމެ ރަނގަޅު އަސަރުކުރާ ބޭސްކަން ޔަޤީން ކުރަން ޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން، މެޑަމް ސާޖިދާ މުހައްމަދު ވިދާޅުވެއްޖެއެވެ.
އެކަމަނާ މިހެން ވިދާޅުވީ ދުނިޔޭގެ އެންޓިމައިކްރޯބިއަލް ރެސިސްޓެންސް އެވެއަރނެސް ވީކްފާހަގަކުރުމާއި ގުޅޭގޮތުން މީސްމީޑިއާގައި ހިއްސާކުރެއްވި ޚާއްޞަ ޕޯސްޓެއްގައެވެ. މި ހަފުތާ ފާހަގަކުރެވެމުން އަންނަނީ ދުނިޔޭގެ އެކި ކަންކޮޅުތަކުގައި ބަލި ޖެހޭ އެކި ޖަރާސީމުތަކަށް ބޭހުގެ އަސަރުކުރާ މިންވަރު ކުޑަވާގޮތަށް ބޭސް ބޭނުން ކުރުމާއި މެދު ހޭލުންތެރިކަން އިތުރުކުރުމުގެ ގޮތުންނެވެ.
ރައީސުލްޖުމްހޫރިއްޔާގެ އަނބިކަނބަލުންގެ ޕޯސްޓުގައި ފާހަގަކުރައްވާފައިވާ ގޮތުގައި، އެންޓިމައިކްރޯބިއަލް ރެސިސްޓެންސަކީ (AMR) ޞިއްޙަތަށާއި ކާނާއަށް އަދި އިޤްތިޞާދަށްވެސް ކުރިމަތިވެފައިވާ ބޮޑު ނުރައްކަލެކެވެ. އެކަމަނާ ވަނީ މި ނުރައްކަލުން ރައްކާތެރިވުމަށްޓަކައި ދިވެހިރާއްޖެއިން ކުރިއަށް އޮތް 5 އަހަރަށް ތައްޔާރުކޮށް ތަންފީޒުކުރަމުންދާ ޤައުމީ އެންޓި މައިކްރޯބިއަލް ރެސިސްޓެންސް އެކްޝަން ޕްލޭންގެ ދެ އަމާޒުގެ މައްޗަށް އަލިއަޅުއްވާލައްވާފައެވެ.
މެޑަމް ސާޖިދާ ފާހަގަކުރެއްވި ދެ އަމާޒަކީ އެންޓިބައޮޓިކް ބޭސް ޒިންމާދާރު ކަމާއެކު ބޭނުން ކުރުމަށާއި، ވަން ހެލްތައް އެއްބާރުލުން ދިނުމެވެ. ވަން ހެލްތަކީ، އެންމެންނަށްވެސް އެންމެ ރަނގަޅު ޞިއްޙީ ނަތީޖާތަކެއް ހޯދުމަށްޓަކައި އިންސާނުންނާއި ޖަނަވާރުތަކާއި ތިމާވެށީގެ ޞިއްޙަތުގެ ގުޅުން ދެނެގަނެ އެއްބާރުލުން ދޭ އުސޫލެކެވެ.
އދ. ސިއްޙަތު ޖަމްޢިއްޔާ (WHO) އިން މިހަފުތާ ފާހަގަކުރުމުގެ އެންމެ ބޮޑު މަޤްޞަދަކީ، ޑޮކްޓަރުންގެ އިރުޝާދުގެ ދަށުން ބޭސް އެންމެ ރަނގަޅު ގޮތުގައި ބޭނުން ކުރުމަށް ބާރު އެޅުމާއި މިކަމާއި ގުޅޭގޮތުން އާންމުންގެ މެދުގައި ހޭލުންތެރިކަން އިތުރުކުރުމެވެ.