އަތޮޅު ކައުންސިލްތައް އުވާލުމަށްޓަކައި ގާނޫނު އަސާސީއަށް އިސްލާހު ގެނައުމުގެ ބިލެއް ރައްޔިތުންގެ މަޖިލީހުގެ ކޮމިޓީއަކުން މިއަދު ފާސްކޮށްފިއެވެ. މި ބިލަކީ ސަރުކާރުގެ ފަރާތުން މަޖިލީހަށް ހުށައަޅުއްވާފައިވާ ބިލެކެވެ. އެގޮތުން، ބިލް ހުށައެޅުއްވީ ޕީއެންސީގެ ބާރަށު ދާއިރާގެ މެންބަރު އިބްރާހިމް ޝުޖާއު އެވެ.
މި ބިލް ދިރާސާކުރި މަޖިލީހުގެ ކޮމިޓީގެ މިއަދުގެ ބައްދަލުވުމުގައި ބިލް ފާސްކޮށްފައިވަނީ ކޮމިޓީއަށް ހާޒިރުވެވަޑައިގެން ތިއްބެވި 62 މެންބަރުންގެ ތެރެއިން 52 މެންބަރުންގެ ވޯޓާއެކުގައެވެ. ނަމަވެސް، އިދިކޮޅު އެމްޑީޕީގެ 10 މެންބަރުން ވަނީ ބިލް ފާސްނުކުރުމަށް ވޯޓު ދެއްވާފައެވެ. މި ބިލް މިހާރު ވަނީ މަޖިލީހުގެ ތަޅުމަށް ފޮނުވާފައެވެ.
ބިލުގައި ހިމެނޭ މައިގަނޑު އިސްލާހަކީ ކުރިއަށް އޮތް ކައުންސިލް އިންތިހާބުން ފެށިގެން އަތޮޅު ކައުންސިލުތައް އިންތިހާބުކުރަން ނުޖެހޭ ގޮތަށް ހެދުމެވެ. މިކަމަށްޓަކައި ގާނޫނުއަސާސީގެ 231 ވަނަ މާއްދާގެ (ހ)ގެ ތިން ވަނަ ނަންބަރު އުނިކުރުމަށް ވަނީ ހުށަހަޅާފައެވެ. މި މާއްދާގައި ބުނެފައިވަނީ އިދާރީ ދާއިރާތައް ހިންގުމަށްޓަކައި އުފައްދާ ކައުންސިލްތަކުގައި އަތޮޅު ކައުންސިލް ވެސް ހިމެނޭ ކަމަށާއި، އަތޮޅު ކައުންސިލްގެ ރައީސްއާއެކު އެ ކައުންސިލުގައި ދެން ހިމެނެނީ އެ އަތޮޅެއްގެ ރަށު ކައުންސިލުތަކުގެ ރައީސުން ކަމަށެވެ.
ގާނޫނު އަސާސީގެ އެ އަކުރު އުނިކުރުމާއެކު އަތޮޅު ކައުންސިލުތައް އުވިގެންދާނެއެވެ. ނަމަވެސް، އިސްލާހުގައިވާ ގޮތުން މިހާރު އިންތިހާބުކޮށްފައިވާ އަތޮޅު ކައުންސިލުތައް އެ ކައުންސިލުތަކުގެ ދައުރު ހަމަވަންދެން ދެމިތިބޭނެއެވެ. މިއީ ރާއްޖޭގެ އިދާރީ ދާއިރާތައް ހިންގުމުގެ ނިޒާމަށް އަންނަ މުހިންމު ބަދަލެކެވެ.