މާލެ ސަރަހައްދުގައި ޕާކިންގ ބިލްޑިންތައް އެޅުމުގެ މަސައްކަތް ކުރިއަށް އޮތް މަހެއްހާ ދުވަހުގެ ތެރޭގައި ކޮންޓްރެކްޓަރުންނާ ޙަވާލުކުރެވޭނެ ކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ. މާލޭގެ ޕާކިންގއާއި ވެހިކަލް މައްސަލަ ޙައްލުކުރުމަށް ސަރުކާރުން ޚާއްސަ އިސްކަމެއް ދެއްވާ ކަމަށް ވަޒީރު މިހެން ވިދާޅުވީ ދައުލަތުގެ މީޑިއާގެ “ހަފުތާ 104” ޕްރޮގްރާމްގައި ވާހަކަފުޅުދައްކަވަމުންނެވެ.
ވަޒީރު ވިދާޅުވީ، ޕާކިންގ ބިލްޑިންތައް އެޅުމަކީ ވަރަށް ބޮޑެތި ބިންތަކެއް ބޭނުންވާ އަދި ބޮޑެތި ޚަރަދުތަކެއް ހިނގާ މަސައްކަތެއް ކަމަށެވެ. މި ބޮޑު މަޝްރޫޢުގެ ދަށުން މާލެ ސަރަޙައްދުގައި ޖުމްލަ 7500 އެއްހާ އުޅަނދު ޕާކު ކުރެވޭނެ ޖާގައިގެ ޕާކިންގ ބިލްޑިންގތަކެއް އެޅުމަށް ސަރުކާރުން ވަނީ ނިންމާފައެވެ. މި މަސައްކަތުގެ ތެރޭގައި ޖުމްލަ 15 އިމާރާތް ހިމެނޭއިރު، އެ މަސައްކަތް ކުރިއަށް ގެންދިއުމަށް އެޗްޑީސީއާއެކު އެއްބަސްވުމެއްވެސް ވަނީ ޤާއިމުކުރެވިފައެވެ.
ޕާކިންގ ބިލްޑިންގެ މަސައްކަތުގެ ޢަމަލީ ފެށުމާ ގުޅޭގޮތުން ވާހަކަ ދައްކަވަމުން ވަޒީރު އަމީން ވިދާޅުވިއެވެ. “މިހާރު މިއޮތީ، މަސައްކަތް ކޮންޓްރެކްޓަރުންނާ ހަވާލުކުރުމުގެ މަރުހަލާގައި. 1 މަސް ތެރޭ ކޮންޓްރެކްޓަރުންނާ ޙަވާލުކުރާނެ. އަދި 3-4 މަސް ތެރޭގައި ޢަމަލީ މަސައްކަތްތައް ފެށޭނެ.”
މި ޕާކިންގ ބިލްޑިންތަކުގެ ތެރޭގައި ވިޔަފާރި އުސޫލުން ދޫކުރާ ޕާކިންގ ސްލޮޓްތަކާއި، އާއްމު ޚިދުމަތްތަކަށް ބޭނުންކުރާ ވެހިކަލްތަކަށް ޚާއްސަ ސްލޮޓްތައްވެސް ހިމެނޭނެ ކަމަށް ވަޒީރު ހާމަކުރެއްވިއެވެ. މީގެ އިތުރުން ސަރުކާރުން ވަނީ މާލޭގައި ވެހިކަލް ތޮއްޖެހުމުގެ މައްސަލައާއި ޤަވާއިދާ ޚިލާފަށް ވެހިކަލް ގެންގުޅޭ މައްސަލައަށް ޙައްލު ހޯދުމަށް ފުރުޞަތެއްވެސް ދީފައެވެ.
އެގޮތުން، ރަޖިސްޓްރީ ނުކޮށް ވެހިކަލް ބެހެއްޓުމާއި، ނުބައި ނަންބަރު ޕްލޭޓް ބޭނުން ކުރުމާއި، ޒޯން ބަދަލު ކޮށްގެން ވެހިކަލް ގެންގުޅޭ މައްސަލައިގައި، ޤަވާއިދާ އެއްގޮތަށް ބަދަލު ކުރުމުގެ ފުރުޞަތު ސަރުކާރުން ވަނީ ދީފައެވެ. މިއަހަރުގެ މާރޗް މަހުން ފެށިގެން ދީފައިވާ އެއް އަހަރުގެ މުއްދަތު ހަމަވުމުން އެ އުޅަނދުތައް ޤާނޫނުގައިވާ ގޮތުގެ މަތިން ނައްތާލާނެ ކަމަށް ވަޒީރު ވިދާޅުވިއެވެ. މިހާތަނަށް މި ދެ އަހަރުގެ ތެރޭގައި 704 އުޅަނދު ނައްތާލާފައިވާކަންވެސް ވަޒީރުގެ ވާހަކަފުޅުގައި ފާހަގަކުރެއްވިއެވެ.