ސަރުކާރުން އަންނަ އަހަރަށް ލަފާކޮށް ހުށަހެޅުއްވި 64.2 ބިލިޔަން ރުފިޔާގެ ދައުލަތުގެ ބަޖެޓު، އެއްވެސް އުނިއިތުރެއް ނުގެނެސް ރައްޔިތުންގެ މަޖިލީހުން ފާސްކޮށްފިއެވެ.
މިއީ ޖުމްލަ 64,202,565,720 ރުފިޔާގެ ބަޖެޓެކެވެ. މި ބަޖެޓު ފާސްކޮށްފައިވަނީ ބަޖެޓު ދިރާސާކުރާ ކޮމިޓީން ފާސްކުރި ގޮތަށް، 74 މެންބަރުންގެ އަޣުލަބިއްޔަތުންނެވެ. ބަޖެޓާ ދެކޮޅަށް ވޯޓު ދެއްވީ 12 މެންބަރުންނެވެ.
އަންނަ އަހަރަށް ލަފާކޮށްފައިވާ މި ބަޖެޓުން 40.3 ބިލިޔަން ރުފިޔާގެ އާމްދަނީއެއް ލިބޭނެ ކަމަށް ލަފާކޮށްފައިވާއިރު، ބަޖެޓު 9 ބިލިޔަން ރުފިޔާއިން ޑެފިސިޓް ވާނެ ކަމަށް ވަނީ ލަފާކޮށެވެ. ބަޖެޓުގައި ޚަރަދުގެ ގޮތުގައި ލަފާކޮށްފައިވަނީ ޖުމްލަ 49.2 ބިލިޔަން ރުފިޔާއެވެ. މީގެ ތެރޭގައި ރިކަރަންޓް ޚަރަދުގެ ގޮތުގައި 39.9 ބިލިޔަން ރުފިޔާ އާއި ކެޕިޓަލް ޚަރަދުގެ ގޮތުގައި 9.3 ބިލިޔަން ރުފިޔާ ހިމެނެއެވެ. އަދި ޕީއެސްއައިޕީ މަޝްރޫއުތަކަށް އަންނަ އަހަރު 8 ބިލިޔަން ރުފިޔާ ޚަރަދުވާނެ ކަމަށް ލަފާކޮށްފައިވެއެވެ.
ބަޖެޓުގެ ބޮޑު ނިސްބަތެއް ސުކޫކާއި ބޮންޑު އަނބުރާ ދެއްކުމަށް ވަނީ ޚާއްސަކޮށްފައެވެ. މިކަމަށް އެކަނި 9.3 ބިލިޔަން ރުފިޔާ ހިމަނާފައިވާއިރު، މި ޚަރަދުތައް ކެނޑުމަށްފަހު އަންނަ އަހަރުގެ ބަޖެޓަކީ 55 ބިލިޔަން ރުފިޔާ ކަމަށް ސަރުކާރުން ވިދާޅުވެއެވެ.
ބަޖެޓު ދިރާސާކުރުމުގެ މަރުހަލާގައި، ބަޖެޓު ދިރާސާކުރާ ކޮމިޓީން ވަނީ މާލީ ވުޒާރާއާއި އެކި އިދާރާތަކާ މަޝްވަރާކޮށްފައެވެ. ކޮމިޓީން ބަޖެޓަށް ގެނައި އިސްލާހުތަކުގެ ތެރޭގައި، މަޖިލީހުގެ އިދާރާގެ ބަޖެޓުގެ ގޮތުގައި 3.5 މިލިޔަން ރުފިޔާ ޚާއްސަ ބަޖެޓުގެ ތެރެއިން އިތުރުކުރުމަށް ވަނީ ފާސްކޮށްފައެވެ. އަދި ދައުލަތުގެ އޮފީސްތަކަށް ދިމާވެފައިވާ ޖާގައިގެ ދަތިކަމަށް ހައްލެއް ހޯދައި، ކުއްޔަށް ކުރާ ޚަރަދު ކުޑަކުރުމަށްޓަކައި ސަރުކާރުގެ އިތުރު އޮފީސް އިމާރާތެއް އެޅުމުގެ މަސައްކަތް އަވަސްކުރުމަށްވެސް ވަނީ ފާސްކޮށްފައެވެ.
ކޮމިޓީ މަރުހަލާގައި މިނިވަން މުއައްސަސާތަކުން ހުށަހެޅި ކަންކަމަށް ރިއާޔަތްކޮށް، މާލީ ވުޒާރާއިން ވަނީ އެކަންކަން ހައްލުކުރެވޭނެ ގޮތްތައް ހުށަހަޅުއްވާފައެވެ. އެގޮތުން، އެއްވެސް މުއައްސަސާއެއްގެ ޤާނޫނީ ޒިންމާ އަދާކުރަން ދަތިވެއްޖެނަމަ، ކޮންމެހެން ބޭނުންވާ ފައިސާ މުޅި ބަޖެޓުގެ ތެރެއިން ޖާގަހޯދައިގެން ހަމަޖައްސައިދެއްވާނެ ކަމުގެ ޔަގީންކަން އެ ވުޒާރާއިން ވަނީ މަޖިލީހަށް ދެއްވާފައެވެ. މެންބަރުންގެ ބަހުސްތަކަށްފަހު، މި ބަޖެޓު ފާސްކުރީ ކޮމިޓީން ހުށަހެޅި ގޮތަށް ބަޖެޓުގެ ޖުމްލަ އަދަދަށް ބަދަލެއް ނާންނަ ގޮތަށެވެ.