މައްޗަންގޮޅީގައި ހުންނަ އަރަބިއްޔާގެ ކުރީގެ އިމާރާތް ތަޅައިލުމަށްފަހު އެތަނުގައި ޕާކިންއާއެކު ކޮމިއުނިޓީ ޕާކެއް ތަރައްގީކުރައްވަން ވިސްނަވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެ އެވެ. އެމަނިކުފާނު މިކަން ހާމަކުރެއްވީ މާލޭގެ ތަރައްގީއާ ގުޅޭގޮތުން މާލޭގެ އަވަށްތަކުގެ ރައްޔިތުންގެ ހިޔާލު ހޯއްދެވުމަށް ކުރިއަށްގެންދަވާ ސިލްސިލާ ބައްދަލުވުމުގެ ތެރެއިން މައްޗަންގޮޅި ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
މާލޭގެ ތޮއްޖެހުމުގެ މައްސަލައަށް ހައްލު ހޯދުމަށް ސަރުކާރުން މަސައްކަތްކުރައްވާނެކަމުގެ ޔަގީންކަން ރައީސް ވަނީ މައްޗަންގޮޅީ ރައްޔިތުންނަށް ދެއްވާފައެވެ. މީގެ އިތުރުން މަގުތައް ވީރާނާވެފައި ހުރުން ފަދަ އެ އަވަށަށް ކުރިމަތިވެފައިވާ ގިނަ މައްސަލަތަކެއް ހައްލުކުރުމަށް ސަރުކާރުގެ ވުޒާރާތަކުން މަސައްކަތްކުރާނެ ކަމަށް އެމަނިކުފާނު ފާހަގަކުރެއްވިއެވެ.
އަރަބިއްޔާ ސުކޫލުގެ ކުރީގެ އިމާރާތް ތަޅައިލުމުގެ މަސައްކަތް ފެށުމަށް ޕަބްލިކް ވޯކްސްއިން މިހާރު ތައްޔާރުވެފައިވާކަން ފާހަގަކުރައްވައި، ރައީސް ވަނީ އެތަނާމެދު އަމަލުކުރަންވީ ގޮތެއް ކަނޑައެޅުމުގައި ރައްޔިތުންގެ ހިޔާލު އެމަނިކުފާނާ ހިއްސާކުރުމަށް އެދިވަޑައިގެންފައެވެ. އެމަނިކުފާނު ވިދާޅުވީ ރައްޔިތުންގެ ހިޔާލަށް އިސްކަންދެއްވައިގެން އެންމެ އެކަށީގެންވާ ގޮތެއް ކަނޑައަޅުއްވާނެ ކަމަށެވެ.
މިވަގުތަށް ސަރުކާރުގެ ވިސްނުން ހުރި ގޮތް ހާމަކުރައްވަމުން ރައީސް ވިދާޅުވީ، 11،000 އަކަފޫޓުގެ އެ ގޯތީގެ ބޮޑު ސަރަހައްދެއް ޕާކިންއަށް ބޭނުންކުރެވޭ ގޮތަށް ތައްޔާރުކުރުމާއެކު، ރޭޒް ލެވެލްއެއްގައި ފެހި ޖާގައެއްގެ ގޮތުގައި ޕާކެއް ތަރައްގީކުރަން ސަރުކާރުން ވިސްނާ ކަމަށެވެ. މިއީ މާލޭގެ ތޮއްޖެހުން ކުޑަކުރުމަށްޓަކައި ޕާކިންގެ ޖާގަ އިތުރުކުރުމަށް ސަރުކާރުން ކުރައްވާ މަސައްކަތްތަކުގެ ތެރެއިން ކުރިއަށްގެންދަވާނެ މަޝްރޫޢެކެވެ.
ރައީސުލްޖުމްހޫރިއްޔާ ވިދާޅުވީ އެ މަސައްކަތް ހަލުއިކޮށް ކުރިއަށްގެންދަވައި ރަމަޟާން މަހުގެ ކުރިން ނިންމަވައިލެއްވުމަށް ބޭނުންފުޅުވާ ކަމަށެވެ. ނަމަވެސް، ސަރުކާރުގެ މިހާރުގެ ވިސްނުމަށްވުރެ ބޮޑުކޮށް މަޝްރޫއު ހިންގާނަމަ އެއަށްވުރެ ގިނަ ވަގުތު އެ މަޝްރޫއު ހިންގުމަށް ނަގާނެ ކަމަށް އެމަނިކުފާނު ފާހަގަކުރެއްވިއެވެ.