މާލޭގެ ބޮޑުތަކުރުފާނު މަގު ތަރައްޤީ ކުރުމުގެ މަޝްރޫޢުގެ ދަށުން، އިއްޒުއްދީން ފާލަމުން ފެށިގެން އެމްޕީއެލް ސަރަޙައްދާ ހަމައަށް މަގުގެ މަސައްކަތް ރޯދަ މަސް އައުމުގެ ކުރިން ނިންމާލުމަށް މަސައްކަތް ކުރަމުންދާ ކަމަށް އެމްޓީސީސީގެ މެނޭޖިންގ ޑިރެކްޓަރ އަޙްމަދު ސައުދީ ވިދާޅުވެއްޖެއެވެ. މި މަސައްކަތުގެ މައިގަނޑު މަޤްޞަދަކީ އެ ސަރަހައްދުގައި ދިމާވާ ދަތިކަން ކުޑަކޮށް، ދަތުރުފަތުރުގެ ފަސޭހަކަން އިތުރުކުރުމެވެ.
ސައުދީ މިހެން ވިދާޅުވެފައިވަނީ، ސަރުކާރުގެ ދެއަހަރު ފުރުން ފާހަގަކުރުމަށް ޕީއެސްއެމް ނިއުސްއިން ހުށަހަޅާދިން ‘ހަފުތާ 104’ ޕްރޮގްރާމުގައި ވާހަކަ ދައްކަވަމުންނެވެ. އެމްޓީސީސީއިން އަންނަނީ މާލޭގެ ބޭރު ހުރަސް މަގު (ބޮޑުތަކުރުފާނު މަގު) ޒަމާނީ ފެންވަރަށް ތަރައްޤީކޮށް، ހަލުވިކުރުމުގެ މަޝްރޫޢެއް ކުރިއަށް ގެންދަމުންނެވެ.
ބޮޑުތަކުރުފާނު މަގުގެ އިއްޒުއްދީން ފާލަމުން ފެށިގެން އެމްޕީއެލް ސަރަޙައްދަށް މަސައްކަތް ކުރިއަށް ގެންދިއުމުގައި ދިމާވާ ދަތިތަކަށް އަލިއަޅުވާލައްވައި، ސައުދީ ވިދާޅުވީ، ކާރުބާރު ބޮޑު މި ސަރަޙައްދުގައި ވިޔަފާރިވެރިންގެ އެއްބާރުލުން ވަރަށް މުހިންމު ކަމަށެވެ. އެގޮތުން، ވިޔަފާރިވެރިންގެ އެއްބާރުލުން ލިބިގެންނުވާ މި މަސައްކަތް ކުރުމަކީ އުނދަގޫ ކަމެއްކަން ފާހަގަކުރެއްވިއެވެ. "މި ސެގްމެންޓުގަ މަސައްކަތްކުރަމުން މިދަނީ މާލޭގެ ވަރަށް ކާރުބާރު ބޮޑު ޚާއްސަކޮށް ވިޔަފާރިވެރިންގެ ދަތި އުނދަގޫތަކެއް ހުންނަ ސަރަޙައްދެއްގަ. އެބޭފުޅުންގެ އެއްބާރުލުމާއި އެހީތެރިކަމާއެކު މި މަސައްކަތް ނިންމާލެވިއްޖެނަމަ ފަހުން ފަސޭހަވާނެ." ސައުދީ ވިދާޅުވިއެވެ.
ބޮޑުތަކުރުފާނު މަގު ތަރައްޤީ ކުރުމުގެ މި މަޝްރޫޢަކީ ޖުމްލަ ފަސް ސެގްމެންޓަކަށް ބަހާލެވިފައިވާ، 830 މީޓަރުގެ މަގު ސަރަޙައްދެކެވެ. މި މަގު ހަތަރު މިނިވަން ލޭނަށް ބަދަލުކުރެވުމުން، ދުއްވާ ފަރާތްތަކަށާއި ފިކުރު ކޮށްލުމަށް ހިނގާބިނގާވާ ފަރާތްތަކަށް ވެސް ބޮޑެތި ފަސޭހަތަކެއް ލިބިގެންދާނެ ކަމަށް ލަފާކުރެވެއެވެ.