ލާމަރުކަޒީ ނިޒާމުގެ ދަށުން ކައުންސިލަރުންގެ އަދަދު މަދުކުރުމަށްޓަކައި ސަރުކާރުން ގާނޫނުއަސާސީއަށް ހުށަހެޅި އިސްލާހުތައް ރައްޔިތުންގެ މަޖިލީހުގެ ވަގުތީ ކޮމިޓީއިން ދިރާސާކުރުމަށްފަހު ފާސްކޮށްފިއެވެ. މި ބިލުގެ ކޮމިޓީ ރިޕޯޓު މަޖިލީހުގެ މިއަދުގެ ޖަލްސާއަށް ވަނީ ހުށަހަޅާފައެވެ. މި ބިލު ސަރުކާރުގެ ފަރާތުން މަޖިލިހަށް ހުށަހެޅުއްވީ ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހުއެވެ.
ކައުންސިލަރުންގެ އަދަދު މަދުކުރުމަށް ހުށަހެޅި އިސްލާހުގައިވާ ގޮތުން، 2,000 މީހުންނަށް ވުރެ ކުޑަ އާބާދީއެއް އޮންނަ ރަށްރަށުގައި ތިން ކައުންސިލަރުންނާއި، 2,000 އަށް ވުރެ ބޮޑު އާބާދީއެއްގައި ފަސް ކައުންސިލަރުން ތިބޭނެއެވެ. އަދި ތިން ކައުންސިލަރުން ތިބޭ ކައުންސިލްތަކުގެ އެއް ގޮނޑި އަދި ފަސް ކައުންސިލަރުން ތިބޭ ކައުންސިލްތަކުގެ ދެ ގޮނޑި އަންހެނުންނަށް ހާއްސަކުރަން ޖެހޭނެއެވެ.
ސިޓީ ކައުންސިލްތަކުގެ މެންބަރުންގެ އަދަދު ކަނޑައެޅުމުގައި އާބާދީއަށް ބަލައި ހާއްސަ އުސޫލުތަކެއް ހިމަނާފައިވެއެވެ. އެގޮތުން، 10,000 އާއި 25,000 ދެމެދުގެ އާބާދީގެ ސިޓީތަކަށް މޭޔަރާއެކު ޖުމްލަ 7 ކައުންސިލަރުންނާއި، 25,000 އާއި 50,000 އާ ދެމެދުގެ ސިޓީތަކަށް 11 ކައުންސިލަރުންނާއި، 50,000 އަށްވުރެ އިތުރު ސިޓީތަކަށް 15 ކައުންސިލަރުން އިންތިހާބުކުރުމަށް ހުށަހަޅާފައިވެއެވެ.
މާލެ ސިޓީގެ ކައުންސިލަރުންގެ އަދަދު ކަނޑައަޅާފައިވަނީ ރައްޔިތުންގެ މަޖިލީހުގައި އެ ސިޓީތަކުން މެންބަރުން އިންތިހާބުކުރާ އަދަދަށެވެ. އަދި ފުވައްމުލަކު ސިޓީގެ ކޮންމެ އަވަށަކުން ކައުންސިލަރަކު އިންތިހާބުކުރެވޭނެކަމަށް ބިލުގައި ބަޔާންކޮށްފައިވެއެވެ.
ސިޓީ ކައުންސިލްތަކުގައި އަންހެނުންނަށް ހާއްސަ ގޮނޑިތައް ހިމަނާފައިވާއިރު، މި ގޮނޑިތައް ކަނޑައަޅާނީ ހުރިހާ ދާއިރާއެއް ހަމަހަމަވާ ގޮތަށް ދައުރުވާނެ އުސޫލެއްގެ ދަށުން އިލެކްޝަންސް ކޮމިޝަނުންނެވެ. މިއީ ލާމަރުކަޒީ ނިޒާމުގެ ތެރެއިން އަންހެނުންގެ ބައިވެރިވުން އިތުރުކުރުމަށް އެޅޭނެ މުހިންމު ފިޔަވަޅެކެވެ.
ލާމަރުކަޒީ ގާނޫނަށް ގެނެވޭ އިސްލާހުތަކުގެ ތެރޭގައި ލޯކަލް ގަވަމަންޓް އޮތޯރިޓީ (އެލްޖީއޭ) އަށް އިތުރު ބާރުތަކެއް ދިނުމަށް ހާއްސަ މާއްދާތަކެއް ވެސް ހިމަނާފައިވެއެވެ. މި ބަދަލުތަކުގެ ދަށުން، ކޮންމެ އިދާރީ ދާއިރާއެއްގައި އެލްޖީއޭގެ އޮފީސްތައް ހިންގުމުގެ ބާރު އެ އިދާރާއަށް ލިބިގެންދާނެއެވެ.