ގައުމެއްގައި ފާހިސް އަމަލުތައް ފެތުރި އެކަންކަން އާދަވެއްޖެނަމަ، އެތަނަކަށް ﷲ ގެ ކޯފާފޮނުއްވުމުގެ ސަބަބަކަށް އެކަން ވާނެ ކަމަށް މިއަދުގެ ހުތުބާގައި ބުނެފިއެވެ.
މިއަދުގެ ހުކުރު ނަމާދުގެ ހުތުބާގައި، މުޖުތަމަޢުގައި ފާހިސް އަމަލުތައް ފެތުރުން ހުއްޓުވުމުގެ މުހިންމުކަމާއި، އެކަމުން ދުރުހެލިވުމަށް އިސްލާމްދީން ވަރަށް ބޮޑަށް ބާރުއަޅާކަން ފާހަގަކޮށްފައިވެއެވެ. ޚާއްސަކޮށް ފާހިސްކަން ފެތުރުމުގައި މީޑިއާގެ ވަސީލަތްތަކުން އަދާކުރާ ނޭދެވޭ ދައުރާއި، އެފަރާތްތަކުގެ ޒިންމާތަކުގެ މައްޗަށް ހުތުބާގައި ވަރަށް ތަފްސީލީގޮތެއްގައި އަލިއަޅުވާލާފައިވެއެވެ.
ހުތުބާގައި ފެށުމުގައި މުސްލިމުންނަށް ތަޤުވާވެރިވުމަށް ވަޞިއްޔަތްކުރައްވަމުން، ﷲ ތަޢާލާ ވަޙީކުރައްވާފައިވާ ބަސްފުޅެއްގެ މާނައިގައިވެއެވެ. “އަދި (ކުރިމަތިވާނެ) ދުވަހަކަށް ތިޔަބައިމީހުން ބިރުވެތިވާށެވެ! (އެދުވަހަކީ) ތިޔަބައިމީހުން ﷲ ގެ ހަޟްރަތަށް ރުޖޫޢަކުރައްވާނެ ދުވަހެވެ. ދެން ކޮންމެ ނަފްސަކަށްމެ އެނަފްސެއް ކުޅަ ކަންތަކުގެ ޖަޒާ ފުރިހަމައަށް ދެއްވާނެތެވެ. އަދި އެއުރެންނަކަށް ބޭއިންސާފެއް ނުކުރައްވާނެތެވެ.”
ހުތުބާގައި ބުނެފައިވާ ގޮތުގައި، ﷲ ތަޢާލާ ވަނީ އަޅުގަނޑުމެންނަށް ފާހިސް އަމަލުތަކުން ދުރުހެލިވުމަށް އަމުރުކުރައްވާފައެވެ. އަދި އެކަންކަމާ ކައިރިނުވުމަށްވެސް ވަނީ އަންގަވާފައެވެ. ﷲ ގެ ވަޙީބަސްފުޅެއްގެ މާނައިގައިވެއެވެ. “އަދި ފާހިޝްކަންކަމާ ތިޔަބައިމީހުން ކައިރިނުވާށެވެ! އެއީ އޭގެތެރެއިން ފާޅުވެގެންވާ ކަންތަކަށްވިޔަސް، ނުވަތަ ވަންހަނާވެގެންވާ ކަންތަކަށްވިޔަސް މެއެވެ.” މުސްލިމު މުޖުތަމަޢަށް އަޚްލާޤީ، އިޖުތިމާޢީ، އިޤްތިޞާދީ، ސިޔާސީ އަދި ޢިލްމީ ގޮތުން ހަލަބޮލިކަން ގެނެސްދޭ ކޮންމެ ކަމެއްވެސް ހިމެނެނީ ފާހިސް އަމަލުތަކުގެ ތެރޭގައެވެ. އިސްލާމްދީން ވަނީ ފާހިސް އަމަލުތަކުން ދުރުހެލިވުމަށް ހުރިހާ ގޮތަކުންވެސް މަސައްކަތްކޮށް، އެފަދަ ކަންކަން ހުއްދަނޫންކަން ސާފުކޮށް ބަޔާންކޮށްފައެވެ.
ހުތުބާގައި އިތުރަށް ބުނެފައިވާ ގޮތުގައި، އިސްލާމްދީން ހަރާމްކުރައްވާފައިވަނީ ފާހިސް އަމަލުތަކާއި އެފަދަ އަމަލުތައް ފެތުރުން އެކަންޏެއް ނޫނެވެ. އެކަމަކު އެކަންކަމަށް މަގުފަހިކުރާ ހުރިހާ ކަމެއްވެސް ވަނީ ހަރާމްކުރައްވާފައެވެ. މިސާލަކަށް ޒިނޭގެ ނުބައިކަން ބަޔާންކުރުމުގެ ކުރިން، ޒިނޭއަށް މަގުފަހިކުރާ ހަރާމް ނަޒަރުތަކުން ދުރުހެލިވުމަށް ވަނީ އަންގަވާފައެވެ. ﷲ ގެ ވަޙީބަސްފުޅެއްގެ މާނައިގައިވެއެވެ. “މުއުމިނު ފިރިހެނުންނަށް ކަލޭގެފާނު ވިދާޅުވާށެވެ! އެއުރެންގެ ބައެއް ނަޒަރުތައް ތިރިކުރާހުށިކަމެވެ! އަދި އެއުރެންގެ ފަރުޖުތައް ރައްކާތެރިކުރާހުށިކަމެވެ!” ހަމަ އެފަދައިން މުއުމިނު އަންހެނުންނަށްވެސް އެބައިމީހުންގެ ޒީނަތްތެރިކަން މަހްރަމް ނޫން ފިރިހެނުންނަށް ފާޅުނުކުރުމަށް ވަނީ އަންގަވާފައެވެ. އަދި ރަސޫލާ ޞައްލަﷲ ޢަލައިހި ވަސައްލަމަގެ ހަދީސް ބަސްފުޅެއްގެ މާނައިގައިވެއެވެ. “ފިރިހެނަކު މަހްރަމެއް ނެތި އަންހެނަކާ އެކަނި ނުވާހުށިކަމެވެ.”
ހުތުބާގައި ބުނެފައިވާ ގޮތުގައި، ފާހިސް އަމަލުތައް ކުރުމުގެ އިތުރުން، އެއަމަލުތައް މުސްލިމުންގެ ތެރޭގައި ފެތުރުވުމަށް ލޯބިކުރާ ފަރާތްތަކަށްވެސް ދުނިޔެއާއި އާޚިރަތުގައި ގަދަފަދަ ޢަޛާބެއްވާކަން ﷲ ތަޢާލާ ވަނީ އަންގަވާފައެވެ. ﷲ ގެ ވަޙީބަސްފުޅެއްގެ މާނައިގައިވެއެވެ. “ހަމަކަށަވަރުން، މުއުމިނުވި މީހުންގެ ތެރޭގައި ފާހިޝްކަންތައް ފެތުރުމަށް ލޯބިކުރާ މީހުންނަށް ދުނިޔެއާއި އާޚިރަތުގައި ވޭންދެނިވި ޢަޛާބު ހުއްޓެވެ. ﷲ ދެނެވޮޑިގެންވެއެވެ. ތިޔަބައިމީހުންނަކަށް ނުދެނެހުއްޓެވެ.”
މީގެއިތުރުން ހުތުބާގައި ބުނެފައިވަނީ، ގައުމެއްގައި ފާހިސް އަމަލުތައް ފެތުރި އެކަންކަން އާދަވެއްޖެނަމަ، އެތަނަކަށް ﷲ ގެ ކޯފާފޮނުއްވުމުގެ ސަބަބަކަށް އެކަން ވާނެކަމަށް ރަސޫލާ ޞައްލަﷲ ޢަލައިހި ވަސައްލަމަގެ ހަދީސް ބަސްފުޅެއްގެ މާނައިގައިވެއެވެ. “ގައުމެއްގައި ފާހިސްކަން ފެތުރި އެކަމުގެ ވާހަކަ އާންމުކޮށްދައްކަން ފަށައިފިނަމަ، އެބައިމީހުންގެ ކާބަފައިންނަށް ނޭނގޭ ވަބާތަކާއި ބަލިމަޑުކަމުން އެބައިމީހުން ވަށާލެވޭނެއެވެ.” މިފަދަ ވަބާތައް ފެތުރެނީ އެބައިމީހުންގެ ފާހިސް އަމަލުތަކުގެ ނަތީޖާގެ ރަހަ ދެއްކެވުމަށެވެ.
ހުތުބާގައި ވަރަށް ބޮޑަށް ބާރުއަޅާފައިވާ އެއްކަމަކީ މިއަދު ފާހިސް އަމަލުތައް ފެތުރުމުގައި މީޑިއާގެ ވަސީލަތްތަކުން އަދާކުރާ ނުރައްކާތެރި ދައުރެވެ. ނޫސް، ޓީވީ، ރޭޑިއޯ، އަދި އެކި ސޯޝަލް މީޑިއާ ޕްލެޓްފޯމްތައް މެދުވެރިކޮށް ދުވާލާއި ރޭގަނޑު ލަދެއް ހަޔާތެއް ނެތި، ކުޑަކުދިންނާއި ޒުވާނުންނާއި ހުރިހާ އުމުރުފުރައެއްގެ މީހުންނަށް އެނގުމެއްނެތި ނުރައްކާތެރި ގެއްލުންތަކާއި ހަލާކުތައް ކުރިމަތިވެދާނެކަމުގެ އެއްވެސް ވިސްނުމެއް ނެތި، އެއްވެސް ޝަރީޢަތް ނޫން ގޮތަކަށް އެކި ވާހަކަތަކާއި އަޑުތަކާއި ވީޑިއޯތައް ފަތުރަމުންދާ ކަމަށް ހުތުބާގައި ފާހަގަކޮށްފައިވެއެވެ.
މި ޕްލެޓްފޯމްތައް ހިންގާ ފަރާތްތަކާއި، އާދައިގެ ފަރުދުންވެސް، އެބައިމީހުން ކުރާ ކަންތައްތައް ﷲ ތަޢާލާ ބައްލަވައިވޮޑިގެންވާކަން ހަނދާން ނައްތާލައިގެންތޯއެވެ؟ އަދި ޤިޔާމަތް ދުވަހުން ﷲ ތަޢާލާ މިކަންކަމާ މެދު ސުވާލުކުރައްވާނެކަން ނޭނގިތޯއެވެ؟ ނޫސް، ޓީވީ، ރޭޑިއޯ އަދި އެކި ސޯޝަލް މީޑިއާ ޕްލެޓްފޯމްތަކުގެ މަސްއޫލުވެރިންނާއި އެޑިޓަރުން މިކަމަށް ވަރަށް ބޮޑަށް ސަމާލުކަންދީ، ފާހިސް އަމަލުތަކަށް މަގުފަހިކުރާ ކަންތައްތައް ފެތުރުން ހުއްޓާލުމަށް ހުތުބާގައި ގޮވާލާފައިވެއެވެ. އަދި އެތަންތަނުގައި މަސައްކަތްކުރާ މުވައްޒަފުންނަށް، މީޑިއާގެ ވަސީލަތްތައް ޝަރީޢަތުގެ ހަމަތަކުގެ ތެރެއިން ބޭނުންކުރުމަށް އިރުޝާދުދީ ނަސޭހަތްތެރިވުމަށް ހުތުބާގައި ބާރުއަޅާފައިވެއެވެ.
ރަސޫލާ ޞައްލަﷲ ޢަލައިހި ވަސައްލަމަގެ ހަދީސް ބަސްފުޅެއްގެ މާނައިގައިވެއެވެ. “ﷲ ތަޢާލާ ބަޔެއްގެ މަސްއޫލިއްޔަތު ހަވާލުކުރެއްވި އަޅަކު، އެމަސްއޫލިއްޔަތު އަދާކުރުމުގައި ނަސޭހަތްތެރިނުވެ ފަރުވާކުޑަކޮށްފިނަމަ، އެމީހަކަށް ސުވަރުގޭގެ ވަސްވެސް ނުދުވާނެއެވެ.”
ހުތުބާ ނިންމާލާފައިވަނީ، އެހެން ހުރިހާ ހުތުބާތަކެކޭ އެއްފަދައިން މިއުންމަތުގެ ނަބިއްޔާއަށް ސޮލަވާތް ކިޔެވުމަށް ހަނދާންކޮޮށްދިނުމާއެކު ކިޔެވި ސޮލަވާތުންނެވެ.