މާލޭގެ ހެންވޭރުގައި ހުންނަ ހޮޓެލް އަލް-ޒައިކާގެ ބަދިގޭގައި ރޯވި އަލިފާނުގެ ހާދިސާއެއްގައި، އެމްއެންޑީއެފް ފަޔަރ އެންޑް ރެސްކިޔު ސަރވިސް، މާލެ ފަޔަރ ސްޓޭޝަނުގެ ފަޔަރ ފައިޓަރުން ވަނީ އަލިފާން ނިއްވާލާފައެވެ. މި ހާދިސާގައި އެއްވެސް މީހަކަށް އަނިޔާއެއް ވެފައި ނުވާކަމަށް އެމްއެންޑީއެފުން ވިދާޅުވެއެވެ.
އެމްއެންޑީއެފްއިން ދެއްވި މައުލޫމާތު ދިނުވީ މި ހާދިސާގެ ރިޕޯޓް އެމްއެންޑީއެފް ފަޔަރ އެންޑް ރެސްކިޔު ސަރވިސް، މާލޭ ފަޔަރ ސްޓޭޝަނަށް ލިބިފައިވަނީ މިއަދު މެންދުރު 12:44 ހާއިރު ކަމަށެވެ. ރިޕޯޓު ލިބުމާއެކު، އެ ފަޔަރ ސްޓޭޝަނުގެ ފަޔަރ ފައިޓަރުން ވަނީ އަވަހަށް އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައެވެ.
ފަޔަރ ފައިޓަރުން ކުރި ހަލުވި މަސައްކަތުން، ހޮޓަލުގެ ބަދިގޭގައި ރޯވި އަލިފާން ނިއްވާލެވުނީ މެންދުރު 13:00 ހާއިރު ކަމަށް އެމްއެންޑީއެފުން ވިދާޅުވިއެވެ.
އަލިފާން ރޯވި ސަބަބު އަދި މިހާތަނަށް ސާފެއް ނުވެއެވެ.