ތޫފާން ދިތުވާގެ ސަބަބުން ސްރީލަންކާއަށް ލިބުނު ގެއްލުންތަކަށް އެހީވުމަށް ކުރިއަށް ގެންދާ ޓެލެތޯން، “ސިލޯނާ އެކު ދިވެހީން” އަށް އަތޮޅުތަކުން އެހީ ހޯދުމަށް ކައުންސިލްތަކާއި ގުޅިގެން މަސައްކަތް ކުރަމުންދާ ކަމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާއިބެހޭ ވުޒާރާއިން ވަނީ ހާމަކުރައްވާފައެވެ. މި މަސައްކަތުގެ އިތުރުން ވުޒާރާގެ ތެރެއިންވެސް އެހީ ހޯދުމަށް މަސައްކަތް ކުރަމުންދާކަން އެ ވުޒާރާއިން ފާހަގަކުރެއްވިއެވެ.
މި ޓެލެތޯނަށް ރާއްޖޭގެ އެކި ކަންކޮޅުތަކުން އެހީ ހޯދުމަށް ކައުންސިލްތަކާއި ގުޅިގެން މަސައްކަތް ކުރަމުންދާއިރު، މި މަސައްކަތުގައި ވުޒާރާގެ ދައުރަކީ ކައުންސިލްތަކަށް ފުރިހަމަ މައުލޫމާތު ފޯރުކޮށްދިނުން ކަމަށް އެ ވުޒާރާއިން ވިދާޅުވިއެވެ. މި މަސައްކަތް ކުރިއަށްދާ ގޮތުގެ ތަފްސީލު ހިއްސާކުރައްވަމުން ސްޓޭޓް މިނިސްޓަރ މުޙައްމަދު އިބްރާހިމް ވިދާޅުވީ، އެ ވުޒާރާގެ ދަށުން ރާއްޖޭގެ 7 ސަރަހައްދެއްގައި ހިންގާ ޕަބްލިކް ވޯކްސް ޔުނިޓްތަކުގެ މުވައްޒަފުންނާއި، މާލެއާއި އަތޮޅުތަކުގައި މަސައްކަތްކުރާ މުވައްޒަފުން އަދި ބިދޭސީ މުވައްޒަފުންގެ އެއްބާރުލުމާއެކު އެހީ ފޯރުކޮށްދިނުމަށް މަސައްކަތް ކުރަމުންދާ ކަމަށެވެ.
ކައުންސިލްތަކާއި ގުޅިގެން މަސައްކަތް ކުރުމަށް އެ ވުޒާރާއިން ވަނީ 7 ކްލަސްޓަރއަކަށް ބަހާލާފައެވެ. ކޮންމެ އަތޮޅެއްގައިވެސް އަތޮޅުގެ ކަންކަން އިންތިޒާމު ކުރުމަށް ވެރިއަކު ހުންނަވާނެ ކަމަށް ސްޓޭޓް މިނިސްޓަރ ވިދާޅުވިއެވެ. މި ފަރާތްތައް މެދުވެރިކޮށް ކައުންސިލްތަކާއިއެކު ރައްޔިތުން ހޭލުންތެރި ކުރުމުގެ މަސައްކަތްތަކެއް ކުރަމުންދާ ކަމަށްވެސް އެ ވުޒާރާއިން ހާމަކުރެއްވިއެވެ.
ސްޓޭޓް މިނިސްޓަރ މުޙައްމަދު އިބްރާހިމް ވިދާޅުވީ، ދިވެހިރާއްޖެއަށް ދަތި ހާލަތެއް ދިމާވިއިރު އަވަށްޓެރި ޤައުމުތަކުން ވަރަށް ދީލަތި އެހީތެރިކަން ލިބުނު ކަމަށާއި، އެފަދަ ޤައުމަކަށް އެހީ ބޭނުންވާ ހިނދު މިއަދު އެހީދީ ޢާންމު ހާލަތައް އާދެވޭނެ ގޮތަށް މަސައްކަތް ކުރަންޖެހޭ ކަމަށެވެ. މާލޭގައި ކުރާ މަސައްކަތާއި އެއްގޮތަށް ރާއްޖޭގެ ކަންކޮޅުތަކުން ތަރުޙީބު ލިބިގެން ރަނގަޅު އެއްޗެއް ދެވޭނެ ކަމަށް އުއްމީދު ކުރައްވާ ކަމަށްވެސް އޭނާ ވިދާޅުވިއެވެ.
ވުޒާރާގެ ޕާމަނެންޓް ސެކެރެޓަރީ މޫމިނާ ވަޙީދު ވިދާޅުވީ، އެ ވުޒާރާއިން އެއްކުރަމުން ދަނީ ހަމައެކަނި އެ ވުޒާރާގެ އެހީތައް ކަމަށެވެ. އަދި ކައުންސިލްތަކަށް މައުލޫމާތު ފޯރުކޮށްދީ، މިކަމުގެ މުހިންމުކަން އަންގައިދިނުމުން ކައުންސިލްތަކުން ދޭ އެހީތައް އެ ކައުންސިލަކުން އަމިއްލައަށް ވަކިން ދޭނެ ކަމަށް އޭނާ ވިދާޅުވިއެވެ. މައުލޫމާތު ދެވޭއިރު އިސްކަންދެނީ އެތަނުގެ ހާލަތު ބަޔާންކޮށްދިނުމާއި، އެހީވުމުގެ ޕްރޮސެސް އިން ގޮތް ހިއްސާ ކޮށްދިނުމަށް ކަމަށްވެސް މޫމިނާ ވިދާޅުވިއެވެ.
އެ ވުޒާރާއިން ވިދާޅުވީ، އެ އިދާރާގެ މުވައްޒަފުންގެ ފަރާތުން މި ޓެލެތޯނަށް ދޭ އެހީ މިރޭގެ ވަގުތެއްގައި ފޯރުކޮށްދެވޭނެ ކަމަށާއި، ކައުންސިލްތަކާޢި ގުޅިގެން ކުރާ މަސައްކަތުން ރަނގަޅު އަދަދެއް ފޯރުކޮށްދެވޭނެ ކަމުގެ އުއްމީދު އޮތް ކަމަށެވެ. މި ޓެލެތޯނަށް ސިޓީތަކާއި ޢާންމު މަސައްކަތްތަކާއި ބެހޭ ވުޒާރާގެ އިތުރުންވެސް ދައުލަތުގެ އެކި ވުޒާރާތަކާއި، ކުންފުނިތަކާއި އަދި އަމިއްލަ ކުންފުނިތަކުންވެސް ދަނީ އެހީތެރިކަން ފޯރުކޮށްދެމުންނެވެ.