ދިވެއްސަކާއި ބިދޭސީއަކު ގުޅިގެން ރާއްޖެއަށް ބިދޭސީ އަންހެނުން ގެނެސް، ފައިސާއަށް ހަށިވިއްކުވައި، މަސްތުވާތަކެތި ގެންގުޅޭ ކަމަށް ލިބުނު މައުލޫމާތަކާ ގުޅިގެން ހުޅުމާލޭގައި ފުލުހުން ހިންގި އޮޕަރޭޝަނެއްގައި ދިވެހި ފިރިހެނަކާއި އުޒްބަކިސްތާނުގެ ހަތަރު އަންހެނުން ހައްޔަރުކޮށްފިއެވެ. މި މައްސަލައަކީ ހަށި ވިއްކުމާއި، މަސްތުވާތަކެތި ބޭނުންކުރުމުގެ އިތުރުން މާލީ ކުށްތަކެއްގެ ތުހުމަތު ކުރެވޭ މައްސަލައެކެވެ.
ފުލުހުންގެ މައުލޫމާތު ދޭ ގޮތުގައި މި އޮޕަރޭޝަން ހިންގާފައިވަނީ 2025 ނޮވެމްބަރު 29 ވަނަ ދުވަހުގެރޭ 21:49 އެހާކަންހާއިރުއެވެ. ހައްޔަރުކުރެވުނު ފަސް މީހުންނަކީ ކޯޓު އަމުރެއްގެ ދަށުން ހުޅުމާލެ ފޭސް 2 ގެ ހިޔާ 12 ވަނަ ޓަވަރުގެ އެޕާޓްމަންޓެއް ބަލައިފާސްކޮށް ކުށުގެ ވެށިން ހައްޔަރުކުރެވުނު ބައެކެވެ. ހައްޔަރުކުރެވުނު ދިވެހި ފިރިހެނަކީ ރ. ރަސްގެތީމު / ކިއުބާ، ޙުސައިން ސޮލާހު (40އ) އެވެ. އޭނާގެ އިތުރުން ހައްޔަރުކުރެވުނު އުޒްބެކިސްތާނުގެ ހަތަރު އަންހެނުންނަކީ:
- ޒަރީމާ ގުލަމޮވެނާ ޑެޖުރައެވާ (40އ)
- ޑިލްޑޯރާ އެގަމްނަޒޮވާރާ (31އ)
- ޝަހުޒޮޑަޚޮން ރުސްތަމޯވާ (28އ)
- އުމިޑަބޮނޫ ނެމަޓޯވާ (34އ)
މި މައްސަލައިގައި އިސްކޮށް ހަރަކާތްތެރިވާކަމަށް ތުހުމަތުކުރެވޭ ދެ މީހުންނަކީ ޙުސައިން ސޮލާހު އާއި ޒަރީމާ ގުލަމޮވެނާ ޑެޖުރައެވާ އެވެ. ފުލުހުން މި އެޕާޓްމަންޓް ބަލައިފާސްކުރިއިރު، 19،100 އަށްވުރެ ގިނަ އެމެރިކާ ޑޮލަރާއި 18،000ރ އަށްވުރެ ގިނަ ފައިސާ ފެނިފައިވެއެވެ.
ހައްޔަރުކުރެވުނު މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމަށްފަހު ވަނީ ބަންދުގެ މުއްދަތު ޖަހާފައެވެ. ޙުސައިން ސޮލާހު އާއި ޒަރީމާ ގުލަމޮވެނާ ޑެޖުރައެވާ އަށް 10 ދުވަހުގެ މުއްދަތެއް ދީފައިވާއިރު، އަނެއް ތިން އަންހެނުންނަށް 5 ދުވަހުގެ މުއްދަތެއް ވަނީ ދީފައެވެ. މި މައްސަލަ އިތުރަށް ތަހުގީގުކުރުމުގެ މަސައްކަތް ފުލުހުން ދަނީ ކުރަމުންނެވެ.