ދުނިޔޭގެ އެއިޑްސް ދުވަހާ ގުޅިގެން ވިލުންތެރިކަމާއި އީޖާދީ ހޯދުންތަކާއެކު އެއިޑްސްގެ ނުރައްކަލާ ދެކޮޅަށް ގުޅިގެން މަސައްކަތްކުރުމަށް، ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ގޮވާލައްވައިފިއެވެ. ފަސްޓް ލޭޑީ މިކަން ފާހަގަކުރެއްވީ ދުނިޔޭގެ އެއިޑްސް ދުވަސް ފާހަގަކުރަމުންދާ ދަނޑިވަޅުގައި މީސްމީޑިޔާގައި ޙިއްސާކުރެއްވި ޚާއްސަ ޕޯސްޓެއްގައެވެ.
ރައީސްގެ އަނބިކަނބަލުން ވިދާޅުވީ އެއިޑްސް ބަލީގެ ރިސްކުތަކާ ދެކޮޅަށް މަސައްކަތްކުރުމުގައި ވިލުންތެރިކަމާއި އީޖާދީ ހޯދުންތައް މުހިންމު ކަމަށެވެ. އަދި އެއިޑްސް ބަލިން ރައްކާތެރިވުމަށް ރާއްޖޭގެ އެކި ކަންކޮޅުތައް ހޭލުންތެރިކޮށް، މިބައްޔާ ދެކޮޅަށް ރައްޔިތުން ބާރުވެރިކުރެވޭނީ ގުޅިގެން ކުރާ މަސައްކަތުންކަން ފަސްޓް ލޭޑީ ފާހަގަކުރެއްވިއެވެ. މީގެ އިތުރުން އެއިޑްސް ބައްޔަށް ހޭލުންތެރިވެ، ކޮންމެ ރައްޔިތަކަށްވެސް ފަރުވާދެވޭކަން ކަށަވަރުކުރެވޭ މާޙައުލެއް ޤާއިމުކުރުމަށް ގުޅިގެން މަސައްކަތްކުރުމަށް އެކަމަނާ ވަނީ ގޮވާލައްވާފައެވެ.
ފަސްޓް ލޭޑީ ވިދާޅުވީ ހުރިހާ އެންމެންގެ ވެސް ބައިވެރިވުމާއެކު އދ.ން ކަނޑައަޅާފައިވާ ލަނޑުދަނޑިއާ އެއްގޮތަށް 2030 ވަނަ އަހަރުގެ ނިޔަލަށް ދުނިޔެއިން އެއިޑްސް ބަލި ނައްތާލެވިދާނެ ކަމަށެވެ. މި ލަނޑުދަނޑި ހާސިލުކުރުމަށް ކޮންމެ ފަރުދެއްގެ ބައިވެރިވުން ވެސް މުހިންމު ކަމުގައި އެކަމަނާ ފާހަގަކުރެއްވިއެވެ.
ދުނިޔޭގެ ގިނަ ބަޔަކަށް މަރު ބަލީގެ ގޮތުގައި ޤަބޫލުކުރެވިފައިވާ އެއިޑްސް ބަލީގެ ދުވަސް ފާހަގަކުރަނީ ކޮންމެ އަހަރެއްގެ ޑިސެންބަރު މަހުގެ ފުރަތަމަ ދުވަހުއެވެ. މި ދުވަހުގެ މަޤްސަދަކީ މި ބަލީގެ ނުރައްކަލާއި ބަލި ޖެހިފައިވާ މީހުންނަށް ބޭނުންވާ ކަންކަމާ ގުޅޭގޮތުން އާންމުން ހޭލުންތެރިކުރުވުމެވެ.
އެއިޑްސް ބަލި ޖެހޭ މައިގަނޑު ގޮތްތަކުގެ ތެރޭގައި ރައްކާތެރި ނޫންގޮތުގައި ޖިންސީ ގުޅުން ހިންގުމާއި، ސިރިންޖު ނުވަތަ ކަށިފަދަ ތަކެތި ބޭނުންކޮށްގެން މަސްތުވާތަކެތި ހަށިގަނޑަށް އިންޖެކްޓްކުރުން ހިމެނެއެވެ. އަދި ތަޣައްޔަރުވެފައިވާ ލޭ އެޅުމުގެ ތެރެއިންނާއި، ބަލި ޖެހިފައިވާ މައިން ގާތުން ތުއްތު ދަރިފުޅަށް ދިނުމުގެ ތެރެއިން ވެސް މިބަލި ފެތުރޭ މަގުފަހިވެއެވެ. މިބަލިން ރައްކާތެރިވުމަށް ހޭލުންތެރިކަން އިތުރުކުރުމަކީ ކޮންމެހެން ކުރަންޖެހޭ ކަމެކެވެ.