ސްރީ ލަންކާއަށް އެހީވުމަށް ރާއްޖޭގެ މީޑިއާތަކާއި ޕީއެސްއެމް އިސްނަގައިގެން ބޭއްވި ޓެލެތޯންއަށް މިހާތަނަށް 11 މިލިޔަން ދިވެހި ރުފިޔާ އާއި 43000 އަށްވުރެ ގިނަ ޑޮލަރު ލިބިފައިވާކަމަށް އެންމެ ފަހުގެ ވަގުތީ ނަތީޖާތަކުން ދައްކައިފިއެވެ.
މި ޓެލެތޯންގެ ހުރިހާ މަސައްކަތްތަކެއް ކުރިއަށް ގެންދާނީ ދެފުށް ފެންނަ ގޮތަށް ކަމަށް ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ ޢަބްދުﷲ ޔާމީން ވަނީ ވިދާޅުވެފައެވެ.
މިއަދު މެންދުރުފަހު 2:00 ޖެހިއިރު، ޓެލެތޯނާ ގުޅިގެން ބެހެއްޓި ފަންޑު ފޮށިތައް ބަންދުކޮށްފައިވާއިރު، މިހާރު ދަނީ ލިބުނު ފައިސާގެ އަދަދުތައް ގުނައި ދެނެގަތުމުގެ މަސައްކަތް ކްރޯ މޯލްޑިވްސްއިން ކުރަމުންނެވެ. ލިބުނު ފައިސާގެ އަދަދުތަކަކީ އަދި ވަގުތީ ނަތީޖާތަކެއް ނަމަވެސް، ގުނުމުގެ މަސައްކަތް ނިމުމުން އިންސާފުެރިކަމާއެކު ފައިނަލް އަދަދު ހާމަކުރެވޭނެކަމަށް ވަނީ ބުނެފައެވެ.
“ސިލޯނާއެކު ދިވެހީން” ޓެލެތޯން ނިންމާލުމުގެ ރަސްމިއްޔާތުގައި ވާހަކަދައްކަވަމުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ ޢަބްދުﷲ ޔާމީން ވިދާޅުވީ، ޓެލެތޯންއަށް ލިބުނު ފައިސާގެ ޖުމުލަ އަދަދު ހާމަކުރާނީ މިނިވަން އޮޑިޓު ފާމެއްކަމަށްވާ ކްރޯ މޯލްޑިވްސްއިން ކަމަށެވެ. އެގޮތުން އެކައުންޓަށް ލިބުނު ފައިސާއާއި ފަންޑު ފޮށިތަކަށް ލިބުނު ފައިސާގެ ޖުމުލަ އަދަދު ގުނުމަށްފަހު ވީ އެންމެ އަވަހަކަށް ފައިސާ ލިބުނު ޖުމުލަ އަދަދު އިޢުލާންކުރައްވާނެކަމަށް ޔާމީން ވިދާޅުވިއެވެ.
ޔާމީން އިތުރަށް ވިދާޅުވީ، މީޑިއާއިން އިސްނަގައިގެން ބޭއްވި މި ޓެލެތޯން ވަރަށް ކާމިޔާބުކަމާއެކު ނިންމާލުމުން، މިއީ އަވަށްޓެރި ސްރީ ލަންކާއާ މެދު ދިވެހި ރައްޔިތުންގެ ހިތްތަކުގައި އޮތް ލޯބި ދައްކުވައިދޭ ކަމެއް ކަމަށެވެ. އަދި ސްރީ ލަންކާއަށް އެހީ ފޯރުކޮށްދިނުމާއި ފައިސާއާ ގުޅުންހުރި ހުރިހާ އިންތިޒާމުތަކެއް ކުރިއަށްގެންދާނީ ދެފުށްފެންނަ އުޞޫލުގެ ތެރެއިންކަމަށް ޔާމީން ވިދާޅުވިއެވެ.
“ރައްޔިތުންނަށް ޔަޤީންކަން އަރުވަން މި ކަން ކުރިއަށްގެންދާނީ ދެފުށްފެންނަ ގޮތެއްގައި އިތުބާރު ހިފޭ ގޮތެއްގެ މަތިން. އެ އުޞޫލު ހިފަހައްޓަމުން މި ކުރިއަށްގެންދާނީ.” ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ ޢަބްދުﷲ ޔާމީން ވިދާޅުވިއެވެ. މި ފައިސާގެ ފައިނަލް އަދަދު އަވަސް މުއްދަތެއްގެ ތެރޭގައި ހާމަކުރުމަށް ވަނީ ހަމަޖެހިފައެވެ.