ގދ ފިޔޯރީ ކައުންސިލުގެ ބީފާން ވޮލީމުބާރާތް 2026 ގެ އޮފިޝަލް ފޮޓޯގްރަފީ އަދި ބްރޭންޑިން ޕާޓްނަރު ހަމަޖައްސައިފިއެވެ.
މިމުބާރާތުގެ ފޮޓޯގްރަފީ އަދި ބްރޭޑިން ޕާޓްނަރަކީ ރާޅު އާޓްސް އެންޑް ޑިޒައިންއެވެ.
ރާޅު އާޓްސް އެންޑް ޑިޒައިންއަކީ ރާއްޖޭގައި ފުޅާ ދާއިރާއެއްގައި ބްރޭންޑިން އަދި ފޮޓޯ ނެގުމުގެ މަސައްކަތް ކުރާ ބައެކެވެ. ރާއްޖޭގެ ބޮޑެތި މުބާރާތް ތަކުގެ ބްރޭޑިންގެ ހުމަސައްކަތެއް ރާޅު އާޓްސްއިން ވަނީ ކޮށްފައެވެ. އޭގެ ތެރޭގައި އައްޑޫ ސިޓީ އަދި ފުވައްމުލައް ސިޓީގެ އިތުރުން ތިނަދޫ ސިޓީއާއި ރާއްޖޭގެ ދެކުނުގެ މުބާރާތްތައް ހިމެނެއެވެ.
ފިޔޯރީގައި އެންމެ ފަހުން ބޭއްވުނު ގދ އަތޮޅު ކައުންސިލް ވޮލީ މުބާރާތުގެ ބްރޭޑިން ޕާޓްނަރަކީ ވެސް ރާޅު އާޓްސްއެވެ.
މިމުބާރާތް ރާވައި ހިންގުމާއި އިންތިޒާމް ކުރުމުގެ ހުރިހާ ކަމެެއް ހަވާލުކޮށްފައިވަނީ ފިޔޯރީ އެސޯސިއޭޝަން ފޯ ކޮމިއުނިޓީ އެމްޕަވަރމަންޓް ( ފޭސް ) އާއިއެވެ. ފޭސް އަކީ މުބާރާތްތަކާއި އިޖްތިމާއީ ހަރަކާތްތައް ރާވައި ހިންގުމުގެ ތަޖުރިބާ ލިބިފައިވާ އެސޯސިއޭޝަނެކެވެ. އެންމެ ފަހުން ނިމިދިޔަ ގދ އަތޮޅު ކައުންސިލް ވޮލީ މުބާރާތް ހޯސްޓް ކުރީވެސް ފޭސް އިންނެވެ.
2 ޑިވިޝަނަށް ހުޅުވާލައިގެން އަންނަ ޖެނުއަރީ މަހުގެ 15 ވަނަ ދުވަހު ފެށުމަށް ހަމަޖެހިފައިވާ މި މުބާރާތުގެ ބައިވެރިވުމުގެ އެންމެ ފަހު ތާރީހަކީ މި ޑިސެމްބަރ 15 ވަނަ ދުވަހުގެ 21:00 ގެ ކުރިންނެވެ.
މުބާރާތް އިއުލާން ކުރުމާއި ގަވާއިދު ރަނގަޅުވުމާއި އެކު ދެކުނުގެ 3 ސިޓީ (އައްޑޫ، ފުވައްމުލައް. ތިނަދޫ ) ގެ ޓީމްތައް ބައިވެރި ވާނެ ކަމުގެ ޝައުގުވެރިކަން ވަނީ ފާޅުކޮށްފައެވެ. އަދި އައްޑޫ ސިޓީ، ފުވައްމުލައް ބައެއް ޓީމްތަކުން ވަނީ ރަޖިސްޓްރޭޝަނަށް ފޯމް ވެސް ލާފައެވެ. މުބާރާތުގައި ޓީމްތަކުން ފެންނާނެ ރާއްޖޭގެ މަޝްހޫރު ކުޅުންތެރިންނަށް ބަލާއިރު، އަލީ ހުޒާމް، ބަޓިޝް، އަޒީމް، ރިމޭގެ އިތުރުން ގައުމީ ޓީމްގެ އެހެން ކުޅުންތެރިންވެސް ހިމެނެއެވެ. އަންހެން ޓީމްތަކަށް މިހާރުވެސް އަންނާނެކަމަށް ޔަގީން ކުރެވިފައިވާ ކުޅުންތެރިންގެ ތެރޭގައި، މާޖިދާ، ހައްވަ، މާޔާ، ޝަހާ، ސަމްހާ، އަރީޝާ ގެ އިތުރުން އެހެން ކުޅުންތެރިންވެސް ހިމެނެއެވެ.
މި ފަހަރުގެ މުބާރާތުގެ ތަފާތަކީ ރާއްޖެއިން ބޭރުގެ ބިދޭސީ ކުޅުންތެރިންނަށް ކުޅެވޭ ގޮތް ވުމެވެ. މި މުބާރާތުގައި ރާއްޖެއިން ބޭރު ކުޅުންތެރިން ފެންނާނެ ކަމަށް ބެލެވޭ އިރު ބައެއްޓީމްތަކުން ވަނީ ކުޅުންތެރިން ޝޯޓު ލިސްޓް ކޮށްފައެވެ.
ޓީމް ލިސްޓެއްގައި ރަށުންބޭރު 3 ކުޅުންތެރިން ހިމެނޭއިރު ކޮންމެ ޓީމެއްގައި ގިނަވެގެން ހިމެނޭނީ 2025 ވަނަ އަހަރުގައި އެކުލަވާލައިފައިވާ ގައުމީ ޓީމުގައި ހިމެނޭ ކުަޅުންތެރިންގެ ތެރެއިން 2 ކުަޅުންތެރިން ނުވަތަ 2025 ވަނަ އަހަރުގައި އެކުލަވާލައިފައިވާ ގައުމީ ޓީމުގައި ހިމެނޭ ކުަޅުންތެރިންގެ ތެރެއިން 1 ކުޅުންތެރިން އަދި ދިވެހި ރާއްޖެއިން ބޭރު އެއްކުޅުންތެރިންނެވެ. މީގެ އިތުރުން ރަށު މީހަކާއި އިނދެގެން ނުވަތަ މަންމަ ބައްޕަ އެރަށެއްގައި ނަމަ ރަށު ކުޅުންތެރިޔަކަށް ކުޅެވިދާނެއެވެ.
އަންހެން އަދި ފިރިހެން ޑިވިޝަނަނަށް ބަހާލައިގެން ކުރިއަށްދާ މިދިޔަ އަހަރު ފޭސްއިން ބޭއްވި ގދ އަތޮޅު ކައުންސިލް މުބާރާތުގައިވެސް އަތޮޅު ރަށްތަކުގެ ޓީމްތަކުން ވަނީ ބައިވެރިވެފައެވެ. 2021 ވަނަ އަހަރު ބޭއްވުނު މުބާރާތުގެ އަންހެން ޑިވިޝަންގެ ޗެމްޕިއަން ޓީމަކީ ފިޔޯރީ ވޮލީ ޓީމެވެ. މިދިޔަ އަހަރުގެ އަންހެން ޗެމްޕިއަންޓީމަކީ ފިޔޯރީއެވެ. ނަޑެއްލާއާއި ވާދަކޮށް ސީދާ 3 ސެޓުން އެމެޗު ކާމިޔާބު ކުރިއެވެ. ފިރިހެން ޗެމްޕިއަނުންނަކީ ވެސް ފިޔޯރީއެވެ. ފިޔޯރީ ޗެމްޕިއަންކަން ހޯދީ ރަތަފަންދޫ 3-2 އިން ބަލިކުރުމަށް ފަހުއެވެ.