އިނގިރޭސިވިލާތުގެ މަޝްހޫރު ޑެލިޝިއަސް މެގަޒިންއިން ދޭ ޑެލިޝިއަސް އެވޯޑްސްގެ “ކޭކު އާޓިސްޓް އޮފް ދި އިޔަރ”ގެ ސެމީ ފައިނަލިސްޓަކަށް ރާއްޖޭގެ މަޝްހޫރު ކޭކު އާޓިސްޓް އަދި ކޭކު ވިޔަފާރީގައި ކުރިއަރާފައިވާ، ނަޝީ ކޭކު ހޮވިއްޖެއެވެ. މިއީ، ރާއްޖޭގެ ކޭކު އެޅުމުގެ ދާއިރާގައި ހަރަކާތްތެރިވާ ފަރާތަކަށް ބައިނަލްއަޤްވާމީ ފެންވަރުގައި ލިބުނު ވަރަށް ބޮޑު ކާމިޔާބީއެކެވެ.
ނަޝީ ކޭކު ނުވަތަ އައިމިނަތު ނަޝީދާއަކީ، ރާއްޖޭގައި ކޭކު އެޅުމުގެ ދާއިރާގައި ގިނަ ދުވަސްތަކެއް ވަންދެން މަސައްކަތްކޮށް، ދިވެހިންގެ މެދުގައި މަޤްބޫލުކަން ހޯދާފައިވާ ފަރާތެކެވެ. ނަޝީ ކޭކު މި ދާއިރާގައި ހަރަކާތްތެރިވާތާ މިހާރު 40 އަހަރު ވެފައިވާއިރު، އެ ފަރާތުން އުފައްދާފައިވާ ކޭކުތަކުގެ ފެންވަރާއި އާޓިސްޓިކް މަސައްކަތްތަކަށް ވަނީ ބޮޑު ތަރުޙީބެއް ލިބިފައެވެ.
ޑެލިޝިއަސް އެވޯޑަކީ، އިނގިރޭސިވިލާތުގެ މަޝްހޫރު ކޭކު މެގަޒިން ކަމަށްވާ ޑެލިޝިއަސް މެގަޒިންއިން ކޮންމެ އަހަރަކުވެސް ދެމުން އަންނަ އެވޯޑެކެވެ. ނަޝީ ކޭކު މި އެވޯޑުގެ ސެމީ ފައިނަލިސްޓަކަށް ހޮވުނީ، މުޅި ދުނިޔޭގެ އެކި ކަންކޮޅުތަކުން ބައިވެރިވި 28،500 މީހުންނާ ވާދަކޮށްގެންނެވެ. މިއަހަރަކީ، މި އެވޯޑަށް އެންމެ ގިނަ އަދަދެއްގެ މީހުން ވާދަކުރި އަހަރުކަން ފާހަގަކޮށްލެވެއެވެ.
މި އެވޯޑުގެ ސެމީ ފައިނަލިސްޓުން ހޮވަނީ ޖަޖުންގެ މާކްސްގެ އިތުރުން ވޯޓަށް ބެލުމަށްފަހުގައެވެ. މި ބުރުގައި ޖުމްލަ 20 މީހުން ހޮވިފައިވާއިރު، މީގެތެރެއިން ދެވަނަ ބުރުގައި ފައިނަލިސްޓުންގެ ގޮތުގައި 5 މީހުން ހޮވާނެއެވެ. ނަޝީ ކޭކު މިހާރު ދަނީ، މި އެވޯޑުގެ ފައިނަލިސްޓަކަށް ވާދަކުރުމަށް މަސައްކަތްކުރަމުންނެވެ. ނަޝީ ކޭކު ވަނީ، މިދިޔަ އަހަރުވެސް މި އެވޯޑުގެ ފައިނަލިސްޓެއްގެ ގޮތުގައި ވާދަކޮށްފައެވެ.
މި ބައިނަލްއަޤްވާމީ މުބާރާތުގެ ސެމީ ފައިނަލިސްޓުންގެ ތެރޭގައި ނަޝީ ކޭކު ހިމެނުމަކީ، ރާއްޖޭގެ ކޭކު އިންޑަސްޓްރީއަށް ލިބުނު ފަޚުރެކެވެ. މި ކާމިޔާބީއާއެކު، ނަޝީ ކޭކަށް މި އެވޯޑުގެ ފައިނަލިސްޓުންގެ ތެރޭގައި ހިމެނި، އިތުރު ކާމިޔާބީތަކެއް ހާސިލުކުރުމަށް ވަނީ މަގުފަހިވެފައެވެ.