މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ އެހީތެރިކަމާއެކު ހުޅުމާލޭ ހުރަވީ ސްކޫލުގައި ގާއިމުކުރި ވޮކޭޝަނަލް ހަބް ކަމަށްވާ “ހުނަރު ވެހި” އިން ހިންގި ފުރަތަމަ ދެ ކޯހުގެ ދަސްވެނިވުން ބާއްވައިފިއެވެ. ހުރަވީ ސްކޫލުގައި އިއްޔެ ބޭއްވި މި ރަސްމިއްޔާތުގެ ޝަރަފްވެރިކޮށްދެއްވީ އެމްއޭސީއެލްގެ ބޯޑު މެމްބަރު އަދި ޗީފް ކޮމާޝަލް އޮފިސާ (ސީސީއޯ) މުހައްމަދު މިހާދެވެ.
މި ރަސްމިއްޔާތުގައި، “ހުނަރު ވެހި” އިން ހިންގި ފުރަތަމަ ދެ ކޯސް ކަމަށްވާ ނޭޝަނަލް ސެޓްފިކޭޓް ލެވެލް 3 އިން އިލެކްޓްރިކަލް އިންސްޓޮލޭޝަން އެންޑް މެއިންޓަނެންސް އަދި ނޭޝަނަލް ސެޓްފިކޭޓް ލެވެލް 3 އިން ފެޝަން ޑިޒައިން އެންޑް ޓެއިލަރިންގެ ތިން ބެޗަކުން ޖުމްލަ 42 ދަރިވަރަކު ވަނީ ދަސްވެނިވެފައެވެ.
ދަސްވެނިވުމުގެ ރަސްމިއްޔާތުގައި ވާހަކަ ދައްކަވަމުން އެމްއޭސީއެލްގެ ސީސީއޯ މުހައްމަދު މިހާދު ވިދާޅުވީ، ދަރިވަރުން ކިޔެވުމުގެ ތެރެއިން ދަސްކުރާ ހުނަރުތަކަކީ އެ ދަރިވަރުންގެ މުސްތަގުބަލަށް މުހިންމު ފައިދާއެއް ކުރާނެ ކަމެއް ކަމަށެވެ. އަދި ޚާއްސަކޮށް ރާއްޖޭގެ ތަރައްގީއަށް ހުނަރުވެރި ދިވެހިން ބޭނުންވެފައިވާ މި ދަނޑިވަޅުގައި، ތައުލީމީ ނިޒާމުގެ ތެރެއިން މިފަދަ ތަމްރީނުތައް ދެވިގެން ދިއުމުގެ މުހިންމުކަން އޭނާ ފާހަގަކުރެއްވިއެވެ.
ހުރަވީ ސްކޫލުގެ ޕްރިންސިޕަލް، މުހައްމަދު ހަލީމް ވަނީ “ހުނަރު ވެހި” ތަރައްގީކޮށްދެއްވައި، ކޯސްތައް ކުރިއަށް ގެންދިއުމަށް އެމްއޭސީއެލްއިން ދެއްވަމުންގެންދާ އެހީތެރިކަމަށް ޝުކުރު ދަންނަވާފައެވެ.
އެމްއޭސީއެލްގެ އިޖުތިމާއީ ޒިންމާ (ސީއެސްއާރު)ގެ ދަށުން ހުރަވީ ސްކޫލުގައި ގާއިމުކުރި “ހުނަރު ވެހި” އަކީ ރާއްޖޭގެ ތައުލީމީ ނިޒާމު ކުރިއެރުވުމަށާއި، އުފެއްދުންތެރި އަދި ބިނާކުރަނިވި ތަމްރީނުތައް ދަރިވަރުންނަށް އުނގަންނައި ދިނުމަށް މަގުފަހިކޮށްދިނުމުގެ ގޮތުން ކުރިއަށް ގެންދިޔަ މަޝްރޫއެކެވެ. މި މަޝްރޫއުގެ ދަށުން ހުނަރު ވެހިން ހިންގާ ކޯސްތަކަށް ބޭނުންވާ ސާމާނު ވަނީ ހަދިޔާކޮށްފައެވެ.
ހަދިޔާކުރި ސާމާނުގެ ތެރޭގައި ވަޑާން ކުރުމަށާއި، ކަރަންޓާއި ވަޔަރިން، އަދި ވެލްޑިން ކުރުމަށް ބޭނުންވާ ސާމާނުގެ އިތުރުން، ދަރިވަރުންނަށް ފަހަން ދަސްކޮށްދިނުމަށް ބޭނުންވާ ސާމާނު ވެސް ހިމެނެއެވެ. މީގެ އިތުރުން، ހުނަރު ވެހި ތަރައްގީކޮށްފައިވާ އިމާރާތް މަރާމާތު ކުރުމުގެ މަސައްކަތަށް ބޭނުންވާ ތަކެއްޗާއި އެހީތެރިކަން ވެސް އެމްއޭސީއެލްއިން ވަނީ ފޯރުކޮށްދީފައެވެ.