ޝަރީއަތް ނިމެންދެން ބަންދުގައި މިވަގުތު 347 މީހުން ތިބިކަމަށާއި، އޭގެތެރޭގައި ގިނައީ ބޮޑެތި ކުށްތަކުގެ ތުހުމަތުގައި ބަންދުކޮށްފައި ތިބި މީހުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. ރައީސް މިކަން ހާމަކުރެއްވީ މާފަންނު ރައްޔިތުންނާއެކު ބޭއްވި ބައްދަލުކުރެއްވުމެއްގައި އާއްމު ރައްޔިތަކު ފާޅުކުރެއްވި ކަންބޮޑުވުމަކަށް ޖަވާބުދެއްވަމުންނެވެ.
ރައީސުލްޖުމްހޫރިއްޔާ ވިދާޅުވީ، ވާނުވާ ބަންދުގެ މައްސަލަ މީގެކުރިން އޮތީ އެއްގޮތަކަށްވެސް ވާނުވާ ނޭނގޭ މައްސަލައެއްގެ ގޮތުގައި ކަމަށެވެ. އެކަން އެހެން ވެފައި އޮތީ ކްރިމިނަލް ކޯޓު އަދި ޑްރަގް ކޯޓު ހިންގުމަށް އެކަށިގެންވާ ވަސީލަތްތައް ހަމަނުޖެހި އޮތުމުން، މައްސަލަތައް ފުނި ޖެހުމުގެ ސަބަބުން ކަމަށް ރައީސް ފާހަގަކުރެއްވިއެވެ. ނަމަވެސް މި ސަރުކާރުން ވަރަށް މަސައްކަތް ކޮށްގެން މި ދެ ކޯޓު ހިންގާނެތަން ހަމަޖައްސައިދީފައިވާކަމަށާއި، އޭގެ ނަތީޖާއަކީ ޝަރީއަތް ހިނގާނެގޮތް ނޭނގި ވާނުވާގައި ތިބި މީހުންގެ ޝަރީއަތް ކުރެވޭނެ ދުވަހާއި މި މައްސަލަތައް އަވަހަށް ބެލޭނެގޮތް ހަމަޖެހިގެން ދިއުން ކަމަށް ރައީސް ވިދާޅުވިއެވެ.
ރައީސް ވިދާޅުވީ، ވާނުވާ ބަންދުގައި ތިބި 347 މީހުންނަކީ ބޮޑެތި ކުއްތަކުގެ ތުހުމަތުގައި ތިބި މީހުން ކަމަށެވެ. އަދި އެކަންކަން ރަނގަޅަށް ނުބަލައި، އެމީހުން ހަމަ ހުރެފައި ދޫކޮށްލަން އެއްވެސް ރައްޔިތަކު ބޭނުންވާނެތޯ ރައީސް ސުވާލުކުރެއްވިއެވެ. “މިހާރު ވަރަށް ގިނަ މައްސަލަތައް ހައްލުކުރެވި ވާނުވާ ފުނިޖެހިފައި ހުރި މައްސަލަތައް ބެލެމުން އެދަނީ. ކުރީގައި ކެޕޭސިޓީ ނެތީ. ޖާނަ ނެތީމަ ނުބެލިފައި ހުރި ކަންތައްތައް.” ރައީސް ވިދާޅުވިއެވެ.
ވާނުވާ ބަންދުގައި ތިބި މީހުންގެ ތަފްސީލް:
ރައީސް ހާމަކުރެއްވި ތަފްސީލްތަކަށް ބަލާއިރު، ޝަރީއަތް ނިމެންދެން ބަންދުގައި ތިބި 347 މީހުންގެ ތެރޭގައި ހިމެނޭ މައްސަލަތައް ތިރީގައި މިވަނީއެވެ:
- މީހުން މަރާފައި ހުރި ކަމުގެ ތުހުމަތުގައި: 29 މީހުން
- ޓެރަރިޒަމްގެ މައްސަލަތަކުގައި: 20 މީހުން
- ކުޑަކުދިންނަށް ޖިންސީ ގޯނާކުރިކަމުގެ ތުހުމަތުގައި: 117 މީހުން
- މާރާމާރީ ހިންގުމުގެ މައްސަލަތަކުގައި: 70 މީހުން
- ޑްރަގް ޓްރެފިކިންގ: 116 މީހުން
- އެހެނިހެން މައްސަލަތައް: މަނީ ލޯންޑްރިން، ވައްކަންކުރުން، ހަތިޔާރުބޭނުންކޮށްގެން ވައްކަން ކުރުން، ޑޮމެސްޓިކް ވަޔަލެންސް، ކިޑްނެޕްކުރުން، ހިޔުމަން ޓްރެފިކިން، އެއްޖިންސުން ގުޅުން ހިންގުން، ތަންތަން ރޯކުރުން، ޕްރޮސްޓިޓިއުޝަން، ސްމަގްލް ކުރުން.
ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވީ ޖުޑިޝަރީ މިނިވަންކޮށް މި ގެންނަ ބަދަލުތަކުގެ ސަބަބުން ވާނުވާ ބަންދުގެ މައްސަލައަށް ޙައްލު ލިބޭނެ ކަމުގެ ވަރަށް ބޮޑު ޔަޤީން ކަމެއް އެބައޮތް ކަމަށެވެ. އެމަނިކުފާނުގެ ވާހަކަފުޅުގައި، މައްސަލަތައް އަވަހަށް ނިންމައި، ޝަރީއަތުގެ މަގު ހޯދައިދިނުމަށް ސަރުކާރުން ކުރަމުންދާ މަސައްކަތްތައް ފާހަގަކުރެއްވިއެވެ.