ގަވާއިދާ ޚިލާފަށް، ދޫކޮށްފައިވާ ހުއްދައިގެ ބޭރުން ދިވެހިރާއްޖޭގައި އުޅެމުންދިޔަ 18 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފިއެވެ. މިއީ ގަވާއިދާ ޚިލާފަށް ރާއްޖޭގައި މަސައްކަތްކުރާ ބިދޭސީންނާ ދެކޮޅަށް ހިންގާ އޮޕަރޭޝަންތަކުގެ ތެރެއިން ހިންގި އޮޕަރޭޝަނެކެވެ.
އިމިގްރޭޝަނުން ވިދާޅުވީ، ޓާސްކްފޯސްއިން މިރޭ ހިންގި ރެއިޑު އޮޕަރޭޝަންގައި މާލޭގެ ދިލްކުޝާގޯޅީގައި، އާންމު ސާފުތާހިރުކަމަށް ބެލުމެއް ނެތި ފުޅާ ދާއިރާއެއްގައި ކާބޯތަކެތި ތައްޔާރުކޮށް، ޑެލިވަރ ކުރަމުންދިއަ ތަނެއް ބަލާ ފާސްކޮށްފައިވާކަމަށެވެ. މީގެ އިތުރުން، އެ ބިދޭސީން ދިރިއުޅެމުންދާ 4 އެކޮމޮޑޭޝަން ބްލޮކްވެސް ވަނީ ބަލައި ފާސްކޮށްފައެވެ. މި ތަންތަނުން ގަވާއިދާ ޚިލާފަށް، ދޫކޮށްފައިވާ ހުއްދައިގެ ބޭރުން ރާއްޖޭގައި އުޅެމުންދިއަ 18 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެނެސްފައެވެ.
މި އޮޕަރޭޝަންގައި ފާސްކުރި ތަންތަނުގެ ފޮޓޯތައް އިމިގްރޭޝަނުން އާއްމުކޮށްފައިވާއިރު، އެތަނުގައި ތައްޔާރުކުރަމުންދިޔަ ކާބޯތަކެތީގެ ތެރޭގައި މުރުމުރު، ކުދިގުޅަ އަދި ކާޖާ ހިމެނެއެވެ. ފޮޓޯތަކުން ފެންނަނީ ބިދޭސީންތަކެއް މުރުމުރު ތައްޔާރުކޮށް އެއްޗަކަށް އަޅާފައިވާ ތަނާއި މުރުމުރު ޕެކެޓްކޮށްފައި ހުރި މަންޒަރެވެ. އަދި ކުދިގުޅަ ތައްޔާރުކޮށް، ތެލުލަން ތައްޔާރުކޮށްފައިވާ މަންޒަރުގެ އިތުރުން ކާޖާ ޕެކެޓްތަކެއް ތައްޔާރުކޮށް، ޕެކެޓްކޮށްފައި ހުރި މަންޒަރުވެސް ފެނެއެވެ.
ދިވެހިރާއްޖޭގައި ޤަވާއިދާ ޚިލާފަށް ފުޅާދާއިރާއެއްގައި ބިދޭސީން ވިޔަފާރި ކުރަމުންދާ މައްސަލަ ޙައްލު ކުރުމަށްޓަކައި، ސަރުކާރުން ވަނީ “ނެޝަނަލް ޓާސްކްފޯރސް އޮން ކޮމްބެޓިންގ އިލީގަލް އެކްސްޕެޓްރިއޭޓް އޮޕަރޭޝަންސް އެންޑް ބިޒްނަސަސް”ގެ ނަމުގައި ޚާއްސަ ޓާސްކްފޯހެއް އެކުލަވާލާފައެވެ. އިޤްތިޞާދީ ތަރައްޤީއާ ބެހޭ ވުޒާރާއިން ވިދާޅުވާ ގޮތުގައި، ޤަވާޢިދާ ޚިލާފަށް ބިދޭސީން ވިޔަފާރިކުރާ ކަމުގެ ޝަކުވާ އަބަދުވެސް ސަރުކާރުގެ އިދާރާތަކަށް ލިބެމުންދެއެވެ.
މި މައްސަލަ ހައްލުކުރުމަށްޓަކައި، އިޤްތިޞާދީ ތަރައްޤީއާ ބެހޭ ވުޒާރާއިން ވަނީ ބިދޭސީން ރާއްޖޭގައި ވިޔަފާރި ކުރުން މަނާ ދާއިރާތަކުގެ ލިސްޓެއް އެކުލަވާލާފައެވެ. އެ ލިސްޓުގައި 34 ދާއިރާއެއް ހިމަނާފައިވެއެވެ. މިފަދަ އޮޕަރޭޝަންތައް އިތުރަށް ހިންގުމަކީ ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރާ މަސައްކަތެއްގެ ގޮތުގައި ފާހަގަކުރެވެއެވެ.