މާލެ ސަރަހައްދުގައި ޕާކިން ބިލްޑިންތަކެއް ތަރައްޤީކުރުމަށް އިންޑިއާގެ ލައިން އޮފް ކްރެޑިޓް (އެލް.އޯ.ސީ) ގައި ހިމާނާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް ވިދާޅުވީ، މި މަޝްރޫޢު ކުރިއަށް ގެންދިއުމަށްޓަކައި މިހާރު ވަނީ ލިޔެކިޔުންތައް އިންޑިއާގެ ސަރުކާރަށް ފޮނުވާފައިކަމަށާއި، މިއީ މާލެ ސަރަހައްދުގެ ޕާކިން މައްސަލައަށް ދާއިމީ ހައްލެއް ހޯދުމަށް ސަރުކާރުން ކުރައްވާ މުހިންމު މަސައްކަތެއް ކަމަށެވެ.
މި މަޝްރޫޢުގެ ދަށުން މާލެ ސަރަހައްދުގައި ޖުމްލަ ޕާކިން ބިލްޑިންތަކެއް ތަރައްޤީކުރުމަށް ވަނީ ހަމަޖެހިފައެވެ. އޭގެ ތެރެއިން ދެ ބިލްޑިންގ މާލޭގައި ތަރައްޤީ ކުރެވޭނެއެވެ. މީގެ އިތުރުން ވިލިމާލެއާއި ހުޅުމާލޭގައި ވެސް ޕާކިން ބިލްޑިންގްސް ތަރައްޤީކުރެވޭނެއެވެ. ރައީސް މުޢިއްޒު ވިދާޅުވި ގޮތުގައި، ވިލިމާލޭގައި ޕާކިން ބިލްޑިންގް ތަރައްޤީކުރާނީ ބްރިޖުން ވިލިމާލެއަށް ފައިބާ ހިސާބުގައެވެ. އެއީ ބްރިޖުން ވިލިމާލެއަށް ދަތުރުކުރާ ފަރާތްތަކަށް އެތަނުގައި ޕާކުކުރުމުގެ ފަސޭހަ ލިބިގެންދާނެތީއެވެ. އަދި ހުޅުމާލޭގައި ބިލްޑިންގ ތަރައްޤީކުރާނީ ގިނަ ބަޔަކަށް ފަސޭހަ ވާނެ ރަނގަޅު ލޮކޭޝަނެއްގައިކަމަށް ރައީސް ވިދާޅުވިއެވެ.
ރައީސް ޑރ. މުޢިއްޒު ވިދާޅުވީ މަގުމަތީގައި ޕާކް ކުރުމުގެ މައްސަލައަށް އެދެވޭ ހައްލެއް ގެނައުމަށް ސީދާ ސަރުކާރުން މަސައްކަތް ކުރަމުންދާކަމަށެވެ. މިކަމަކީ އެންމެން ގުޅިގެން ކުރަންޖެހޭ މަސައްކަތެއްކަން ފާހަގަކުރައްވާ ރައީސް ވަނީ ޓްރެފިކް ޕޮލިސް މެދުވެރިކޮށް މިކަމަށްޓަކައި ކުރަމުންދާ މަސައްކަތްތަކުގެ މައްޗަށް އަލިއަޅުވާލައްވާފައެވެ. ޓްރެފިކް ޖޫރިމަނާ ބަހާލައިގެން ދެއްކުމުގެ އިންތިޒާމް ހަމަޖައްސާފައިވާއިރު، މިހާރުވެސް 1000 އަށްވުރެ ގިނަ މީހުން މި އުސޫލުގެ ދަށުން އެގްރީމަންޓް ހަދާފައިވާކަން އެމަނިކުފާނު ފާހަގަކުރެއްވިއެވެ.
މާލޭ މަގުތައް ތަރައްޤީކުރުމުގެ މަސައްކަތް
މާލޭގެ ޓްރެފިކް މައްސަލައަށް ހައްލު ގެނައުމަށް ކުރައްވާ އިތުރު މަސައްކަތްތަކުގެ ތެރޭގައި މާލޭގެ މަގުތައް ރަނގަޅު ފެންވަރަކަށް ތަރައްޤީކުރުމުގެ މަސައްކަތް ހިމެނެއެވެ. ރައީސް ވިދާޅުވީ މި މަސައްކަތް ކުރިއަށް ގެންދިއުމަށް ޗައިނާ ސަރުކާރުގެ ހިލޭ އެހީގެ ދަށުން ފައިސާ ހަމަޖެހިފައިވާކަމަށެވެ. މިހާރު ޑިޒައިންގެ މަސައްކަތްތައް ކުރަމުންދާއިރު، އެ މަސައްކަތް ފެށުމުގެ ކުރިން ކުރެވެން ހުރި މަސައްކަތްތައް މިހާރުވެސް ވަނީ ފަށާފައެވެ.
މި މަސައްކަތުގެ ދަށުން މާލޭ ބާޒާރު މަތި ތަރައްޤީކުރުމުގެ މަސައްކަތް ކުރިއަށްދާކަމަށް ރައީސް ވިދާޅުވިއެވެ. އެ ސަރަޙައްދުގެ މަގު ތަރައްޤީކުރުމުގެ މަސައްކަތް ރަމަޟާން މަސް ނިމުމުގެ ކުރިން ނިންމާލުމަށް މަސައްކަތް ކުރައްވަމުން ގެންދަވާކަމަށް ރައީސް ވިދާޅުވިއެވެ. މި މަސައްކަތް ނިމުމުން އެ ސަރަހައްދަށް ވެސް ޓްރެފިކްގެ ގޮތުން ބޮޑު ލުޔެއް ލިބިގެންދާނެކަން ރައީސް ވަނީ ފާހަގަކުރައްވާފައެވެ. ޕާކިން ބިލްޑިންތަކާއި މަގުތައް ތަރައްޤީކުރުމަކީ މާލެ ސަރަހައްދުގެ ދިރިއުޅުމުގެ ފެންވަރު ރަނގަޅުކުރުމަށް ސަރުކާރުން ދެއްވާ އިސްކަންކަން ދައްކުވައިދޭ ކަމެކެވެ.