ޤައުމީ އެއަރލައިން، މޯލްޑިވިއަނުން ޅ. މަޑިވަރު އެއަރޕޯޓަށް ކުރާ ދަތުރުތައް މިމަހުގެ 22 ވަނަ ދުވަހުން ފެށިގެން އިތުރުކުރަން ނިންމައިފިއެވެ. މި ނިންމުމާއެކު މަޑިވަރަށް ކުރާ ދަތުރުތަކުގެ ޢަދަދު ހަފްތާއަކު ދެ ދަތުރުން ތިން ދަތުރަށް އިތުރުވެގެންދާނެއެވެ.
މޯލްޑިވިއަނުން މިހާރު މަޑިވަރަށް ހަފްތާއަކު ދެ ދަތުރު ކުރަމުންދާއިރު، މިމަހުގެ 22 ވަނަ ދުވަހުން ފެށިގެން އެއަރޕޯޓަށް ހަފްތާއަކު ތިން ދަތުރު ކުރުމަށް ވަނީ ހަމަޖެހިފައެވެ. މި ދަތުރުތައް ބާއްވާނީ ކޮންމެ ހަފްތާއެއްގެވެސް ހޯމަ، ބުދަ އަދި ހޮނިހިރު ދުވަހުއެވެ. މަޑިވަރަށް މޯލްޑިވިއަނުން ކުރާ ދަތުރެއްގެ އެއްކޮޅު ޓިކެޓުގެ އަގަކީ 799 ރުފިޔާއެވެ.
މޯލްޑިވިއަނަކީ އަބަދުވެސް ޑިމާންޑަށް ބެލުމަށްފަހު މަންޒިލްތަކަށް އިތުރު ފްލައިޓްތައް ބާއްވަމުން އަންނަ އެއަރލައިނެކެވެ. އެގޮތުން ޢީދާއި އަދި ޗުއްޓީ ބަންދާއި ދިމާކޮށްވެސް މޯލްޑިވިއަނުން ވަނީ ޑޮމެސްޓިކް އަދި އިންޓަރނޭޝަނަލް މަންޒިލްތަކަށް އިތުރު ފްލައިޓްތައް ބާއްވާފައެވެ. މިގޮތަށް ދަތުރުތައް އިތުރުކުރުމަކީ ޅ. އަތޮޅުގެ ރައްޔިތުންނަށް ދަތުރުފަތުރުގެ ގޮތުން އިތުރު ފަސޭހަތަކެއް ލިބިގެންދާނެ ކަމެކެވެ.
ޅ. މަޑިވަރު އެއަރޕޯޓަކީ 2022 ވަނަ އަަހަރު ހުޅުވާފައިވާ އެއަރޕޯޓެކެވެ. މި އެއަރޕޯޓުގައި 1200 މީޓަރުގެ ރަންވޭއަކާއި، އެއަރ ކްރާފްޓްތައް ޕާކު ކުރާނެ ސަރަޙައްދަކާއި، ފަޔަރ ބިލްޑިންގއެއްގެ އިތުރުން ޒަމާނީ ފެންވަރުގެ ޓަރމިނަލެއް ވަނީ ތަރައްޤީކޮށްފައެވެ. މޯލްޑިވިއަނުން މަޑިވަރަށް ކުރާ ދަތުރުތައް އިތުރުކުރުމަކީ މި ސަރަޙައްދުގެ އިޤްތިޞާދީ ހަރަކާތްތަކަށްވެސް ހެޔޮ ބަދަލުތަކެއް ގެނެސްދޭނެ ކަމެއް ކަމަށް ބެލެވެއެވެ.