ރާއްޖޭގެ ޤައުމީ ވެކްސިން ޝެޑިއުލް އިތުރަށް ފުޅާކޮށް، ކުޑަކުދިންނަށް ދިމާވާ ނުރައްކާތެރި ބަލިތަކުން ރައްކާތެރިކޮށްދިނުމަށް މުހިންމު ދެ ވެކްސިނެއް މި ޝެޑިއުލްގައި ހިމަނައިފިއެވެ. ޤައުމީ ވެކްސިން ޝެޑިއުލްގައި ހިމަނާފައިވަނީ، ”ނިއުމަ ކޯކަލް“ (Pneumococcal) އަދި ”ރޯޓާ ވައިރަސް“ (Rotavirus) ވެކްސިނެވެ. މި ވެކްސިންތައް މިއަދުން ފެށިގެން އެއްވެސް އަގަކާ ނުލައި ވެކްސިން ސެންޓަރުތަކުން ލިބެން ހުންނާނެއެވެ.
ވެކްސިން ޕްރޮގްރާމްގެ ޑިރެކްޓަރ ނާޝިޔާ އަބްދުލް ޣަފޫރު ދައުލަތުގެ މީޑިއާ، ޕީއެސްއެމް ނިއުސްއަށް މަޢުލޫމާތު ދެއްވަމުން ވިދާޅުވީ، މި ދެ ވެކްސިން ޤައުމީ ޝެޑިއުލްގައި ހިމެނުމާއެކު، ކުރިން އަމިއްލަ ގޮތުން ގަނެގެން ދެމުން އައި އޮޕްޝަނަލް ވެކްސިންތައް މިހާރު ހިލޭ ލިބޭނެ ކަމަށެވެ. ”މި ދެ ވެކްސިނަކީ، ކުރިން އަމިއްލަ ގޮތުން ބޭނުންވާ މީހުންނަށް ގަނެގެން ދޭ ވެކްސިންތަކެއް. ނަމަވެސް ޤައުމީ ޝެޑިއުލްގެ ތެރޭގައި ހިމެނުމުން އެހެން ވެކްސިންތަކެކޭ އެއްގޮތަށް ދެމުން ގެންދާނެ. އެއްވެސް އަގަކާ ނުލާ ވެކްސިން ސެންޓަރުތަކުން މި ވެކްސިން ލިބެން ހުންނާނެ.“ ނާޝިޔާ އަބްދުލް ޣަފޫރު ވިދާޅުވިއެވެ.
މި ދެ ވެކްސިނަކީވެސް ކުޑަކުދިންގެ ސިއްހަތަށް ވަރަށް މުހިންމު ދެ ވެކްސިނެވެ. ނިއުމޯ ކޮކަލް ވެކްސިނަކީ، ނިއުމޯނިޔާ އަދި މެނިންޖައިޓިސް ފަދަ ނުރައްކާތެރި ބަލިތަކުން ރައްކާތެރިވުމަށް ޖަހާ ވެކްސިނެކެވެ. އަދި ރޮޓާ ވައިރަސް ވެކްސިނަކީ، ކުޑަކުދިންނަށް ދިމާވާ ބޭރަށް ހިންގުމާއި ގިނައިން ހޮނޑުލުން ފަދަ ސިއްހީ މައްސަލަތަކުން ދުރުކޮށްދިނުމަށް ދޭ ވެކްސިނެކެވެ.
މި ވެކްސިންތައް ދިނުމަށް ހަމަޖެހިފައިވަނީ ޢުމުރުން 2 މަހާއި، 4 މަސް އަދި 6 މަހުގެ ކުދިންނަށެވެ. ޤައުމީ ޝެޑިއުލްގައި މި ދެ ވެކްސިން ހިމެނުމުގެ ކުރިން އޮތީ އޮޕްޝަނަލް ވެކްސިންގެ ގޮތުގައެވެ. ނަމަވެސް މިހާރު ޤައުމީ ޝެޑިއުލްގެ ދަށަށް ބަދަލުވުމާއެކު، އެހެން ވެކްސިންތަކެކޭ އެއްފަދައިން މި ވެކްސިންތަކުގެ ހިދުމަތްވެސް އާސަންދައިން ކަވަރު ކުރާނެއެވެ.
މީގެ ކުރިން ރާއްޖޭގެ ޤައުމީ ވެކްސިން ޝެޑިއުލްގައި މަޖުބޫރު ވެކްސިންތަކުގެ ތެރޭގައި ހިމެނެމުން ދިޔައީ އެމްއެމްއާރު (MMR)، ޕޯލިއޯ، ހެޕަޓައިޓިސް، އަދި ޓެޓްނަސް ފަދަ މުހިންމު ވެކްސިންތަކެވެ. މި އިތުރުވުމާއެކު، ރާއްޖޭގެ ކުޑަކުދިންގެ ސިއްހީ ރައްކާތެރިކަން އިތުރަށް ހަރުދަނާވެގެންދާނެ ކަމަށް ސިއްހީ ދާއިރާގެ ތަޖުރިބާކާރުން ވިދާޅުވެއެވެ.