ރާއްޖޭގެ އެކި ރަށްރަށުގައި ކުރިއަށްގެންދާ މަގުހެދުމުގެ މަޝްރޫޢުތަކުގެ ތެރެއިން، ދ. ކުޑަހުވަދޫގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ މަސައްކަތްތައް ބާރަށް ކުރިއަށްދާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ހާމަކޮށްފިއެވެ. އެގޮތުން މިހާރު ދަނީ ދޮށިމޭނާ މަގުގައި ކާރބް ސްޓޯން ޖެހުމާއި، މޫނިމާ މަގުގައި ޑީވޯޓަރ ހޮޅި އެޅުމަށް މަގު ކޮނުމުގެ މަސައްކަތްތަކުގެ އިތުރުން ބެކް ފިލިންގ އަދި ލެވެލިންގގެ މަސައްކަތް ކުރަމުންނެވެ.
އާރްޑީސީއިން ކުޑަހުވަދޫގެ މަގުހެދުމުގެ މަސައްކަތް ކުރިއަށްދާ ގޮތުގެ އަދާހަމަ މަޢުލޫމާތު ހާމަކުރަމުން، މީގެ ކުރިން ކާސިންޖީ ހިނގުމުގައި ސްޓޯމް ވޯޓަރ ހޮޅި އެޅުމަށްޓަކައި މަގު ކޮނުމުގެ މަސައްކަތް ނިންމާފައިވާ ކަމަށް ބުނެފައިވެއެވެ. މީގެއިތުރުން ސްޓޯމް ވޯޓަރ ޓޭންކް ބެހެއްޓުމުގެ މަސައްކަތްވެސް ވަނީ ކޮށްފައެވެ. މި މަޝްރޫޢަށް ބޭނުންވާ ސާމާނު ކުޑަހުވަދުއަށް ފޮނުވާފައިވާ ކަމަށް އާރްޑީސީން ވަނީ ފާހަގަކޮށްފައެވެ.
ސަރުކާރުގެ ފަރާތުން އާރްޑީސީއާ ހަވާލުކޮށްގެން ކުރިއަށްގެންދާ މި މަޝްރޫޢުގެ ދަށުން، މިވަގުތު އެރަށުގެ އާކުރި މަގުގައި ސްޓޯމް ވޯޓަރ ޖަންކްޝަން ބެހެއްޓުމުގެ މަސައްކަތްތައް ދަނީ ކުރިއަށެވެ. އަދި ކޭބަލް ޖަންކްޝަން ހޮޅި އެޅުމުގެ މަސައްކަތާއި، މޫނިމާ މަގުގައި ކާރބް ސްޓޯން ޖެހުމުގެ މަސައްކަތްވެސް ދަނީ ކުރެވެމުންނެވެ. އާރްޑީސީން ބުނެފައިވަނީ މިހާރު މި މަސައްކަތް ބާރު ސްޕީޑެއްގައި ކުރިއަށްދާ ކަމަށެވެ.
3،000 އަށްވުރެ ގިނަ އާބާދީއެއް ދިރިއުޅޭ ކުޑަހުވަދޫގެ މަގުތައް ޒަމާނީ ފެންވަރަށް ތަރައްގީކުރުމުގެ މި މަޝްރޫޢަކީ، ރައްޔިތުންގެ ދިރިއުޅުމުގެ ފެންވަރު މަތިކޮށް، ރަށުގެ އުމްރާނީ ތަރައްގީއަށް އިތުރު ކުރިއެރުމެއް ގެނެސްދޭނެ މަޝްރޫޢެއް ކަމަށް އާރްޑީސީން ފާހަގަކުރެއެވެ. މި މަޝްރޫޢުގެ ދަށުން ކުޑަހުވަދޫގެ މައިގަނޑު މަގުތަކުގައި ފެންހިންދާ ނިޒާމު ގާއިމުކުރެވި، ކަރަންޓާއި ފެނުގެ ވިއުގަ އަޅައި، އަދި މަގުތައް ތާރުއަޅައި ހެދުމުގެ މަސައްކަތްތައް ހިމެނެއެވެ.