ސައުދީ އަރަބިއްޔާގެ މަޝްހޫރު އަލް-ސަފްވާ ފައުންޑޭޝަންގެ ޗެއާމަން، ބަންދަރު ބިން އަބްދުﷲ އަލް-ރާޖިހީ، މޯލްޑިވްސް ހައްޖު ކޯޕަރޭޝަނަށް ރަސްމީ ޒިޔާރަތެއް ކުރައްވައި، ދެ ފަރާތުން ގުޅިގެން ކުރިއަށްގެންދެވޭނެ ދީނީ އަދި ދަރުމަވެރި މަސައްކަތްތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވައިފިއެވެ. މި މުހިންމު ޒިޔާރަތުގައި އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް ޢަލީ ސައީދުވެސް ބައިވެރިވެވަޑައިގެންނެވިއެވެ.
ހައްޖު ކޯޕަރޭޝަންގެ މައި އޮފީހުގައި ބޭއްވި މި ބައްދަލުކުރެއްވުމުގައި، ދިވެހިރާއްޖޭގެ ހައްޖާއި އުމްރާގެ ކަންކަމުގައި އަލް-ސަފްވާ ފައުންޑޭޝަންގެ އެހީތެރިކަމާއެކު ކުރިއަށްގެންދެވޭނެ ޕްރޮގްރާމްތަކާއި، ދީނީ ތައުލީމާއި އިޖުތިމާއީ ހިދުމަތްތައް ހިންގުމާ ބެހޭގޮތުން މުހިންމު މަޝްވަރާތައް ކުރެވުނެވެ. އަލް-ސަފްވާ ފައުންޑޭޝަނަކީ ސައުދީ އަރަބިއްޔާގެ މަޝްހޫރު އައްރާޖިހީ ބޭންކުގެ ދަށުން ދީނީ އަދި ދަރުމަވެރި މަސައްކަތްތައް ހިންގާ، ދުނިޔޭގެ އެކި ކަންކޮޅުތަކުގައި ދީނީ ހިދުމަތްތަކާއި އިޖުތިމާއީ އެހީތެރިކަން ފޯރުކޮށްދިނުމުގައި މަސައްކަތްކުރަމުން އަންނަ ޖަމިއްޔާއެކެވެ.
އަލް-ސަފްވާ ފައުންޑޭޝަންގެ ވަފްދަށް ހައްޖު ކޯޕަރޭޝަންގެ ފަރާތުން މަރުހަބާ ދެންނެވީ އެ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލާއި، ޑެޕިއުޓީ މެނޭޖިން ޑިރެކްޓަރު އަލީ ޝަރީފާއި، މުހައްމަދު ޝިހާބެވެ. މި ބައްދަލުވުމުގެ މަގްސަދަކީ ދެ ފަރާތުގެ ގުޅުން ބަދަހިކޮށް، ހާއްސަކޮށް ހައްޖާއި އުމްރާގެ ހިދުމަތްތައް ރަނގަޅުކުރުމަށް އެއްބާރުލުން ދިނުމެވެ.
ހައްޖު ކޯޕަރޭޝަނުން ހާމަކުރައްވާ ގޮތުގައި، މި ޒިޔާރަތަކީ ދިވެހިރާއްޖެއާއި ސައުދީ އަރަބިއްޔާއާ ދެމެދުގައިވާ ދީނީ އަދި ސަގާފީ ގުޅުންތައް އިތުރަށް ބަދަހިކުރުމަށް ލިބިގެންދިޔަ މުހިންމު ފުރުސަތެކެވެ. “ހާއްސަކޮށް ހައްޖާއި އުމްރާގެ ހިދުމަތްތައް ރަނގަޅުކުރުމާއި، ދީނީ ހޭލުންތެރިކަން އިތުރުކުރުމަށް މިފަދަ ބައްދަލުވުންތަކުން ބޮޑު އެހީތެރިކަމެއް ލިބިގެންދާނެ،” ކަމަށް ހައްޖު ކޯޕަރޭޝަނުން ވިދާޅުވިއެވެ. މި މަޝްވަރާތަކުގެ ނަތީޖާއެއްގެ ގޮތުން ދިވެހިރާއްޖޭގެ ދީނީ ދާއިރާއަށް އިތުރު ކުރިއެރުންތަކެއް ލިބިގެންދާނެ ކަމަށް އުންމީދުކުރެވެއެވެ.