ރާއްޖޭގެ ފަތުރުވެރިކަމުގެ ސިނާއަތަށް ސްޕެއިން މާކެޓްގެ ދައުރު އިތުރުވެ، އެ ޤައުމުން ރާއްޖެއަށް ޒިޔާރަތްކުރި ފަތުރުވެރިންގެ އަދަދު ބައި ލައްކައަށްވުރެ މައްޗަށް އަރައިފިއެވެ. ސްޕެއިނަކީ މިހާރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ ޤައުމުތަކުގެ ތެރޭގައި 9 ވަނައިގައި ހިމެނޭ ޤައުމެކެވެ.
ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން، ސްޕެއިނުން މިހާތަނަށް ރާއްޖެއަށް 51،988 ފަތުރުވެރިން ވަނީ ޒިޔާރަތްކޮށްފައެވެ. މިއަދަދާއެކު ސްޕެއިން ވަނީ އަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަ 10 މާކެޓްގެ ތެރޭގައި ހިމެނިފައެވެ. މިދިޔަ އަހަރު ނިމުނުއިރުވެސް ސްޕެއިން ހިމެނެނީ ރާއްޖެއަށް 9 ވަނައަށް އެންމެ ގިނައިން ފަތުރުވެރިން އައި ޤައުމުގެ ގޮތުގައެވެ. މިއީ ރާއްޖޭގެ ފަތުރުވެރިކަމުގައި ކުރިއަރަމުން އަންނަ މާކެޓެއްކަން ހާމަވާ ކަމެކެވެ.
މުޅި ޖުމްލަ ރާއްޖެއަށް މިހާތަނަށް 2،080،134 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު %10.1 އިތުރު އަދަދެކެވެ. މިހާރު އެވްރެޖްކޮށް ދުވާލެއްގެ މައްޗަށް ރާއްޖެއަށް 6،453 ފަތުރުވެރިން އާދެއެވެ.
އަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން އައިސްފައިވާ 3 ޤައުމަކީ ޗައިނާ (318،032 ފަތުރުވެރިން)، ރަޝިއާ (260،416 ފަތުރުވެރިން)، އަދި އިނގިރޭސިވިލާތް (186،762 ފަތުރުވެރިން) އެވެ.
މިވަގުތު ރާއްޖޭގައި ފަތުރުވެރިންނަށް ޚިދުމަތް ދިނުމަށްޓަކައި ޖުމްލަ 1315 ތަނެއް ވަނީ ހުޅުވާފައެވެ. މީގެތެރޭގައި ރިސޯޓް، ހޮޓެލް، ހެސްޓްހައުސް އަދި ސަފާރީ އުޅަނދުތައް ހިމެނެއެވެ.