ކަންނެލި މަސް ޕްރޮސެސްކޮށް، ބަންދުކުރާ ފެސިލިޓީ އެޅުމަށް ހުއްދަ ލިބިފައިވާކަމަށާއި މި ފެށޭ ޖަނަވަރީ މަހުގެ ތެރޭގައި މަސައްކަތް ފެށޭނެކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުންނެވެ.
މަސްވެރި ސިނާއަތުގައި ހުރި މައްސަލަތައް ހައްލު ކުރުމަށް މި ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވައި، ވަޒީރު ޝިޔާމް ވަނީ ޚާއްސަކޮށް ބޮޑު ކަންނެލި މަސްވެރިންގެ ކަންބޮޑުވުންތަކަށް ހައްލު ގެނެސްދެއްވުމަށް މަސައްކަތް ކުރައްވާކަން ފާހަގަކުރައްވާފައެވެ. މި މަސައްކަތުގެ ތެރެއިން، ކަންނެލި މަސް ޕްރޮސެސްކޮށް، ބަންދުކުރާ ފެސިލިޓީއެއް އެޅުމަކީ ރައީސުލްޖުމްހޫރިއްޔާގެ ވައުދުފުޅެއްކަމަށް ވަޒީރު ވިދާޅުވިއެވެ. މި މަޝްރޫޢު ހިންގުމަށްޓަކައި ހުޅުމާލެއިން ވަނީ 25،000 އަކަފޫޓުގެ ބިމެއް ކަނޑައަޅާފައެވެ.
މި މަސައްކަތުގެ ތާވަޅާ ބެހޭގޮތުން ވާހަކަ ދައްކަވަމުން ވަޒީރު ޝިޔާމް ވިދާޅުވީ، މަސައްކަތްތައް ރާވާފައިވަނީ 6 މަސް ދުވަހުގެ ތެރޭގައި ނިންމާލެވޭނެ ގޮތަށް ކަމަށެވެ. އެގޮތުން، މި ފެށޭ ޖަނަވަރީ މަހު މަސައްކަތް ފެށި، ކަންނެލި މަސްވެރިންނަށް ރައީސް ވެފައިވާ ވައުދުފުޅު ފުއްދިގެންދާނެކަމަށް ޔަޤީންކަން ދެއްވިއެވެ.
“އަޅުގަނޑުމެންނަށް އޮތް ޔަޤީންކަމަކީ އިރާދަކުރެއްވިއްޔާ މި ފެށޭ ޖަނަވަރީ މަހު އެތަނުގެ މަސައްކަތް ފަށައި އަޅުގަނޑުމެން ހުރިހައި ކަމެއް ޕްލޭންކޮށްފައި މިވަނީ. 6 މަސް ދުވަހުގެ ތެރޭގައި މަސައްކަތް ނިންމައި އެއްކަލަ ކަންނެލި މަސްވެރިންނަށް ރައީސުލްޖުމްހޫރިއްޔާ ވެފައިވާ ވައުދުފުޅު އޭގެތެރެއިން ފުއްދުމަށްޓަކައި.” ވަޒީރު ޝިޔާމް ވިދާޅުވިއެވެ.
މި ފެސިލިޓީ ތަރައްޤީކުރަނީ މިފްކޯއާއި، އިސްލާމިކް ޑިވެލޮޕްމަންޓް ބޭންކު (އައިއެސްޑީބީ) އަދި ދިވެހި ސަރުކާރު ގުޅިގެންނެވެ. އައިއެސްޑީބީން ވަނީ މި މަޝްރޫޢަށް ލޯނު އެހީއެއް ހަމަޖައްސާފައެވެ. މި ފެސިލިޓީއަކީ މިފްކޯގެ މަސް ބަންދުކުރާ ޤާބިލުކަން އިތުރުކުރުމަށް ތަރައްޤީކުރާ ތަނެކެވެ. މިތަނުގައި ދުވާލަކު 35 ޓަނުގެ މަސް ބަންދުކުރުމުގެ ޤާބިލުކަން ހުންނާނެއެވެ.
މީގެ އިތުރުން، ބޮޑު ކަންނެލީގެ މަސްވެރިންނަށް ލުއި ދިނުމުގެ ގޮތުން، މާލެ ސަރަހައްދުގައި ހަރަކާތްތެރިވާ މަސްވެރިންނަށް އަގުހެޔޮކޮށް ތެޔޮ ލިބޭނެ މަގު އެސްޓީއޯގެ ސްކިޑްތަކުން ހަމަޖައްސަވާފައިވާކަން ވަޒީރު ފާހަގަކުރެއްވިއެވެ. މި ލުޔާއެކު ކަންނެލި މަސްވެރިންނަށް ވަރަށް ބޮޑު ލުޔެއް ލިބިގެންދިޔަކަން ވެސް ވަޒީރު ޝިޔާމް ވިދާޅުވިއެވެ.