ހުޅުމާލޭގެ ބައެއް މަގުތައް ހެދުމުގެ މަސައްކަތް، 91.8 މިލިއަން ރުފިޔާއަށް ހަވާލުކުރީ ސެޓްލްމަންޓް އެގްރިމަންޓެއްގެ ދަށުން ޗައިނާގެ ކުންފުންޏަކާ ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން މިއަދު ބުނެފިއެވެ. މި މަޝްރޫއުގެ ދަށުން ހުޅުމާލެ 1 އަދި 2 ގެ 1.1 ކިލޯ މީޓަރުގެ މަގުތައް 5-6 މަސް ދުވަހުގެ ތެރޭގައި ތަރައްގީކުރުމަށް ވަނީ ހަމަޖެހިފައެވެ.
މި މަހުގެ 3 ވަނަ ދުވަހު މި މަސައްކަތް ހަވާލުކޮށްފައިވަނީ ޗައިނާގެ ރޮޓައިމް އިންޖީނިއަރިން އެންޑް ޓެކްނޮލޮޖީ ކުންފުންޏާއެވެ. މަސައްކަތުގެ އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަލީ ޒުހައިރުއެވެ. އަދި ރޮޓައިމްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ޖޯވޭޑޮންގު އެވެ.
އެޗްޑީސީން ނެރުނު ބަޔާނެއްގައި ބުނެފައިވަނީ، މި މަގު ހެދުމުގެ މަޝްރޫއަކީ، 2022 ވަނަ އަހަރުގެ އޮކްޓޯބަރު މަހުގެ 2 ވަނަ ދުވަހު ރޮޓައިމް ކުންފުންޏާ ހަވާލުކުރެވުނު ހުޅުމާލޭގައި ޓެމްޕަރަރީ ވޯކާސް އެކޮމޮޑޭޝަން ތަރައްގީ ކުރުމުގެ މަސައްކަތުގެ ބަދަލުގައި ހަވާލުކުރި ކަމެކެވެ. އެކޮމޮޑޭޝަން ބްލޮކެއް އެޅުމަށް އެ ކުންފުންޏާ ހަވާލުކުރީ ހުޅުމާލޭގައި ބައިނަލްއަގުވާމީ ކުޅިވަރު ސްޓޭޑިއަމެއް އެޅުމަށް ހަމަޖެހިފައިވާތީއެވެ. ނަމަވެސް، ހުޅުމާލޭގެ މާސްޓާ ޕްލޭނަށް ބަދަލު އައުމާއެކު އެ އެކޮމޮޑޭޝަން ބްލޮކުގެ މަޝްރޫއު ހުއްޓާލަން ޖެހުމުން، މަގުތައް ހަދަން މިހާރު ހަވާލުކޮށްފައިވަނީ ކުރީގެ މަޝްރޫއު ހުއްޓާލުމުން އުފެދުނު މައްސަލަތައް ހައްލުކުރުމުގެ ގޮތުން އެކުލަވާލެވުނު ސެޓްލްމަންޓް އެގްރީމަންޓެއްގެ ދަށުންނެވެ.
މި މަޝްރޫއުގެ ދަށުން ހުޅުމާލެ 1 ގެ ފަސް މަގަކާއި ހުޅުމާލެ 2 ގެ ވިނަރެސް ފްލެޓް ކައިރީގައިވާ މަގު ހިމެނޭ ގޮތަށް ޖުމްލަ 19,001 އަކަމީޓަރުގެ ސަރަހައްދެއްގައި ތާރު އަޅައިގެން ޒަމާނީ ފެންވަރަށް މަގު ހަދާނެއެވެ. މީގެ އިތުރުން، ހަލާކުވެފައިވާ 8,012 އަކަމީޓަރުގެ މަގުތައް މަރާމާތުކޮށް އަލުން ތާރު އެޅުމަށް ވެސް ވަނީ ހަމަޖެހިފައެވެ.
މި މަޝްރޫއުގެ ޖީއެސްޓީ ހިމެނޭ އަގަކީ 91,860,829 ރުފިޔާއެވެ. އެޗްޑީސީން ބުނީ، މި ފައިސާ ދައްކަން ހަމަޖައްސާފައިވަނީ ކޭޝްފްލޯއަށް ދަތިނުވާނެ ގޮތަށް 50 ޕަސެންޓު ފައިސާ އެއް އަހަރަށް ބަހާލައިގެން ކަމަށެވެ. ބާކީ 50 ޕަސެންޓު ފައިސާ ދައްކަން ކަނޑައަޅާފައިވަނީ 2027 ވަނަ އަހަރުން ފެށިގެން ހަ އަހަރަށް ބަހާލައިގެންނެވެ.
މަގު ހެދުމަށް ބޭނުންވާ ސާމާނާއި މެޝިނަރީ މޮބިލައިޒްކޮށް، ވީ އެންމެ އަވަހަށް މަސައްކަތް ފަށާނެ ކަމަށް އެޗްޑީސީން ވަނީ ހާމަކޮށްފައެވެ. އަދި މި މަސައްކަތް އަވަހަށް ނިންމައި ހުޅުމާލޭގައި ދިރިއުޅޭ ރައްޔިތުންނަށް ދަތުރުފަތުރުގެ ފަސޭހަތައް ލިބުމަކީ އެ ކުންފުނީގެ އަމާޒެއް ކަމަށް ވެސް އެޗްޑީސީން ބުނެފައިވެއެވެ.