ހިތަކީ ހަށިގަނޑުގެ އެންމެ މުހިންމު އެއް ގުނަންކަން ކަށަވަރެވެ. ނަމަވެސް، ހިތުގެ މަސައްކަތަށް ނޭދެވޭ އަސަރުކުރާ އެންމެ ބޮޑު އެއް ސަބަބަކީ ޖިސްމާނީ ބަލިތަކަށްވުރެ ބައެއް ފަހަރު ނަފްސާނީ އަސަރުތަކާއި ހާސްކަމެވެ. ހިތުގެ އެއްވެސް މައްސަލައެއް ނެތްކަމަށް ޤަބޫލުކުރެވޭ މީހުންނަށް ވެސް ދިރިއުޅުމުގައި ކުރިމަތިވާ ހާސްކަމާއި ނުތަނަވަސްކަމުގެ ސަބަބުން ހިތުގެ މައްސަލަތައް ޖެހުމުގެ ފުރުޞަތު ބޮޑުވެއެވެ. އިޙްސާސްތަކާ ގުޅިފައިވާ ނުތަނަވަސްކަމާއި ހާސްކަމަކީ ހިތަށް ވަރަށް ނުރައްކާތެރި އަސަރުތަކެއް ކުރާ ކަމެކެވެ. މިގޮތުން، ލޯބިވާ މީހަކު ނިޔާވުން ނުވަތަ ގުޅުމެއް ކެނޑިގެން ދިޔުން ފަދަ ނަފްސާނީ ގޮތުން ބޮޑެތި އަސަރުތައް ކުރުވާ ކަންކަމާ ގުޅިގެން ކުރިމަތިވާ ސިއްޙީ ހާލަތަކަށް "ބްރޯކަން ހާޓް ސިންޑްރޯމް" ނުވަތަ "ޓަކޯޓްސްބޯ ކާޑިއޯމިއޯޕަތީ" އޭ ކިޔެއެވެ.
ބްރޯކަން ހާޓް ސިންޑްރޯމް (Broken Heart Syndrome)، ނުވަތަ ސްޓްރެސް ކާޑިއޯމިއޯޕަތީ އަކީ، ނަފްސާނީ ނުވަތަ ޖިސްމާނީ ހާސްކަމުގެ ސަބަބުން ކުއްލިއަކަށް ހިތުގެ މަސްތައް ބަލިކަށިވާ ހާލަތެކެވެ. މި ހާލަތުގައި ހިތަށް ވަރަށް ބޮޑެތި ގެއްލުންތައް ލިބެއެވެ. މިއީ ހާޓް އެޓޭކެއްގެ އަލާމާތްތަކާ ވަރަށް އެއްގޮތް އަލާމާތްތައް ފެންނަ ހާލަތެއް ނަމަވެސް، ހާޓް އެޓޭކާ ޚިލާފަށް މިކަމުގައި ހިތުގެ ލޭހޮޅިތައް ބެދިފައެއް ނުހުރެއެވެ. މި ސިންޑްރޯމްގެ ސަބަބުން ހަށިގަނޑުގެ ހުރިހާ ގުނަވަނަކަށް ލޭ ޕަމްޕުކޮށްދޭ މައި ޗެމްބަރު ކަމަށްވާ ހިތުގެ ލެފްޓް ވެންޓްރިކަލްގެ މަސްތައް ވަގުތީ ގޮތުން ބަލިކަށިވެއެވެ.
މި ސިންޑްރޯމް ކުރިމަތިވާ މައިގަނޑު ސަބަބަކީ ސްޓްރެސް ހޯމޯންތަކަށް އަންނަ ކުއްލި ބަދަލުތަކެވެ. ހާވާޑް ޔުނިވަސިޓީގެ ސްޕެޝިއަލިސްޓުން ވިދާޅުވާ ގޮތުގައި، ޖިސްމާނީ ނުވަތަ އިޙްސާސީ ހާސްކަން އިތުރުވުމުން އެޑްރެނަލިން ފަދަ ސްޓްރެސް ހޯމޯންތައް ހަށިގަނޑަށް ބޭރުވެ، މި ހޯމޯންތަކުގެ ސަބަބުން ހިތުގެ މަސްތަކަށް ވަގުތީ ގޮތުން އަސަރުކޮށް، ހިތުގެ ހިނގުން ބާރުވެއެވެ. މިކަމުގެ ސަބަބުން ހިތުގެ މަސްތަކަށް ނުވަތަ ލޭހޮޅިތަކަށް ބަދަލުތަކެއް އާދެއެވެ.
މި ސިއްޙީ މައްސަލަ ކުރިމަތިކުރުވާ މައިގަނޑު ސަބަބުތަކުގެ ތެރޭގައި:
ނަފްސާނީ ހާސްކަން: ލޯބިވާ ފަރާތެއްގެ ކުއްލި ވަކިވުން، ގުޅުމެއް ކެނޑިގެން ދިޔުން، ނުވަތަ ވަރަށް ބޮޑަށް ރުޅިއައުން.
ޖިސްމާނީ ހާސްކަން: ނުރައްކާތެރި ބައްޔެއް ޖެހުން، ބޮޑު އޮޕަރޭޝަނެއް ކުރުން، ނުވަތަ ނުރައްކާތެރި އެކްސިޑެންޓެއް ހިނގުން.
ގުދުރަތީ ކާރިސާތައް: ބޮޑެތި ކާރިސާތަކުގެ ސަބަބުން ކުރިމަތިވާ ޝޮކް.
މިފަދަ ހާލަތްތައް ކުރިމަތިވާ މީހުންގެ ތެރެއިން ގާތްގަނޑަކަށް 80 އިންސައްތަ މީހުންނަކީ ކައިރި މާޒީގައި ނަފްސާނީ ބޮޑު ޝޮކެއް ލިބިފައިވާ މީހުންނެވެ. ފިރިހެނުންނަށް ވުރެ އަންހެނުންނަށް، ޚާއްޞަކޮށް މެނޮޕޯޒް ވެފައިވާ އަންހެނުންނަށް، މި ސިންޑްރޯމް ކުރިމަތިވުމުގެ ފުރުޞަތު ބޮޑުކަމަށް ދިރާސާތަކުން ދައްކައެވެ.
ބްރޯކަން ހާޓް ސިންޑްރޯމްގެ އަލާމާތްތައް ހާޓް އެޓޭކެއްގެ އަލާމާތްތަކާ ވަރަށް އެއްގޮތްވެފައި، ވަރަށް ނުރައްކާތެރިވެއެވެ. އެންމެ އާންމު އަލާމާތްތަކުގެ ތެރޭގައި މޭމަތީގައި ރިއްސުމާއި ނޭވާކުރުވުން ހިމެނެއެވެ. މި އަލާމާތްތައް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަކީ ވަރަށް މުހިންމު ކަމެކެވެ، ސަބަބަކީ އެއީ ހާޓް އެޓޭކެއް ނޫންކަން ކަށަވަރުކުރުމަށްޓަކައެވެ.
މި މައްސަލަ ދެނެގަތުމަށްޓަކައި ގިނަ ޓެސްޓުތައް ހަދަން ޖެހެއެވެ. އީސީޖީ (ECG) އާއި ލޭގެ ޓެސްޓުތަކުން ހާޓް އެޓޭކެއްގެ އަލާމާތްތައް ފެނިދާނެ ނަމަވެސް، އެންމެ ޔަޤީންކަމާއެކު މި ސިންޑްރޯމް ދެނެގަނެވޭނީ އެންޖިއޯގްރާމް ފަދަ ޓެސްޓުތަކުން ހިތުގެ ލޭހޮޅިތައް ބެދިފައި ނުވާކަން ކަށަވަރުކުރުމަށްފަހުގައެވެ. ހަމައެހެންމެ، އިކޯކާޑިއޯގްރާމް (Echocardiogram) އިން ހިތުގެ ލެފްޓް ވެންޓްރިކަލްގެ ބައްޓަމަށް އައިސްފައިވާ ވަގުތީ ބަދަލުތައް ދެނެގަނެވޭނެއެވެ.
ބްރޯކަން ހާޓް ސިންޑްރޯމް އަކީ ގިނަ ފަހަރަށް ވަގުތީ ބައްޔެކެވެ. އެކަމަކު، ފަރުވާ ނުކޮށް ދޫކޮށްލައިފިނަމަ ހިތުގެ ބޮޑެތި މައްސަލަތައް ކުރިމަތިވުމުގެ ފުރުޞަތު ބޮޑެވެ. ފަރުވާގެ ބޭނުމަކީ ހިތުގެ މަސައްކަތް ރަނގަޅުކޮށް، ހާސްކަން ކުޑަކުރުމެވެ. މީގެ ތެރޭގައި ލޭ ތުނިކުރާ ބޭސްތަކާއި، ހިތުގެ ޕަމްޕުކުރުމުގެ މަސައްކަތް ރަނގަޅުކުރާ ބޭސްތައް ހިމެނެއެވެ.
ދިގު މުއްދަތުގައި މިފަދަ މައްސަލަތަކުން ސަލާމަތްވުމަށްޓަކައި، ނަފްސާނީ ދުޅަހެޔޮކަމަށް ސަމާލުކަން ދިނުމަކީ ވަރަށް މުހިންމު ކަމެކެވެ. އިތުބާރު ކުރާ މީހަކާ ހާސްވެ ކަންބޮޑުވާ ކަންކަން ހިއްސާކޮށް ވާހަކަ ދެއްކުމަކީ ނުވަތަ ނަފްސާނީ ފަރުވާ ހޯދުމަކީ މި ސިންޑްރޯމް ތަކުރާރުވިޔަ ނުދިނުމަށް އެޅޭނެ މުހިންމު ފިޔަވަޅެކެވެ. ހާސްކަން ކުޑަކުރުމަށްޓަކައި ކަސްރަތުކުރުމާއި، ހަމަޖެހޭ ނިދި ލިބިގަތުމާއި، ޔޯގާ ފަދަ ހަރަކާތްތަކުގައި ބައިވެރިވުމަކީ ވެސް ވަރަށް ފައިދާހުރި ކަންކަމެވެ.
ބްރޯކަން ހާޓް ސިންޑްރޯމް ނުވަތަ ޓަކޯޓްސްބޯ ކާޑިއޯމިއޯޕަތީ އަކީ ހަޤީޤީ، އަދި ނުރައްކާތެރި ސިއްޙީ މައްސަލައެކެވެ. މިކަމުން ދައްކައިދެނީ ނަފްސާނީ އިޙްސާސްތަކާއި ޖިސްމާނީ ސިއްޙަތާ ދެމެދު އޮންނަ ގާތް ގުޅުމެވެ. ހާޓް އެޓޭކެއްގެ އަލާމާތްތައް ފެނިއްޖެނަމަ، އެއީ ހަމައެކަނި ނަފްސާނީ ކަމެއް ކަމަށް ދެކި އިހުމާލުނުވެ، ލަސްނުކޮށް ފަރުވާ ހޯދުމަކީ ކޮންމެހެންވެސް ކުރަންޖެހޭ ކަމެކެވެ. ހާސްކަން މެނޭޖްކޮށް، ނަފްސާނީ ދުޅަހެޔޮކަން ދެމެހެއްޓުމަކީ ހިތުގެ ސިއްޙަތު ރަނގަޅުކުރުމަށްޓަކައި އަޅަންޖެހޭ އެންމެ މުހިންމު ފިޔަވަޅެވެ.