އދ. މަހިބަދޫގައި ހަދަމުންދާ ފުޓްސަލް ދަނޑުގެ މަސައްކަތް ބާރު ސްޕީޑުގައި ކުރިއަށްދާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން މިއަދު ބުނެފިއެވެ. މި މަޝްރޫޢަކީ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ކުރިއަށްގެންދާ މަސައްކަތެކެވެ.
އާރްޑީސީން އެކްސްގައި ކުރި ޕޯސްޓެއްގައިވާ ގޮތުން، މިހާރު ދަނޑުގެ މަސައްކަތުގެ ތެރެއިން ބިންގަނޑު ކޮމްޕެކްޓް ކުރުމުގެ މަސައްކަތާއި، ދަނޑު ވަށައިގެން ފެންސު ޖެހުމުގެ މަސައްކަތް ދަނީ ކުރިއަށެވެ. މީގެ އިތުރުން، ދަނޑުގެ ސައިޑް ވޯކް ކޮންކްރީޓް ކުރުމުގެ މަސައްކަތްވެސް މިހާރު ކުރިއަށްދާ ކަމަށް އެ ކުންފުނިން ވަނީ ހާމަކޮށްފައެވެ.
އާރްޑީސީން ދަނީ ރާއްޖޭގެ އެކި ރަށްރަށުގައި ކުޅިވަރު އިންފްރާސްޓްރަކްޗަރ ތަރައްޤީކުރުމުގެ ގިނަ މަޝްރޫޢުތަކެއް ހިންގަމުންނެވެ. ކުޅިވަރަށް ލޯބިކުރާ ފަރާތްތަކަށް ފަސޭހަ ގޮތްތައް ހޯދައިދިނުމަކީ ސަރުކާރުގެ އެންމެ އިސްކަމެއް ދޭ ކަންތައްތަކުގެ ތެރޭގައި ހިމެނޭ ކަމެކެވެ.
ކުޅިވަރުގެ އިތުރުން، ސަރުކާރުގެ ސިޔާސަތުގެ ދަށުން ރާއްޖޭގެ އެކި ރަށްރަށުގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތްވެސް އާރްޑީސީން ދަނީ ކުރަމުންނެވެ. މި މަސައްކަތްތަކުގައި އެންމެ ބޮޑު އިސްކަމެއް ދެނީ ރަށްރަށުގެ މުހިންމު މުއައްސަސާތައް ހުންނަ މަގުތަކާއި، އެންމެ ބޮޑަށް ހަލާކުވެފައިވާ މަގުތައް އަލުން ހެދުމަށެވެ. މަގުތައް ތަރައްޤީކުރުމުގެ މަޝްރޫޢުގެ ތެރޭގައި، މަގުތަކުގައި ފެންހިންދާ ނިޒާމް ޤާއިމްކުރުން ފަދަ މުހިންމު ވަސީލަތްތައް ވެސް ހިމެނެއެވެ.
މަހިބަދޫ ފުޓްސަލް ދަނޑުގެ މަސައްކަތް ބާރަށް ކުރިއަށްދާކަން ހާމަވުމާއެކު، އެރަށުގެ ކުޅިވަރުގެ މާހައުލަށް ބޮޑު ކުރިއެރުމެއް ލިބިގެންދާނެ ކަމަށް ބެލެވެއެވެ.