ފުރާނަހުރި ތަކެތީގެ ސިފައިގައި ހަދާފައިވާ ބުދު ނުވަތަ މޮނިއުމެންޓް ބެހެއްޓުމަކީ ޙަރާމްކަމެއްކަން ކަނޑައަޅައި އިސްލާމީ ފަތުވާދޭ އެންމެ މަތީ މަޖިލީހުން މިއަދު ފަތުވާއެއް ނެރެފިއެވެ. މި ފަތުވާގައި ވަނީ ދިރޭ ތަކެތީގެ ސޫރަ މޮނިއުމެންޓްގެ ގޮތުގައި ބެހެއްޓުމުގެ ޙުކުމާއި، މިކަމާ ގުޅޭ އިސްލާމީ ޝަރީޢަތުގެ އަސްލުތައް ސާފުކޮށްދީފައެވެ. މި ނިންމުމަކީ ޢިލްމީ ގޮތުން ކުރެވުނު ދިރާސީ މަސައްކަތްތަކުގެ ހޯދުންތަކުގެ މައްޗަށް ތައްޔާރުކުރެވިފައިވާ ޢިލްމީ ކަރުދާހެއްގެ އަލީގައި ނިންމާފައިވާ ނިންމުމެކެވެ.
މަޖިލީހުން ނެރުނު ފަތުވާގައި ބުދު ނުވަތަ މޮނިއުމެންޓް ބެހެއްޓުން ޙަރާމްކަމަށް ކަނޑައަޅާފައިވަނީ ޝިރުކަށް މަގުފަހިވެދާނެ އެއްވެސް ޢަމަލެއް ކުރުމަކީ ހުއްދަ ނޫންކަމަށް އިސްލާމްދީނުގައި ބަޔާންވެފައިވާތީއެވެ. ޤިޔާމަތާ ކައިރިވުމުން ބައެއް މީހުން އަލުން ބުދަށް އަޅުކަންކުރަން ފަށާނެ ކަމަށް ޙަދީޘްފުޅުތަކުން އެނގޭކަން ފާހަގަކޮށް، ޢިލްމުވެރިންގެ އިޖުމާޢުން ބުދު ހެދުމާއި ބެހެއްޓުން ހަރާމްވެގެންވާ ކަމަށް ފަތުވާގައި ބުނެފައިވެއެވެ. މީގެ ސަބަބުތަކުގެ ތެރޭގައި މަލާއިކަތުންގެ ބަރަކާތުން މަޙްރޫމްވުމާއި، ޝިރުކަށް މަގުފަހިވުމާއި، އަދި اللهގެ ޚަލްޤުކުރެއްވުމާ އެއްފަދަކުރުން ހިމެނޭ ކަމަށް ފަތުވާގައި ވެއެވެ.
މިކަމުގެ މުހިންމުކަން ރަސޫލާ (ޞޢވ) ގެ ސީރަތުން ހާމަވާކަން ފަތުވާގައި ފާހަގަކޮށްފައިވެއެވެ. އެގޮތުން، މައްކާ ފަތަޙަކުރެއްވި ދުވަހު މަނާތު، ޢުއްޒާ އަދި ލާތު ފަދަ ބުދުތައް ނައްތާލެއްވުމަށް ޞަޙާބީން ފޮނުއްވި ކަމަށާއި، އެކަލޭގެފާނުގެ އަވަހާރަވުމަށްފަހުގައިވެސް ޞަޙާބީން މިކަމަށް ޚާއްޞަ އަހައްމިއްޔަތުކަމެއް ދެއްވާފައިވާކަން ފަތުވާ މަޖިލީހުން ބަޔާންކުރައްވައެވެ. އަދި ބުދުތަކަށް އަޅުކަންކުރުން ފެށިގެން އައިސްފައިވަނީ ޞާލިޙު އަޅުތަކުންގެ ހަނދާނުގައި ހަދާފައިވާ ތަކެތި، ޢިލްމު ގެއްލި މީސްތަކުން މަގުފުރެދުމުގެ ސަބަބުން ކަމަށާއި، އިބްރާހީމުގެފާނުވެސް ބުދަށް އަޅުކަންކުރުމުން ދުރުކޮށްދެއްވުމަށް ދުޢާކުރެއްވިކަން ފަތުވާގައި ހިމަނާފައިވެއެވެ.
ނަމަވެސް، މި ޙުކުމުން ކުޑަކުދިން ކުޅެން ބޭނުންކުރާ ބުދުތަކަކީ އިސްތިސްނާވާ ތަކެއްޗެއް ކަމަށް ފަތުވާގައި ބަޔާންކޮށްފައިވެއެވެ. ޢިލްމުވެރިންގެ ދެކިވަޑައިގަތުމުގައި، މިއީ އަންހެންކުދިން ހަގު އުމުރުން ފެށިގެން ގޭތެރޭގެ ކަންކަމަށާއި ދަރިން ބެލެހެއްޓުމަށް ތަމްރީނުކުރުމުގެ ގޮތުން ހުއްދަވެގެންވާ ކަމެކެވެ.
އިސްލާމީ ފަތުވާދޭ އެންމެ މަތީ މަޖިލީހުން މި ނިންމުން ނިންމާފައިވަނީ ދިނީ ކަންކަމުގައި ޢަމަލުކުރުމާއި ގުޅޭގޮތުން ޚާއްސަ ކޮމިޓީއަކުން ދިރާސާކުރުމަށްފަހުގައެވެ. އަދި މި ނިންމުން ނިންމުމުގައި އިސްލާމީ ފަތުވާދޭ ބައިނަލްއަޤްވާމީ މަޖިލިސްތަކުގެ ފަތުވާތަކަށްވެސް ބަލާފައިވާ ކަމަށް މަޖިލީހުން ނެރުނު ފަތުވާގައިވެއެވެ. މި ފަތުވާއަކީ ދިވެހިރާއްޖޭގައި ދީނީ ކަންކަމުގައި ޢަމަލުކުރުމަށް ނެރޭ އެންމެ ފަހުގެ ބަސްކަން ފާހަގަކުރެވެއެވެ.