ރާއްޖޭގައި ހުންނަ ސަޢޫދީ ޢަރަބިއްޔާގެ އެމްބަސީ ހިންގާ އިމާރާތުގެ ފުރާޅުމައްޗަށް އަރައިގެން 19 އަހަރުގެ ދިވެހި ޒުވާނަކު ހައްޔަރުކޮށް، ފަސް ދުވަހަށް ބަންދު ކޮށްފިއެވެ. މި ޒުވާނާ ހައްޔަރުކޮށްފައިވަނީ މަނާ ސަރަހައްދަކަށް ވަނުމުގެ ދަޢުވާއެއްގައެވެ. މި މައްސަލަ މިހާރު ދަނީ ފުލުހުން ތަހުގީގު ކުރަމުންނެވެ.
ސަޢޫދީ އެމްބަސީ މިހާރު ހިންގަނީ ހުޅުމާލޭ ފެރީ ޓާމިނަލް ކައިރީގައި ހުންނަ އެމްޓީސީސީ ސޯމިލް އިމާރާތުގައެވެ. ކުރިން މި އިމާރާތުގައިވަނީ ފޮރިން މިނިސްޓްރީއާއި ޢަރަބިއްޔާ ސްކޫލްވެސް ހިންގާފައެވެ. ފުލުހުން ވަނީ މި ޒުވާނާ އެމްބަސީއަށް ވަންނަ މަންޒަރު ފެންނަ ސީސީޓީވީ ފުޓޭޖް ބަންދުގެ މުއްދަތު އިތުރުކުރުމަށް އެދި ކޯޓަށް ހުށަހަޅާފައެވެ. މި މައްސަލަ ބެއްލެވި ފަނޑިޔާރު ވަނީ ޒުވާނާ ފަސް ދުވަހަށް ބަންދުގައި ބެހެއްޓުމަށް އަމުރުކޮށްފައެވެ.
ބަންދުގެ މުއްދަތު އިތުރުކުރުމުގެ އަޑުއެހުމުގައި ޒުވާނާ ވަނީ އެއީ ސަޢޫދީ އެމްބަސީ ހިންގާ އިމާރާތްކަން އެނގިފައިނުވާ ކަމަށް ބުނެފައެވެ. އޭނާ ބުނި ގޮތުގައި އެ އިމާރާތުގައި އެމްބަސީއެއް ހިންގާކަން އަންގައިދޭ އެއްވެސް ނިޝާނެއް އޭނާއަށް ފެނިފައެއް ނުވެއެވެ. ނަމަވެސް، އެ އިމާރާތުގައި ސަޢޫދީ ދިދަ ނަގާފައި ހުރެއެވެ. ޒުވާނާ ކޯޓުގައި ބުނި ގޮތުގައި އޭނާ އެ އިމާރާތުގެ ފުރާޅުމައްޗަށް އެރީ އެހެން މީހުންވެސް އެތަނުން ފޮޓޯ ނަގާފައި ހުރުމާއެކު، ފޮޓޯއެއް ނެގުމުގެ ބޭނުމުގައެވެ.
އޭނާ އިތުރަށް ބުނި ގޮތުގައި އެތަނަށް އެރުން މަނާކަން އެނގުމުން، އެރިތާ ދިހަ މިނެޓް ތެރޭގައި އޭނާ ވަނީ ފައިބާފައެވެ. އޭނާ އެކަމަށް މާފަށް އެދިފައިވާއިރު، މި ޒުވާނާގެ ކުރިން އެއްވެސް ކުށުގެ ރެކޯޑެއް ނެތް ކަމަށްވެސް ވަނީ ހާމަވެފައެވެ.