ކުދި އަދި މެދު ފަންތިި ހިމެނޭހެން ހުރިހާ ފަންތިއެއްގެ ވިޔަފާރިތައް ކުރިއެރުވުމަށް ސަރުކާރުން ދަނީ މަސައްކަތް ކުރަމުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ މުއިއްޒު ވިދާޅުވެފައި ވަނީ، ކުދި އަދި މެދުފަންތީގެ ވިޔަފާރިތައް ހިމެނޭހެން ހުރިހާ ފަންތިއެއްގެ ވިޔަފާރިތައް ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށާއި، މިކަމަށްޓަކައި ސިޔާސަތުތައް ބައްޓަން ކުރަމުންދާ ކަމަށެވެ. އެމަނިކުފާނު މިހެން ވިދާޅުވީ ސޯޝަލް ސެންޓަރުގައި ކުދި އަދި މެދުފަންތީގެ ވިޔަފާރިވެރިންނާއެކު ބޭއްވި ބައްދަލުވުމެއް ފައްޓަވައި ދެއްވަމުންނެވެ. ރައީސް ވިދާޅުވީ މިފަދަ ބައްދަލުވުންތަކުގެ މައިގަނޑު މަޤްޞަދަކީ ވިޔަފާރިވެރިންގެ ކަންބޮޑުވުންތަކާއި، ޚިޔާލާއި މަޝްވަރާ ހޯއްދެވުން ކަމަށެވެ.
ރައީސުލްޖުމްހޫރިއްޔާ ފާހަގަކުރެއްވި ގޮތުގައި، ސަރުކާރުން މަސައްކަތް ކުރަމުން މި ގެންދަނީ ކުދި އަދި މެދުފަންތީގެ ވިޔަފާރިވެރިންނާއި، ހުރިހާ ފަންތިއެއްގެ ވިޔަފާރިތައް ކުރިއެރުވުމަށް ސިޔާސަތުތައް ބައްޓަންކޮށްގެންނެވެ. “ސަރުކާރުން މަސައްކަތް ކުރަމުން މި ގެންދަނީ ކުދި އަދި މެދުފަންތީގެ ވިޔަފާރިވެރިން އަދި ހުރިހާ ފަންތިއެއްވެސް ކުރިއެރުމަށް މަސައްކަތްތައް ސިޔާސަތުތައް ބައްޓަންކޮށްގެން. އެހެންވީމަ ތިބޭފުޅުންގެ ވާހަކަފުޅުތައް މިގޮތަށް މަސައްކަތް ކުރުމަށް މުހިންމު އެއްޗަކަށް ވެގެންދާނެ.” ރައީސް ވިދާޅުވިއެވެ. އެމަނިކުފާނު ވަނީ ވިޔަފާރިތަކުގެ ކުރިއެރުވުމަށް ސަރުކާރުގެ ސިޔާސަތުތައް ބައްޓަން ކުރައްވަމުންގެންދާކަން ހާމަކުރައްވާފައެވެ.
ވިޔަފާރިތައް ކުރިއެރުވުމަށް ސަރުކާރުން ވަނީ ދިވެހިންނަށް އެކަނި ވިޔަފާރި ކުރެވޭ ދާއިރާތައް އިތުރުކޮށްފައެވެ. މިގޮތުން، ދިވެހިން ކުރިއަރަމުން އަންނަ ވިޔަފާރިތަކުގައި ބިދޭސީން ހަރަކާތްތެރިވުން ހުއްޓުވުމަށް، މިހާރު ވަނީ 34 ދާއިރާއެއްގައި ހަމައެކަނި ދިވެހިންނަށް ވިޔަފާރި ކުރެވޭ ގޮތަށް ޤާނޫނާއި ޤަވާއިދުތައް އިސްލާހުކޮށްފައެވެ. މިކަން ތަންފީޒުކުރުމަށް އިޤްތިޞާދީ ވުޒާރާއާއި ދާޚިލީ ވުޒާރާ އަދި އެ ދެ ވުޒާރާގެ ދަށުން ހިންގާ ތަންފީޒީ އިދާރާތަކުން ދަނީ މަސައްކަތް ކުރަމުންނެވެ. މިހާތަނަށް މިފަދަ 30 އަށް ވުރެ ގިނަ ވިޔަފާރިއެއް ސަރުކާރުން ވަނީ ބަންދުކޮށްފައެވެ.
މީގެ އިތުރުން ވިޔަފާރިތަކުގެ އުފެއްދުންތައް ހިމާޔަތް ކުރުމާއި ފިކުރީ މުދާ ހިމާޔަތް ކުރުމާއި ގުޅޭ ދެ ޤާނޫނަކަށް މިހާރު ވަނީ ޢަމަލުކުރަން ފަށާފައެވެ. މި އިސްލާހުތަކާއެކު ދިވެހިރާއްޖޭގައި ވިޔަފާރީގެ އުފެއްދުންތަކަށް ބައިނަލްއަޤްވާމީ ގޮތުންވެސް ހިމާޔަތް ލިބޭނެކަން ސަރުކާރުން ކަށަވަރުކޮށްދެއެވެ. އަދި، ވިޔަފާރިތަކަށް ބޭރުފައިސާ ލިބުމުގައި ހުރި ދަތިތައް ހައްލުކުރުމަށް ބޭރުފައިސާގެ ޤާނޫނަށް އިސްލާހު ގެނެސް، ފަތުރުވެރިކަމުގެ ސިނާޢަތަށް ވަންނަ ބޭރުފައިސާގެ ތެރެއިން 20 އިންސައްތަ ބޭންކުތައް މާރުކުރާ ގޮތަށް ވަނީ ބަދަލުކޮށްފައެވެ. މި ބަދަލާއެކު ބޭންކުތަކުން ވިޔަފާރިތަކަށް ދޫކުރާ ބޭރުފައިސާގެ ނިސްބަތް 50 އިންސައްތައަށް ވަނީ އިތުރުވެފައެވެ.
ރައީސް ޑރ. މުޢިއްޒުގެ ރިޔާސީ ވަޢުދެއްގެ ގޮތުގައި ފަންނުވެރިކަމާއި އުފެއްދުންތެރި އިޤްތިޞާދެއް ތަރައްޤީ ކުރުމަށްވެސް ސަރުކާރުން ދަނީ މަސައްކަތް ކުރަމުންނެވެ. އެމަނިކުފާނު ވިދާޅުވެފައިވަނީ، ޤައުމުގެ ޖީޑީޕީގެ 15 އިންސައްތަ ފަންނުވެރިކަމުގެ އިޤްތިޞާދު ކަމުގައި ހެދުމަށް މަސައްކަތް ކުރައްވާނެ ކަމަށެވެ. މި މަޤްޞަދުގައި މަސައްކަތް ކުރުމަށްޓަކައި، ޤައުމީ އުފެއްދުތެރިކަމުގެ މަޢުރަޒުގެ ނަމުގައި މިއަހަރު ވަނީ މިހާތަނަށް ބޭއްވި އެންމެ ބޮޑު މަޢުރަޒު ބާއްވާފައެވެ.