ދިވެހިރާއްޖޭގެ ދަރިވަރުންނަށް އިސްލާމީ ތަރުބިއްޔަތު މާއްދާގެ ފޮތްތަކުން އިތުރު ފިލާވަޅުތަކެއް ދިނުމަށް މިސްކިތްތަކުގެ ވަގުތު ބޭނުން ކުރުމާ ގުޅޭ ގޮތުން އާއްމުންގެ ހިޔާލު ހޯދުމަށް އިސްލާމީ ކަންތައްތަކާ ބެހޭ ވުޒާރާއިން ހުޅުވާލައިފިއެވެ.
މިއީ ޚާއްސަކޮށް 8 ވަނަ ގްރޭޑުން ފެށިގެން 12 ވަނަ ގްރޭޑުގެ ދަރިވަރުންނަށް ހިލޭ ޓިއުޝަން ދިނުމަށް ހަމަޖައްސަން މަސައްކަތްކުރާ ކަމެކެވެ.
އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު މިކަމާ ގުޅޭގޮތުން މީސްމީޑިއާގައި ކުރެއްވި ޕޯސްޓެއްގައި ވަނީ އާއްމުންގެ ޚިޔާލު ހޯއްދަވާފައެވެ. ޝަހީމުގެ ޕޯސްޓްގައިވާ ގޮތުން، 8 ވަނަ ގްރޭޑުން ފެށިގެން 12 ވަނަ ގްރޭޑަށް، އިސްލާމް މާއްދާގެ ފޮތްތަކަށް ހާއްސަކޮށްގެން، މިސްކިތްތަކުގައި ހަފްތާއަކު ދެ ދުވަހު، ދެ ނަމާދު ދޭތެރޭގައި ހިލޭ ޓިއުޝަން ދިނުމުގެ އިންތިޒާމެއް ހަމަޖެއްސުމާ ގުޅޭ ގޮތުން ޚިޔާލު ފާޅު ކުރައްވައިފައެވެ.
މިކަމަށް މީސްމީޑިއާ ބޭނުންކުރާ ގިނަ ބަޔަކު ވަނީ ވަރަށް ބޮޑަށް ތާއީދުކޮށްފައެވެ. ބައެއް ބެލެނިވެރިން ފާހަގަކުރައްވާފައިވާ ގޮތުގައި މިހާރު އިސްލާމް ޓިއުޝަން ނެގުމަށް ގިނަ އަދަދެއްގެ ފައިސާ ހޭދަވާކަމަށްވާއިރު، މިފަދަ ހިލޭ ޚިދުމަތެއް ފެށުމަކީ ވަރަށް ބޮޑު ލުއިފަސޭހައެއް ލިބިގެންދާނެ ކަމެކެވެ. އެހެންކަމުން، މިކަމަކީ ދަރިވަރުންނަށް ދީނީ ތަޢުލީމު ފުޅާކުރުމަށް ލިބިގެންދާނެ ރަނގަޅު ފުރުސަތެއްގެ ގޮތުގައި އާއްމުން ދަނީ ސިފަކުރަމުންނެވެ.
އަދުގެ ސަރުކާރުން ދަނީ ދީނީ ކަންތައްތަކަށް ދިވެހި ޒުވާނުން އަހުލުވެރިކޮށް ހޭލުންތެރިކުރުމަށާއި، އިސްލާމް ދީނަށް ލޯބި ޖެއްސުމަށް ގިނަގުނަ މަސައްކަތްތައް ކުރަމުންނެވެ. އެގޮތުން ޒުވާން ހިތާބުން ތަމްރީނު ކުރުމާއެކު، އިމާމުވެ ނަމާދު ކުރުމާއި، ހުތުބާ ކިޔުން ފަދަ ކަންކަން ދަނީ ކުރަމުންނެވެ. މިސްކިތްތަކުގެ ވަގުތު ބޭނުންކޮށްގެން ދީނީ ތަޢުލީމު އިތުރަށް ފުޅާކުރުމުގެ މި ޚިޔާލަކީ ވެސް ޒުވާނުންގެ ދީނީ އަހުލުވެރިކަން އިތުރުކުރުމަށް ކުރިއަށްގެންދިއުމަށް ރާވާފައިވާ މުހިއްމު މަސައްކަތެއް ކަމަށް ބެލެވެއެވެ.