ނ. މާފަރު އިންޓަރނޭޝަނަލް އެއަރޕޯޓުގެ ތަރައްޤީގެ މުހިއްމު މަސައްކަތްތަކެއް ފަށައި، އެއަރޕޯޓުގެ އޭޕްރަންއަށް އިތުރުކުރި ސަރަޙައްދު ހުޅުވާލައިފިއެވެ. މީގެއިތުރުން، އެއަރޕޯޓުގެ ޓަރމިނަލްގެ ޖާގަ އިތުރު ކުރުމަށްޓަކައި ދެ ފަންގިފިލައިގެ އައު ޢިމާރާތެއް ތަރައްޤީކުރުމުގެ މަޝްރޫޢުގެ ބިންގާވެސް ވަނީ އަޅާފައެވެ. މި އިތުރުކުރުމާއެކު މިހާރު މާފަރު އެއަރޕޯޓުގައި އެއްފަހަރާ 35 އެއަރ ކްރާފްޓު ޕާކު ކުރެވޭނެއެވެ.
މާފަރު އިންޓަރނޭޝަނަލް އެއަރޕޯޓަކީ އައިލެންޑް އޭވިއޭޝަން ސަރވިސް (އައިއޭއެސް) ގެ ދަށުން ޚިދުމަތްދެމުން އަންނަ އެއަރޕޯޓެކެވެ. އެކުންފުނީގެ ބެލުމުގެ ދަށުން އެއަރޕޯޓުގެ ތަރައްޤީއަށް ގިނަ މަސައްކަތްތަކެއް ކުރަމުންދާއިރު، ހޮނިހިރު ދުވަހު ވަނީ މިއަހަރުގެ ފަތުރުވެރިކަމުގެ ހައި ސީޒަނާ ދިމާކޮށް، އޭޕްރަންއަށް އިތުރުކުރި ސަރަޙައްދު ރަސްމީކޮށް ހުޅުވާލާފައެވެ. އައިލެންޑް އެވިއޭޝަނުން ވިދާޅުވީ، އަލަށް ހުޅުވި މިބަޔާއިއެކު އެއަރޕޯޓުގެ ޕާކިންގ ކެޕޭސިޓީ ވަރަށް ބޮޑަށް އިތުރުވެފައިވާ ކަމަށާއި، މިހާރު އެއްފަހަރާ 35 ފްލައިޓު ޕާކު ކުރެވޭނެ ކަމަށެވެ.
އޭޕްރަންގެ ޖާގަ އިތުރުކުރުމުގެ އިތުރުން، މާފަރު އެއަރޕޯޓުގެ ޓަރމިނަލްގައި ދިމާވެފައިވާ ޖާގައިގެ ދަތިކަމަށް ޙައްލެއް ގެނައުމަށްޓަކައި އިތުރު ޓަރމިނަލް ޢިމާރާތެއް ތަރައްޤީ ކުރުމުގެ މަސައްކަތުގެ ބިންގާވެސް ވަނީ އަޅާފައެވެ. ޗައިނާގެ ކުންފުންޏަކާ ޙަވާލުކޮށްގެން ތަރައްޤީ ކުރާ މި ދެ ފަންގިފިލާގެ ޢިމާރާތުގައި ޖުމްލަ 12،000 އަކަފޫޓޫ ހުންނާނެ ކަމަށް އައިއޭއެސްއިން ވިދާޅުވެއެވެ. މި ޢިމާރާތާއެކު އިތުރު ލައުންޖުތަކާއި އޮފީސް ޢިމާރާތްތައް ފުރިހަމަކޮށް، އެއަރޕޯޓުން ދެވޭ ޚިދުމަތްތައް މިހާރަށްވުރެ ފުޅާކުރެވޭނެ ކަމަށް އެކުންފުނިން ބުނެއެވެ.
މިރަސްމިއްޔާތަށްފަހު ޕީއެސްއެމްނިއުސްއަށް މަޢުލޫމާތު ދެއްވަމުން އައިލެންޑް އެވިއޭޝަން ސަރވިސްގެ ޑެޕިއުޓީ މެނޭޖިންގ ޑިރެކްޓަރ ޢަލީ ސަލީމް ވިދާޅުވީ، މިއީ މުޅި ނ.އަތޮޅާއި ރާއްޖޭގެ އިޤްތިޞާދަށް އޭގެ މަންފާ ކުރާނެ މަޝްރޫއެއް ކަމަށެވެ. ޢަލީ ސަލީމް އިތުރަށް ވިދާޅުވީ، އެއަރޕޯޓުގެ ރަންވޭއަކީ ބޮޑެތި ބޯޓުތައް ޖެއްސޭ ފެންވަރުގެ ރަންވޭއެއް ކަމަށްވާއިރު، ޚިދުމަތް ފުޅާކުރުމަށް ޓަރމިނަލް ބޮޑުކުރުން މުހިއްމު ކަމަށެވެ. “މިއަދު އަޅުގަނޑުމެން މިހުޅުވާލި އައު އޭޕްރަން، މިއާއެކު އެއްފަހަރާ 35 އެއަރކްރާފްޓަށް މިތަނުގައި ޕާކު ކުރެވޭނެ. ދެން މިއަންނަނީ، ޓަރމިނަލްގެ އައު ޢިމާރާތް، މިހާރު އެންމެ ބޮޑެތި ބޯޓުތައް ޖެއްސޭ ފެންވަރުގެ ރަންވޭއެއް އޮންނައިރު ޚިދުމަތް ފުޅާކުރުމަށް ޓަރމިނަލް ބޮޑުކުރަންޖެހޭ.” ސަލީމް ވިދާޅުވިއެވެ.
މާފަރު އިންޓަރނޭޝަނަލް އެއަރޕޯޓުގެ އައު ޓަރމިނަލްގެ މަސައްކަތް ކުރިއަށް އޮތް 10 މަސް ދުވަހުގެ ތެރޭގައި ނިންމުމަށް ވަނީ ކަނޑައަޅާފައެވެ. މާފަރު އިންޓަރނޭޝަނަލް އެއަރޕޯޓަކީ، ރާއްޖޭގައި ދެވަނައަށް އެންމެ ގިނައިން ބައިނަލްއަޤުވާމީ އެއަރލައިންތަކަށް ޚިދުމަތްދެމުން ދާ އެއަރޕޯޓުކަން ފާހަގަކޮށްލެވެއެވެ.