މިއަހަރުގެ ފުރަތަމަ 10 މަސްދުވަހުގެ ތެރޭގައި އޮތެންޓިކް މޯލްޑިވްސް ބްރޭންޑުގެ ދަށުން ވިއްކާފައިވާ ދިވެހި އުފެއްދުންތަކުގެ ޖުމްލަ އަގު 3 މިލިޔަން ރުފިޔާއަށް އަރައިފި އެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު %7 އިތުރު އަދަދެކެވެ. މި ކާމިޔާބީއާއެކު، އޮތެންޓިކް މޯލްޑިވްސް ބްރޭންޑުގެ ދަށުން 35 ފަރާތެއްގެ އުފެއްދުންތައް ވަނީ ވިއްކާފައެވެ. މި ވިޔަފާރިތަކުގައި ހަރަކާތްތެރިވާ ފަރާތްތަކުގެ 69 އިންސައްތައަކީ އަންހެނުންނަށް ޚާއްސަ ވިޔަފާރިތައްކަން ފާހަގަކޮށްލެވެއެވެ.
އޮތެންޓިކް މޯލްޑިވްސްއަކީ ކުދި އަދި މެދުފަންތީގެ ވިޔަފާރިތަކަށް (އެސްއެމްއީސް) އެމީހުންގެ އުފެއްދުންތައް ދުނިޔޭގެ މާކެޓަށް ނެރުމަށް މަގުފަހިކޮށްދޭ މުހިންމު ޕްލެޓްފޯމެކެވެ. މި ބްރޭންޑުގެ ފިހާރަތައް ރާއްޖޭގައި ވެލާނާ އިންޓަރނޭޝަނަލް އެއަރޕޯޓާއި، ގަން އިންޓްނޭޝަނަލް އެއަރޕޯޓާއި، ތޮއްޑޫގެ އިތުރުން ވިލާ ނޯޓިކާގައި ހިންގަމުންދާއިރު، ރާއްޖެއިން ބޭރުން ޖަޕާނުގެ ކަންސައި ނަރީތާ އިންޓަރނޭޝަނަލް އެއަރޕޯޓާއި ވޯލްޑް ބޭންކް މައި އޮފީހުގައި ވެސް އޮތެންޓިކް މޯލްޑިވްސްގެ ފިހާރަތައް ދަނީ ހިންގަމުންނެވެ. މީގެ އިތުރުން، އެސްއެމްއީ ވިޔަފާރިވެރިންނަށް އެމީހުންގެ އުފެއްދުންތައް ރާއްޖެއިން ބޭރުގެ މާކެޓްތަކުގައި ވިއްކޭނެ މަގު ފަހިކޮށްދިނުމަށް އޮތެންޓިކް މޯލްޑިވްސްއިން ވަނީ ބައިނަލްއަޤްވާމީ އޮންލައިން ވިޔަފާރި ޕްލެޓްފޯމް އަލިބާބާގައި އޮންލައިން ފިހާރައެއް ހުޅުވާފައެވެ.
އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު މިކަމާ ގުޅޭގޮތުން ވިދާޅުވީ، “މި މަސައްކަތަކީ ދިވެހި ވިޔަފާރިތަކަށް ފުރުޞަތުތައް ފުޅާކުރުމަށާއި، ވިޔަފާރިވެރިން ބާރުވެރިކުރުމަށާއި، ދުނިޔޭގެ އެކި ކަންކޮޅުތަކުގައި ދިވެހި އަސްލު އުފެއްދުންތައް އިސްތިހާރުކުރުމަށް ލިބުނު މުހިންމު ކާމިޔާބީއެއް” ކަމަށެވެ. އަދި މިކަމަކީ ރާއްޖެ-ޗައިނާ މިނިވަން ވިޔަފާރީގެ އެއްބަސްވުމުގެ ސަބަބުން ލިބޭ ފައިދާތަކުގެ ރަނގަޅު މިސާލެއްކަމަށް ވެސް ވަޒީރު ވަނީ ފާހަގަކުރައްވާފައެވެ.
އެސްއެމްއީތަކަށް އެހީތެރިވުމުގެ ގޮތުން އިޤްތިޞާދީ ވުޒާރާއިން ވަނީ ކުދި އަދި މެދުފަންތީގެ ވިޔަފާރީގެ ހުރިހާ ޚިދުމަތެއް އެއް ޕްލެޓްފޯމަކުން ފޯރުކޮށްދޭން “ކުމެވި” ޕޯޓަލް ތަޢާރަފްކޮށްފައެވެ. މި ޕޯޓަލްގައި މިހާތަނަށް 1021 ފަރާތެއް ވަނީ ރަޖިސްޓްރީވެފައެވެ. ސަރުކާރުން ދަނީ ފަންނުވެރި ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ގިނަ މަސައްކަތްތައް ކުރަމުންނެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ފަންނުވެރިކަމުގެ އިޤްތިޞާދު ޤައުމުގެ ޖީޑީޕީގެ 15 އިންސައްތަ ހިއްސާކުރާނޭ ސިނާޢަތަކަށް ހެދުމަށް މަސައްކަތް ކުރައްވާނެކަމަށް ވިދާޅުވެފައެވެ. މި މަޤްޞަދުތައް ހާސިލްކުރުމަށްޓަކައި، ޤައުމީ އުފެއްދުތެރިކަމުގެ މަޢުރަޒުގެ ނަމުގައި މިހާތަނަށް ބޭއްވި އެންމެ ބޮޑު މަޢުރަޒު މި އަހަރު ވަނީ ބާއްވާފައެވެ.