ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ހުޅުމާލޭގެ ފުރަތަމަ އަދި ދެވަނަ ފިޔަވަހިން ދޫކޮށްފައިވާ ގޯތިތަކުގައި 10 ފަންގިފިލާއަށް އިމާރާތް ކުރުމުގެ ހުއްދަ ދެއްވާނެ ކަމަށް މިރޭ ވިދާޅުވެއްޖެއެވެ. ރައީސް މިކަން ހާމަކުރެއްވީ ރައްޔިތުންނާއި ގާތުން ބައްދަލުކުރެއްވުމަށް ފަށާފައިވާ ސިލްސިލާ ބައްދަލުކުރުންތަކުގެ ތެރެއިން ހުޅުމާލޭ ފުރަތަމަ ފިޔަވަހީގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސް ވިދާޅުވީ، ގޯތި އިމާރާތް ކުރެވޭ އުސްމިނަކީ އެތަނުގެ ލޭންޑް ޔޫސް ޕްލޭނާއި، ފެނާއި ނަރުދަމާ ފަދަ އިންފްރާސްޓްރަކްޗާއާއި ގުޅިފައިވާ ކަމެއް ކަމަށެވެ. އެހެންނަމަވެސް، ތަނެއް އާބާދުވެ، ލޭންޑް ޔޫސްއަށް ނުވަތަ ސަރުކާރުގެ ސިޔާސަތަށް ބަދަލު އަންނައިރު، އެ ސިޔާސަތާ އެއްގޮތަށް އިންފްރާސްޓްރަކްޗާ ވެސް ބަދަލުކުރުމަކީ ސަރުކާރުން ކުރަންޖެހޭ ކަމެއް ކަމަށް އެމަނިކުފާނު ފާހަގަކުރެއްވިއެވެ.
މިކަމަށް ސަރުކާރުން ކުރަންޖެހޭ އިންވެސްޓްމަންޓް ވެސް ހިމެނޭ ގޮތަށް، އެމަނިކުފާނު ވައުދުވެވަޑައިގެންނެވި ގޮތަށް ހުޅުމާލޭގެ ދެ ފިޔަވަހީގައި ދޫކޮށްފައިވާ ގޯތިތަކުގައި އިމާރާތް ކުރެވޭ އުސްމިން 10 ބުރިއަށް ބަދަލުކޮށްދެއްވާނެ ކަމަށް ރައީސް ޔަގީންކަން ދެއްވިއެވެ. ރައީސް ވިދާޅުވީ ދެ ފިޔަވަހީގައި ވެސް އިމާރާތް ކުރެވޭނެ އުސްމިން އޮންނަނީ އެއް އުސްމިނަކަށް ކަމަށާއި، ޤަވާއިދު ބަދަލުކުރުމުގެ މަސައްކަތް ކުރިއަށްދާނެ ކަމަށެވެ.
އިމާރާތްކުރެވޭ އުސްމިން 10 ބުރިއަށް ބަދަލުކުރެއްވުމާއެކު، ޕާކިންގެ މައްސަލައަށް ހައްލެއް ހޯދުމަށްޓަކައި ބައެއް ޝަރުތުތައް ފުރިހަމަ ކުރަން ޖެހޭނެ ކަމަށް ރައީސް ވިދާޅުވިއެވެ. އެގޮތުން 10 ބުރީގެ އިމާރާތެއްގައި ގްރައުންޑް ފްލޯރ އަކީ ޕާކިން ޒޯނެއްގެ ގޮތުގައި ހެދުން މަޖުބޫރުވާނެއެވެ. އަދި ދިރިއުޅުމަށް ނޫން، އާމްދަނީ ހޯދޭނެ ކޮމާޝަލް ނުވަތަ އެހެން ބޭނުމަކަށް އިތުރު އެއް ފަންގިފިލާ ކަނޑައަޅަން ޖެހޭނެއެވެ.
ރައީސް ވިދާޅުވީ މި ބަދަލާއެކު ލިބޭ ޖާގަ ބޭނުންކުރެވޭނެ ގޮތުގެ ތަފްސީލު ދެއްވަމުން ވިދާޅުވީ، 4 ފްލޯރ ލިބޭއިރު އޭގެ ތެރެއިން ގްރައުންޑް ފްލޯރ ޕާކިންއަށް، ދެން އިތުރު އެއްފްލޯ އާމްދަނީ ހޯދުމަށް އަދި ދެ ފްލޯރ ރެސިޑެންޝަލް ބޭނުމަށް ބޭނުން ކުރެވިދާނެ ކަމަށެވެ.
“2 ފުލޯރ ގޭގައި ދިރިއުޅުމަށް ނޫނީ އެހެން ފަރާތަކަށް ކުއްޔައް ދެވިދާނެ. 4 ފްލޯރ ލިބޭއިރުގައި އޭގެ ތެރެއިން ގްރައުންޑް ފްލޯރ ކަނޑައަޅަން ޖެހޭނީ އޭގެގެ ބޭނުމަށް ޕާކިންއަށް ދެން އިތުރު އެއްފްލޯ އާމްދަނީ ހޯދުމަށް ދެން ދެ ފްލޯރ ރެސިޑެންޝަލް ބޭނުމަށް ބޭނުން ކުރެވިދާނެ. 10 ބުރިއަށް ނެގޭ ގޮތައް ޤަވައިދައް ބަދަލުގެނެސް ދެ ފޭސްގޭ ފަރާއްތަކަށް އެކަން ކޮށްދޭނަން” ރައީސް ވިދާޅުވިއެވެ.