އަންނަ އަހަރު ބާއްވާ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީ އިންތިޚާބާ ގުޅިގެން، އިލެކްޝަންސް ކޮމިޝަނުން (އީސީ) ވަނީ ސިޓީ ކައުންސިލްތަކުގައި އަންހެނުންނަށް ޚާއްސަ ގޮނޑިތައް ކަނޑައަޅާފައިވާ ދާއިރާތަކުގެ ތަފްސީލު އާންމުކޮށްފިއެވެ. މި އިންތިޚާބު އަންނަ އަހަރުގެ އޭޕްރީލް މަހު ބޭއްވުމަށް ވަނީ ހަމަޖެހިފައެވެ.
އިލެކްޝަންސް ކޮމިޝަނުން މި ދާއިރާތަކުގެ ރިޕޯޓް މި މަހުގެ 9ވަނަ ދުވަހު އާންމުކޮށް ޝަކުވާ ހުށަހެޅުމުގެ ފުރުސަތު ހުޅުވާލިއެވެ. އެ ކޮމިޝަނުން ވިދާޅުވީ، ހުޅުވާލި ފުރުސަތުގައި ހުށަހެޅި ޝަކުވާތަކުގެ ސަބަބުން ރިޕޯޓަށް ބޮޑެތި ބަދަލުތަކެއް ގެންނަން ޖެހިފައިނުވާ ކަމަށެވެ. މި އިންތިޚާބީ ދާއިރާ ކަނޑައެޅުމާބެހޭ ދާއިމީ ރިޕޯޓުގައިވާގޮތުން، އަންނަ އަހަރުގެ އިންތިޚާބުގައި ރަށު ކައުންސިލްތަކަށް 629 ކައުންސިލަރުންނާއި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރެވޭނެއެވެ.
ރަށު ކައުންސިލްތަކުގެ ތެރެއިން 133 ރަށަކަށް ކައުންސިލް ރައީސާއި އަންހެން މެންބަރު ހިމެނޭހެން 3 ކައުންސިލަރުން އިންތިޚާބު ކުރަންޖެހޭއިރު، 46 ރަށަކަށް ކައުންސިލް ރައީސާއި 2 އަންހެން ކައުންސިލަރުން ހިމެނޭހެން 5 ކައުންސިލަރުން އިންތިޚާބު ކުރަންޖެހެއެވެ. މީގެ އިތުރުން، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަށް މެންބަރުން އިންތިޚާބު ކުރަންޖެހޭނީ ރަށާއި ސިޓީ ކައުންސިލަށް އިންތިޚާބު ކުރާ އަދަދަށެވެ.
އޭޕްރީލް މަހު ބާއްވާ މި އިންތިޚާބުގައި ސިޓީ ކައުންސިލްތަކުގައި އިންތިޚާބު ކުރާ ކައުންސިލަރުންގެ އަދަދު ތަފާތުވާނެއެވެ. އެގޮތުން، ކުޅުދުއްފުށި ސިޓީއަށް މޭޔަރު ހިމެނޭހެން 7 ކައުންސިލަރުން، ތިނަދޫ ސިޓީއަށް 7 ކައުންސިލަރުން، ފުވައްމުލައް ސިޓީއަށް 9 ކައުންސިލަރުން، އައްޑޫ ސިޓީއަށް 11 ކައުންސިލަރުން އަދި މާލެ ސިޓީއަށް 18 ކައުންސިލަރުން އިންތިޚާބު ކުރަންޖެހޭނެއެވެ. ސިޓީތަކުގައި އަންހެނުންނަށް ޚާއްސަ ގޮނޑިތައް ކަނޑައަޅާފައިވަނީ ދާއިރާތައް ކްލަސްޓަރއަށް ބަހާލައިގެން، އެ ކްލަސްޓަރތަކުގެ މެދުގައި އެޕްލިކޭޝަނެއްގެ ޒަރީއާއިން އެއް ދާއިރާ ޖެނަރޭޓްކޮށްގެންނެވެ.
ސިޓީ ކައުންސިލްތަކުގައި އަންހެނުންނަށް ޚާއްސަ ގޮނޑިތައް ކަނޑައަޅާފައިވާ ދާއިރާތައް
އިލެކްޝަންސް ކޮމިޝަނުން އާންމުކުރި ތަފްސީލުތަކަށް ބަލާއިރު، ސިޓީ ކައުންސިލްތަކުގައި އަންހެނުންނަށް ޚާއްސަ ގޮނޑި ކަނޑައަޅާފައިވާ ކްލަސްޓަރތައް ތިރީގައި މިވަނީއެވެ:
- ކުޅުދުއްފުށި ސިޓީ ކައުންސިލް:
- ކްލަސްޓަރ 1: ކުޅުދުއްފުށި ސިޓީ މެދު އުތުރު ދާއިރާ
- ކްލަސްޓަރ 2: ކުޅުދުއްފުށި ސިޓީ އިރު ދެކުނު ދާއިރާ
- ތިނަދޫ ސިޓީ ކައުންސިލް:
- ކްލަސްޓަރ 1: ތިނަދޫ ސިޓީ އިރު އުތުރު ދާއިރާ
- ކްލަސްޓަރ 2: ތިނަދޫ ސިޓީ ހުޅަނގު ދެކުނު ދާއިރާ
- ފުވައްމުލައް ސިޓީ ކައުންސިލް:
- ކްލަސްޓަރ 1: ދަނޑިމަގު ދާއިރާ
- ކްލަސްޓަރ 2: މާލެގަން ދާއިރާ
- ކްލަސްޓަރ 3: ދޫޑިގަން ދާއިރާ
- އައްޑޫ ސިޓީ ކައުންސިލް:
- ކްލަސްޓަރ 1: ހިތަދޫ މާމެންދޫ ދާއިރާ އާއި ހިތަދޫ ބޭރުމަތި ދާއިރާ
- ކްލަސްޓަރ 2: މަރަދޫ ދާއިރާ އާއި ފޭދޫ މަގުއްދޫ ދާއިރާ
- މާލެ ސިޓީ ކައުންސިލް:
- ކްލަސްޓަރ 1: ހުޅުމާލެ އުތުރު ދާއިރާ
- ކްލަސްޓަރ 2: ހެންވޭރު އުތުރު ދާއިރާ
- ކްލަސްޓަރ 3: ގަލޮޅު އުތުރު ދާއިރާ
- ކްލަސްޓަރ 4: މައްޗަންގޮޅި މެދު ދާއިރާ
- ކްލަސްޓަރ 5: މާފަންނު މެދު ދާއިރާ
- ކްލަސްޓަރ 6: ހެންވޭރު ދެކުނު ދާއިރާ
ލޯކަލް ކައުންސިލް އިންތިޚާބުގައި ކައުންސިލް ރައީސުންނާއި މޭޔަރުން އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ރައީސުން އިންތިޚާބު ކުރާނީ ވަކިން ކުރިމަތިލައިގެން އެ ރަށެއްގެ ނުވަތަ ސިޓީއެއްގެ ހުރިހާ ރައްޔިތުންގެ މެދުގައި ނަގާ ވޯޓަކުންނެވެ.