ރިއަށް އޮތް ފަސް ދުވަހު ވެސް ރާއްޖޭގެ ސަރަހައްދުތަކުގައި ދުންފުނީގެ އަސަރު ހުންނާނެ ކަމަށް ބެލެވޭ ކަމަށް މޫސުމާ ބެހޭ ގައުމީ އިދާރާ (މެޓް) އިން މިއަދު ހާމަކޮށްފިއެވެ. އިރުވައި މޫސުން ފެށުމާއެކު ރާއްޖޭގެ އެކި ސަރަހައްދުތަކަށް، ޚާއްޞަކޮށް މެދު ރާއްޖެތެރޭގެ އަތޮޅުތަކަށް މިހާރު ވަނީ ދުންފުނީގެ އަސަރު ކުރަން ފަށާފައެވެ.
މެޓް އޮފީހުން މައުލޫމާތު ދޭ ގޮތުގައި ވޭތުވެދިޔަ ހަތް ދުވަހުގެ ތެރޭގައި ދުންފުނީގެ އަސަރު އެންމެ ބޮޑަށް ކޮށްފައިވަނީ މިއަދުއެވެ. މީގެ ސަބަބުން ދުރު ފެންނަ މިންވަރު ވަނީ ވަރަށް ބޮޑަށް ދަށްވެފައެވެ. މޫސުމާ ބެހޭ ރިޕޯޓްތަކުން ދައްކާ ގޮތުގައި ބައެއް ސަރަހައްދުތަކުގައި ދުރު ފެންނަ މިންވަރު މިހާރު ހުރީ 2 ކިލޯމީޓަރަށް ވުރެ ވެސް ދަށްކޮށެވެ.
މޫސުމާ ބެހޭ އިދާރާއިން ވިދާޅުވީ، “ދުންފުހުގެ ސަބަބުން އުތުރާއި މެދުރާއްޖެތެރޭގައި ވައި ނުސާފުވެ ހަމަ ލޮލަށް ސާފުކޮށް ފެންނަ ދުރުމިން މިވަނީ ދަށްވެފައި. ކުރިއަށް އޮތް ހަފްތާގެ ތެރޭގައި ވެސް ދުންފުހުގެ އަސަރު މި ސަރަހައްދުތަކަށް ކުރާނެ ކަމަށް ބެލެވޭ” ކަމަށެވެ.
އެޗްޕީއޭގެ ޑެޕިއުޓީ ޑިރެކްޓަރ ޖެނެރަލް އޮފް ޕަބްލިކް ހެލްތު އިބްރާހީމް އަޝްރަފް ވިދާޅުވީ، މި ހާލަތުގައި ނާޒުކު ސިއްޙީ ހާލަތްތަކުގައި ތިބޭ ފަރާތްތަކުން ބޭރަށް ނިކުމެ އުޅުމުގައި ވަރަށް ބޮޑަށް ސަމާލުވާން ޖެހޭނެ ކަމަށެވެ. ޚާއްޞަކޮށް ބޭރުގައި ކަސްރަތު ކުރުމާއި ކުޅިވަރު ކުޅުން ފަދަ ކަންކަން މި ދުވަސްވަރު މަޑުޖައްސާލުމަށް އޭނާ އިރުޝާދު ދެއްވިއެވެ.
އަޝްރަފް އިތުރަށް ވިދާޅުވީ: “އެފަދަ ފަރާތްތައް ބޭރަށް ނިކުންނަ ނަމަ އެން 95 މާސްކު ބޭނުން ކުރުން މުހިންމު. އަދި ބޭރުގެ ވައި ނުސާފު ނަމަ ގެއަށް އޭގެ އަސަރު ނުކުރާނެހެން ގޭގެ ދޮރުތައް ލައްޕާފައި ބެހެއްޓުމާއި، އެއަރ ޕިއުރިފަޔަރ އެއް ފަދަ އެއްޗެއް ބޭނުން ކުރުން ރަނގަޅުވާނެ.”
ނޭވާލާ ނިޒާމުގެ މައްސަލަތައް ހުންނަ ފަރާތްތަކުން ބޭރުގައި އުޅުމުން ދުރުހެލިވުމަކީ ކޮންމެހެން ބޭނުންތެރި ކަމެކެވެ.
ރާއްޖޭގެ ވައި މިދުވަސްވަރު ނުސާފުވެފައިވަނީ އިރުވައި މޫސުމުގެ ވައިގެ ބާރުމިނާއެކު، އިންޑިއާ އަދި ހިމާލިޔާ ސަރަހައްދުން އަންނަ ދުމުގެ އަސަރު ރާއްޖެއަށް ކުރަމުންދާތީ ކަމަށް މައުލޫމާތު ލިބެއެވެ.
ކުރިއަށް އޮތް ފަސް ދުވަހު ވެސް އިރުއުތުރުން ޖެހޭ ވަޔާއެކު ރާއްޖެއަށް ދުންފުނީގެ އަސަރު ކުރާނެތީ، ބޭރުގައި އެކި ހަރަކާތްތަކުގައި އުޅޭ ފަރާތްތަކާއި ކަނޑުދަތުރު ކުރާ ފަރާތްތަކުން މިކަމަށް ޚާއްޞަ ސަމާލުކަމެއް ދިނުމަށް މެޓް އޮފީހުން ވަނީ އިލްތިމާސްކޮށްފައެވެ.