މާލެ ސަރަހައްދުގައި ވައްކަން ކުރުމުގައި ތަކުރާރުކޮށް ކުށްކުރާ 1000 އެއްހާ މީހުން އުޅޭ ކަމަށް ލަފާކުރެވޭ ކަމަށް ދިވެހި ފުލުހުންގެ ޚިދުމަތުން ހާމަކުރައްވައިފިއެވެ. މިކަން ހާމަކުރެއްވީ މާލެ ފުލުހުންގެ ޚިދުމަތާ ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގައި ސުޕްރިންޓެންޑެންޓް އޮފް ޕޮލިސް ޢަބްދުﷲ ރަޝީދެވެ.
ސުޕްރިންޓެންޑެންޓް ޢަބްދުﷲ ރަޝީދު ވިދާޅުވީ، މިއަހަރުގެ މިހާތަނަށް 3،449 މައްސަލައެއް ފުލުހުންނަށް ރިޕޯޓްކޮށްފައިވާއިރު، އޭގެ ތެރޭގައި އެންމެ ގިނައީ ވައްކަމާއި ފޭރުމުގެ މައްސަލަތައް ކަމަށެވެ. އެގޮތުން ވައްކަމާއި ފޭރުމުގެ 1،425 މައްސަލަ ހުށަހަޅާފައިވާއިރު، މީގެ ތެރޭގައި ސައިކަލު ވަގަށް ނެގުމުގެ މައްސަލަތައް ވަރަށް ގިނަކަން އޭނާ ފާހަގަކުރެއްވިއެވެ. ތަފާސްހިސާބުތަކުން ދައްކާގޮތުގައި މިއަހަރު 967 ސައިކަލު ވަގަށް ނެގި ކަމަށް ރިޕޯޓްކޮށްފައިވާއިރު، އޭގެ ތެރެއިން 865 ސައިކަލު ހޯދައި ވެރިފަރާތްތަކާ ވަނީ ހަވާލުކުރެވިފައެވެ.
ތަކުރާރުކޮށް ކުށްކުރާ މީހުންނާ ގުޅޭގޮތުން ވާހަކަދައްކަވަމުން ޢަބްދުﷲ ރަޝީދު ވިދާޅުވީ، މިފަދަ ކުށްވެރިންގެ ތެރޭގައި 128 ފަހަރު ހައްޔަރުކޮށްފައިވާ މީހުންވެސް ހިމެނޭ ކަމަށެވެ. އަދި މި މައްސަލަ ހައްލުކުރުމަށްޓަކައި ޚާއްސަ މަސައްކަތްތަކެއް މިހާރު ފަށާފައިވާ ކަމަށް އޭނާ ވިދާޅުވިއެވެ. މީގެ އިތުރުން، ވައްކަމާއި ފޭރުމުގެ މައްސަލަތަކުގައި މިއަހަރުގެ ތެރޭގައި 50،483،610 ރުފިޔާ އަނބުރާ ހޯދާފައިވާ ކަމަށްވެސް ފުލުހުން ހާމަކުރެއްވިއެވެ.
“ޕްރޮސެކިއުޓަރ ޖެނެރަލްގެ އޮފީީހާއި ކްރިމިނަލް ކޯޓާއި އަދި އަޅުގަނޑުމެންނާ ގުޅިގެން މިދިޔަ މަހުން ފެށިގެން މިއުޅެނީ ފަށައިގެން ރިޕީޓް އޮފެންޑާސްތަކުގެ ތެރެއިން އެންމެ ގިނައިން ކުށްތަކުގައި އުޅޭ ފަރާތްތަކުގެ ލިސްޓެއް ނަގައިގެން، އަޅުގަނޑުމެން ތިން ފަރާތް އިށީނދެގެން މީގެ ތެރޭގައި މުޖުތަމައުން އެކަހެރިކުރުމަށް ހުކުމް ކުރަންޖެހޭ މީހުންނަށް ވީހާވެސް އަވަހަށް ހުކުމް ކުރުމަށް މަސައްކަތް ފަށައިގެން މިއުޅެނީ. މީގެ ނަތީޖާ ހައެއްކަ މަހުން ފެންނާނެ،” ޢަބްދުﷲ ރަޝީދު ވިދާޅުވިއެވެ.
ފުލުހުން އިތުރަށް ފާހަގަކުރެއްވި ގޮތުގައި، ތަކުރާރުކޮށް ވައްކަން ކުރުމުގައި ހަރަކާތްތެރިވާ މީހުންގެ ތެރޭގައި ގިނައީ މަސްތުވާތަކެތި ބޭނުންކުރާ މީހުންނެވެ. މި މައްސަލަތައް ހައްލުކުރުމަށް ކުރެވޭ މަސައްކަތުގެ ދަށުން، މިއަހަރުގެ ތެރޭގައި ވައްކަމާއި ފޭރުމުގެ 2،288 މައްސަލައެއް ބަލައި، ޖުމްލަ 2،542 މައްސަލައެއްގެ މަސައްކަތް ވަނީ ނިންމާފައެވެ. އަދި 107 މައްސަލައެއްގައި ދައުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހަށް ވަނީ ފޮނުވާފައެވެ.