ފަރުމަސް އާލާކުރުމުގެ ހުނަރު ތަރައްޤީކޮށް، މި ދާއިރާއިން ފަންނީ މީހުން އުފެއްދުމަށް ހިންގާ “މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމް” ގައި ބައިވެރިވުމުގެ ފުރުޞަތު މޯލްޑިވްސް މެރިން ރިސާރޗް އިންސްޓިޓިއުޓް (އެމްއެމްއާރްއައި) އިން ހުޅުވާލައިފިއެވެ. މި ޕްރޮގްރާމުގައި ބައިވެރިވުމަށް އެދި ފޯމު ހުށަހެޅުމުގެ ސުންގަޑިއަކީ އަންނަ ޖަނަވަރީ މަހުގެ 11 ވަނަ ދުވަހެވެ.
މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މަޢުލޫމާތު ދެއްވާ ގޮތުގައި، މި ތަމްރީނު ޕްރޮގްރާމް ކުރިއަށްދާނީ ޖަނަވަރީ މަހުގެ 24 އިން ފެބްރުވަރީ މަހުގެ 5 ވަނަ ދުވަހުގެ ނިޔަލަށް ކ. މަނިޔަފުށީގައެވެ. މި ޕްރޮގްރާމުގައި ބައިވެރިވުމުގެ ފުރުޞަތު 15 މީހުންނަށް ދިނުމަށް ހަމަޖެހިފައިވާއިރު، ބައިވެރިން ހޮވުމުގައި އިސްކަންދޭނީ ފޯމު ހުށަހަޅާ ތަރުތީބުންނެވެ.
މި ޕްރޮގްރާމަކީ މެރިކަލްޗަރގެ ދާއިރާގެ ތަފާތު ބައިތައް ހިމަނައިގެން ފަރުމާކޮށްފައިވާ ޕްރޮގްރާމެކެވެ. މީގެ ތެރޭގައި އެކުއަކަލްޗަރގެ ނިޒާމުތަކާއި، ދިރޭ ކާނާ އާލާކުރުމާއި، މަހުގެ ބަޔޮލޮޖީގެ އިތުރުން ފާނަ، ހުއިފިލަނޑާ، ދިވެހި މާގަނޑު މަސް، އިތާމުތް އަދި މޫދުވިނަ އާލާކުރުމުގެ ފިލާވަޅުތައް ހިމެނެއެވެ. މީގެ އިތުރުން އާލާކުރާ ދިރުންތަކަށް ޖެހޭ ބަލިތަކުން ރައްކާތެރިވުމާއި ތިމާވެށި ރައްކާތެރިކުރުމާ ގުޅޭ މަޢުލޫމާތުވެސް ދަސްކޮށްދެވޭނެއެވެ.
މަސްވެރިކަމާ ބެހޭ ވުޒާރާއިން ވިދާޅުވީ، މިއީ ރާއްޖޭގެ އިޤްތިޞާދު ސިންދަފާތުކޮށް، މެރިކަލްޗަރގެ ދާއިރާއަށް ޒުވާނުން އަހުލުވެރިކުރުވުމަށް ސަރުކާރުން ކުރަމުންދާ މަސައްކަތުގެ މުހިންމު ބައެއް ކަމަށެވެ. މިހާތަނަށް މިފަދަ 4 ޕްރޮގްރާމެއް ހިންގައި ޖުމްލަ 53 މީހުން ވަނީ ތަމްރީނުކޮށްފައެވެ.
މި ޕްރޮގްރާމުގައި ބައިވެރިވުމަށް ޝައުޤުވެރިވާ ފަރާތްތަކުން ޖަނަވަރީ 11 ވާ ބުރާސްފަތި ދުވަހުގެ މެންދުރު 14:00 ގެ ކުރިން، ފުރިހަމަކޮށްފައިވާ ފޯމާއި އައިޑީކާޑުގެ ކޮޕީ އެމްއެމްއާރްއައި އަށް ހުށަހެޅުމަށް އެ ވުޒާރާއިން އިލްތިމާސްކުރެއެވެ.