ރާއްޖޭގެ ހުރިހާ އަތޮޅެއްގައި ޔުނިވާސިޓީ ކެމްޕަސްތައް ޤާއިމުކޮށް، ކޮންމެ އަތޮޅެއްގައި ވެސް މަތީ ތަޢުލީމަށް ފުރުސަތު ފަހިކުރުމަށް މަސައްކަތް ފަށާފައިވާ ކަމަށާއި، އަންނަ އަހަރުގެ ނިޔަލަށް އެ މަޝްރޫޢުގެ މަސައްކަތް މުޅިން ނިންމާލެވި ކެމްޕަސްތައް ހުޅުވޭނެ ކަމަށް ބެލެވޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެއެވެ.
“ނޭޝަނަލް ޔޫތު ކޮންފަރެންސް 2025” ގެ ތެރެއިން ބޭއްވި “ޔޫތު ކޮފީ ވިތު ޕްރެޒިޑެންޓް” ހަރަކާތުގައި ވާހަކަފުޅު ދައްކަވަމުން ރައީސް ވިދާޅުވީ، ޒުވާނުންގެ ފަރާތުން އިވުނު ކަންބޮޑުވުންތަކަށް ޙައްލު ހޯއްދެވުމަށް ސަރުކާރުން މަސައްކަތް ކުރައްވާނެ ކަމަށެވެ. ވަކިން ހާއްސަކޮށް، ހުރިހާ އަތޮޅެއްގައި ޔުނިވާސިޓީ ތައުލީމުގެ ފުރުސަތު ނެތް ކަން ޒުވާނުން ފާހަގަކުރުމާ ގުޅިގެން ރައީސް ވިދާޅުވީ ކޮންމެ އަތޮޅެއްގައި ހަޔާ އެޑިއުކޭޝަން ކެމްޕަހެއް ހުރުމަކީ އެމަނިކުފާނުގެ ސިޔާސަތެއް ކަމަށެވެ.
ކޮންމެ އަތޮޅެއްގައި ޤައުމީ ނުވަތަ އިސްލާމިކް ޔުނިވާސިޓީގެ ކެމްޕަހެއް
ރައީސް ވިދާޅުވި ގޮތުގައި ކޮންމެ އަތޮޅެއްގައި ދިވެހިރާއްޖޭގެ ޤައުމީ ޔުނިވާސިޓީ ނުވަތަ އިސްލާމިކް ޔުނިވާސިޓީގެ ކެމްޕަހެއް ޤާއިމުކުރުމުގެ މަސައްކަތް މިހާރު ވަނީ ފައްޓަވާފައެވެ. އަދި މި މަސައްކަތްތައް މިހާރު އެކި ފަރާތްތަކާ ހަވާލުކޮށްފައިވާ ކަމަށްވެސް އެމަނިކުފާނު ފާހަގަކުރެއްވިއެވެ.
މީގެ އިތުރުން، ބައެއް އަތޮޅުތަކުގައި ދެ ޔުނިވާސިޓީގެ ކެމްޕަސްތައް ވެސް ޤާއިމުކުރާނެ ކަމަށާއި، ދަރިވަރުން ތިބުމަށް ބޭނުންވާ ދަނާލުތައް ވެސް ހުރިހާ އަތޮޅެއްގައި ބިނާކުރައްވާނެ ކަމަށް ރައީސް ވިދާޅުވިއެވެ. ރައީސް ލަފާކުރައްވާ ގޮތުގައި މިހާރު ފަށާފައިވާ މި މަސައްކަތްތައް އަންނަ އަހަރުގެ ނިޔަލަށް މުޅިން ނިންމާލެވޭނެއެވެ.
“މި އަހަރު ނިމެންވާއިރު އިމާރާތްތައް ނިމި މި ތަންތަން ހުޅުވޭވަރުވާނެ ކަމަށް އަޅުގަނޑަށް ބެލެވޭ. އެހެންވީމަ ބޮޑު މައްސަލައަށް ވަރަށް ބޮޑު ޙައްލެއް މި އަންނަނީ” ރައީސް ވިދާޅުވިއެވެ.
މަތީ ތަޢުލީމުގެ އިތުރުން، ވޮކޭޝަނަލް ޓްރެއިނިންގް ނުވަތަ މަސައްކަތްތެރިކަމުގެ ތަމްރީނަކީ ވެސް ސަރުކާރުން ވަރަށް ބޮޑު އިސްކަމެއް ދޭ ދާއިރާއެއް ކަމަށް ރައީސް ވިދާޅުވިއެވެ. އެގޮތުން މިހާރުވެސް ޓިވެޓް (TVET) ޕްރޮގްރާމްތައް ފުޅާކޮށް، ޒުވާނުންނަށް ބޭނުންވާ ފަންނީ ތަމްރީނުތައް ފޯރުކޮށްދިނުމަށް ގިނަ މަސައްކަތްތަކެއް ކުރެވެމުންދާ ކަމަށް އެމަނިކުފާނު ފާހަގަކުރެއްވިއެވެ.