ކުދި އަދި މެދުފަންތީގެ ވިޔަފާރިތަކަށް ޚާއްޞަކޮށްގެން ކަނޑުއުޅަނދުފަހަރާއި ގުޅުންހުރި ބޭނުންތަކަށް މާލީ އެހީތެރިކަން ފޯރުކޮށްދިނުމަށް އެސްއެމްއީ ޑިޖިޓަލްއިން "ވެސަލް ފައިނޭންސިންގ" ގެ ނަމުގައި އައު ފައިނޭންސިންގ ޕްރޮޑަކްޓެއް ތަޢާރަފްކޮށްފިއެވެ. މި ފައިނޭންސިންގ މެދުވެރިކޮށް 5،000،000 ރުފިޔާއާ ހަމައަށް މާލީ އެހީތެރިކަން ލިބޭނެ އިންތިޒާމު ވަނީ ހަމަޖައްސާފައެވެ.
އެސްއެމްއީ ޑިޖިޓަލްއިން ވިދާޅުވި ގޮތުގައި، ވިޔަފާރިތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށް މަގުފަހިކޮށްދިނުމަށްޓަކައި މި ފައިނޭންސިންގ އަނބުރާ ދެއްކުމަށް 10 އަހަރާ ހަމައަށް މުއްދަތު ދިނުމަށް ވަނީ ހަމަޖެހިފައެވެ. މީގެ އިތުރުން، މި މުއްދަތުގެ ތެރޭގައި 18 މަސްދުވަހާ ހަމައަށް ލިބޭ ގްރޭސް ޕީރިއަޑެއް ހިމެނޭތީ، މިއީ ވިޔަފާރިތަކަށް ލިބިގެންދާނެ ބޮޑު ލުޔެކެވެ.
މި އައު ފައިނޭންސިންގ ފަރުމާކޮށްފައިވަނީ ކަނޑުއުޅަނދުފަހަރާއި ގުޅުންހުރި ވިޔަފާރިތައް އަލަށް ފަށަން ބޭނުންވާ ފަރާތްތަކަށާއި މިހާރު ހިންގަމުންދާ ވިޔަފާރިތައް ފުޅާކުރުމަށް ބޭނުންވާ ފަރާތްތަކަށެވެ. އެގޮތުން އުޅަނދުފަހަރު ބަނުމަށް، ގަތުމަށް، އިންޖީނު އެޅުމަށް އަދި މަރާމާތުގެ މަސައްކަތްތަކަށް ބޭނުންވާ މާލީ އެހީތެރިކަން މި ސްކީމުގެ ދަށުން ލިބޭނެއެވެ. މީގެ ތެރޭގައި މަސްވެރިކަމާއި، ޓޫރިޒަމް، މުދާ އުފުލުން އަދި ލޮޖިސްޓިކްސް ފަދަ ދާއިރާތައް ހިމެނެއެވެ.
އެސްއެމްއީ ޑިޖިޓަލްގެ ސީއީއޯ ބަދުރުއްދީން ހަސަން ވިދާޅުވީ، "މި ފައިނޭންސިންއަކީ ރާއްޖޭގެ އިޤްތިސާދުގައި މުހިންމު ދައުރެއް އަދާކުރާ ކަނޑު އުޅަނދުފަހަރާއި ގުޅުންހުރި ސިނާޢަތްތައް ކުރިއެރުވުމަށް ހުޅުވާދެވުނު މުހިންމު މަގެއް" ކަމަށެވެ. އަދި އެ ބޭންކުގެ އަމާޒަކީ ޤައުމުގެ އިގްތިސާދު ހަރުދަނާ ކުރުމުގައި ކުދި އަދި މެދު ފަންތީގެ ވިޔަފާރިތަކަށް ކުރިމަތިވާ ގޮންޖެހުންތަކަށް ދާއިމީ ޙައްލެއް ހޯދައިދިނުން ކަމަށްވެސް އޭނާ ވިދާޅުވިއެވެ.
މި ފައިނޭންސިންއަށް އެދި ހުށަހެޅުމުގެ ފުރުސަތު މިހާރު ވަނީ އެސްއެމްއީ ޑިޖިޓަލްގެ ވެބްސައިޓުގައި ހިމެނޭ އެސްއެމްއީ ޕޯޓަލް މެދުވެރިކޮށް ހުޅުވާލާފައެވެ. މިއީ ރާއްޖޭގެ ކަނޑު ދަތުރުފަތުރާއި މަސްވެރިކަމުގެ ސިނާޢަތުގައި ހަރަކާތްތެރިވާ ވިޔަފާރިތަކަށް ލިބިގެންދާނެ ރަނގަޅު ފުރުސަތެކެވެ.