ބ. ތުޅާދޫއާއި ރ. މީދޫ ރައްޔިތުންގެ މެދުގައި އޮތް ގާތް ގުޅުން ފެށުމުގެ މައިގަނޑު އަސްލަކީ މާތްވެގެންވާ އިސްލާމްދީން ކަމަށް ދިވެހި ބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހިމް ވިދާޅުވެއްޖެއެވެ. ވަޒީރު މިހެން ވިދާޅުވީ، ދިވެހިންގެ އެއްބައިވަންތަކަމުގެ ދުވަސް ފާހަގަކުރުމަށް މި ދެ ރަށުގެ ރައްޔިތުން ގުޅިގެން ބޭއްވި އެއްބައިވަންތަކަމުގެ އަތުގުޅާލުމުގެ ހަރަކާތުގައި ވާހަކަފުޅު ދައްކަވަމުންނެވެ.
ދިވެހިންގެ އެއްބައިވަންތަކަމުގެ ދުވަހުގެ ގޮތުގައި ސުނާމީ ކާރިސާ ކުރިމަތިވި ދުވަސް ފާހަގަކުރަނީ، އެ ދުވަހު ދިވެހިން ދެއްކި ނަމޫނާ އެހީތެރިކަމާއި މަދަދުވެރިކަން ފާހަގަކުރުމަށް ކަމަށް ވަޒީރު ވިދާޅުވިއެވެ. އަދި ތުޅާދޫއާއި މީދޫގެ ރައްޔިތުންގެ މެދުގައި އޮތް އާދަޔާ ޚިލާފު މަތިވެރި ގުޅުމަކީ އަބަދުވެސް ހަނދާނަށް ގެންނަންޖެހޭ ކަމެއްކަން ވަޒީރު ފާހަގަކުރެއްވިއެވެ.
ދިވެހިންނަކީ ޚާއްސަ ސަޤާފަތެއް ލިބިފައިވާ ބައެއްކަން ފާހަގަކުރައްވައި ވަޒީރު ވިދާޅުވީ، ދިވެހިންގެ ދިވެހިވަންތަ ސަޤާފަތުގެ މަގަކީ އިސްލާމްދީން ކަމަށެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ފަދައިން، ދިވެހި ޤައުމިއްޔަތުގެ މައި ތަނބަކީ އިސްލާމްދީން ކަމަށާއި، ތުޅާދޫއާއި މީދޫގެ ގުޅުންވެސް ބިނާވެފައިވަނީ މި އަސާސުގެ މައްޗަށް ކަމަށް ވަޒީރު ވިދާޅުވިއެވެ.
އިސްލާމީ އަހްވަންތަކަން ތަރައްޤީވެގެން ދިޔަ ގޮތުގެ މައްޗަށް އަލިއަޅުއްވާލައްވަމުން ވަޒީރު ވިދާޅުވީ، ތުޅާދޫ ރައްޔިތުން މީދޫ މިސްކިތް ބިނާކުރުމަށް ކުރި މަސައްކަތަކީ މި ގުޅުމުގެ ވަރުގަދަ ރަމްޒެއް ކަމަށެވެ. މިސްކިތުގެ ތަނބުތަކުގައި ހުރި ހަރުދަނާކަން މިއަދުވެސް އެ ދެ ރަށުގެ ރައްޔިތުންގެ ގުޅުމުން ފެންނަން ހުރި ކަމަށް ވަޒީރު ވިދާޅުވިއެވެ.
“އެ ދެފަރާތުންވެސް މި އަގުކުރީ، މާނަކުރީ ވަރަށް މަތިވެރި ހަދިޔާއެއްގެ ގޮތުގައި. ވަރަށް މަތިވެރި ފެށުމެއްގެ ގޮތުގައި. އެއީ އިސްލާމްދީނުގައި އެންމެ މަތިވެރި ބިނާ. ﷲގެ ގެކޮޅު ބިނާކުރުމުގައި ރައްޔިތުން ތިބޭފުޅުންނަށް މީދޫގެ ރައްޔިތުންނަށް ދެއްކި ރީތި ނަމޫނާ،” ވަޒީރު ވިދާޅުވިއެވެ.
ރައީސުލްޖުމްހޫރިއްޔާގެ ޤައުމިއްޔަތު އިއާދަކުރުމުގެ ސިޔާސަތުގެ ދަށުން، އުމުރުން ދުވަސްވީ މީހުންގެ ހަނދާންތައް އެއްކުރުމުގެ ޤައުމީ މަޝްރޫއެއް ފަށައިގެން ކައުންސިލްތަކާ ގުޅިގެން ކުރިއަށްދާކަން ވަޒީރު ހާމަކުރެއްވިއެވެ. މި މަސައްކަތުގެ ބޭނުމަކީ ދިވެހިންގެ މެދުގައި އޮތް އަހްވަންތަކަން އަލުން ދިރުވައި އާލާކުރުން ކަމަށް ވަޒީރު ވިދާޅުވިއެވެ.
ވަޒީރުގެ ވާހަކަފުޅު ނިންމަވާލެއްވީ ދިވެހިންނަކީ އެއް ދީނަކަށް ތަބާވާ، އެއް ބަހަކުން ވާހަކަދައްކާ، އެއް ސަޤާފަތަކާއި ތާރީޚެއް ހިއްސާކުރާ އެއްބައެއްކަން ހަނދާންކޮށްދެއްވަމުންނެވެ.