ރާއްޖޭގެ ފަތުރުވެރިކަމުގެ ޕީކް ސީޒަން ނިމޭއިރު، ރ. މާފަރު އިންޓަނޭޝަނަލް އެއަރޕޯޓަށް ޖައްސާ ޖެޓުތަކުގެ އަދަދު 800 އަށް އަރާނެކަމަށް ލަފާކޮށްފިއެވެ. މިހާރު ފެށިފައިވާ ޕީކް ސީޒަންގައި މިހާރުވެސް 200އަށްވުރެ ގިނަ ޖެޓު ވަނީ މާފަރު އެއަރޕޯޓަށް ޖައްސާފައެވެ.
މާފަރު އެއާޕޯޓު ބޭނުންކުރަން ފެށީއްސުރެ ކޮންމެ އަހަރެއްގެ ޕީކް ސީޒަނާ ދިމާކޮށް އެ އެއާޕޯޓަށް ގިނަ އަދަދެއްގެ ޖެޓު ޖައްސައެވެ. ޚާއްސަކޮށް، މި އަހަރު އެއާޕޯޓުގައި މަތިންދާބޯޓުތަކަށް އޮންނަ ޕާކިން އޭރިއާ ދެގުނައަށް ބޮޑުކޮށްފައިވުމާއެކު، ޖައްސާ ޖެޓުތައް އެހެން އަހަރުތަކަށް ވުރެ ވަނީ އިތުރުވެފައެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން މާފަރު އިންޓަނޭޝަނަލް އެއަރޕޯޓުގެ ޖެނެރަލް މެނޭޖަރ މުމްތާޒް އަލީ ވިދާޅުވީ، މި މަހުގެ 20 ވަނަ ދުވަހުން ފެށިގެން ޖެޓުތައް ޖައްސަމުން އަންނަ ކަމަށާއި، މިވަގުތު ވެސް 15 ވަރަކަށް ޖެޓް އެއާޕޯޓުގައި ޕާކުކޮށްފައި އެބައޮތް ކަމަށެވެ. މުމްތާޒް ވިދާޅުވީ، އަންނަ އާދިއްތަ ނުވަތަ ހޯމަ ދުވަހުން ފެށިގެން މާފަރު އެއާޕޯޓަށް ޖައްސާ ޖެޓުތަކުގެ އަދަދު 25 އަށް ވުރެ އިތުރުވާނެ ކަމަށެވެ. ކުރިން އެއްފަހަރާ 13 ފްލައިޓް ޕާކުކޮށްފައި އޮތްނަމަވެސް، މިހާރު އެ އަދަދު އިތުރުވެ އެއްފަހަރާ 30 ވަރަކަށް ފްލައިޓަށް ޚިދުމަތް ދެވޭނެ ކަމަށް އޭނާ ފާހަގަކުރެއްވިއެވެ.
މާފަރު އެއާޕޯޓުގެ ޕާކިން އޭރިއާ ބޮޑުކުރުމާއެކު، ރ. އަތޮޅާއި ބ. އަތޮޅުގެ އެންމެ ލަގްޒަރީ ރިސޯޓުތަކަށް ޖެޓުތަކުގައި އަންނަ މަހުޖަނުން ވެސް ވެލާނާ އިންޓަނޭޝަނަލް އެއާޕޯޓުގެ ބަދަލުގައި މާފަރު އެއާޕޯޓަށް ޖައްސަމުންދެއެވެ. މިދިޔަ އަހަރު މާފަރު އެއާޕޯޓަށް ޖެއްސީ 579 ޕްރައިވެޓް ޖެޓެވެ. އަދި މި އަހަރު އެ އަދަދު އިތުރުވަނީ އޭޕްރަންގެ ޖާގަ ބޮޑުކޮށް، ޖެޓުތަކަށް ޕާކު ކުރެވޭނެ ޖާގަ އިތުރު ކުރުމުން ކަމަށް މުމްތާޒް ވިދާޅުވިއެވެ.
އާ އަހަރާ ދިމާކޮށް ރާއްޖެއަށް ޗުއްޓީ ހޭދަކުރަން އަންނަ މަހުޖަނުން އިތުރުވާއިރު، ގިނަ އަދަދެއްގެ ޖެޓުތައް ކޮންމެ އަހަރަކުވެސް ރާއްޖެ އާދެއެވެ. މިވަގުތު ވެލާނާ އިންޓަނޭޝަނަލް އެއާޕޯޓުގައި ވެސް ގިނަ އަދަދެއްގެ ޖެޓުތައް ވަނީ ޕާކުކޮށްފައެވެ.
މާފަރު އެއާޕޯޓު ހުޅުވީ 2019 ވަނަ އަހަރުއެވެ. އެ އެއާޕޯޓު ހުޅުވި ފަހުން އެކި މަރުހަލާތަކުގެ މަތިން، އެއާޕޯޓު ބޮޑުކޮށްފައިވެއެވެ. އެގޮތުން މާފަރު އިންޓަރނޭޝަނަލް އެއަރޕޯޓުގެ އޭޕްރަންއަށް އިތުރުކުރި ސަރަޙައްދު ތަރައްޤީކޮށް ދާދިފަހުން ވަނީ ހުޅުވާފައެވެ.
އަބޫދާބީ ފަންޑް ފޯ ޑިވެލޮޕްމެންޓްއިން 60 މިލިއަން ޑޮލަރު ހަރަދުކޮށްގެން ހެދި މާފަރު އިންޓަނޭޝަނަލް އެއާޕޯޓަށް ހިންގަނީ ސަރުކާރުގެ އެއާލައިން ހިންގާ ކުންފުނި އައިލެންޑް އޭވިއޭޝަނުންނެވެ. މިއީ އޭ320 އާއި ބޮއިން 737 މަރުކާގެ ބޯޓު ފަހަރަށް ވެސް ޖެއްސޭ ފެންވަރުގެ އެއާޕޯޓެކެވެ. މާފަރު އިންޓަރނޭޝަނަލް އެއަރޕޯޓަކީ، ރާއްޖޭގައި ދެވަނައަށް އެންމެ ގިނައިން ބައިނަލްއަޤުވާމީ އެއަރލައިންތަކަށް ޚިދުމަތްދެމުންދާ އެއަރޕޯޓުވެސް މެއެވެ.