ވ. އަތޮޅުގެ ރިސޯޓެއްގައި މަސައްކަތްކުރާ ދިވެހި އަންހެނަކު ވިހެއުމަށްފަހު، ތުއްތު ކުއްޖާ ޑަސްބިނަށް ލާފައި އޮއްވާ ފެނިއްޖެއެވެ. ފުލުހުން މައުލޫމާތު ދޭ ގޮތުގައި މި ހާދިސާ ހިނގާފައިވަނީ ވ. އަތޮޅު ރިސޯޓެއްގައި ވަޒީފާ އަދާކުރަމުންދާ 27 އަހަރުގެ ދިވެހި އަންހެނަކަށެވެ.
ފުލުހުން ބުނީ، އަންހެން މީހާ ބަލިވެއިނދެ ބައިގެންގޮސް ކުއްޖާ ނިޔާވެފައިވާ މައްސަލައެއް މިއަދު ހެނދުނު 10:06 އެހާކަންހާއިރު ރިޕޯޓްކޮށްފައިވާ ކަމަށެވެ. “ވ. އަތޮޅު ރިސޯޓެއްގައި 27 އަހަރުގެ ދިވެހި އަންހެނަކު ބަލިވެއިނދެ ބައިގެންގޮސް ކުއްޖާ ނިޔާވެފައިވާ މައްސަލައެއް 26 ޑިސެމްބަރު 2025 ވަނަ ދުވަހު ހެދުނު 10:06 އެހާކަންހާއިރު ފުލުހުންނަށް ރިޕޯޓްކޮށްފައިވޭ،” ފުލުހުން މީޑިއާތަކަށް ފޮނުވި މެސެޖުގައި ބުނެފައިވެއެވެ.
މައުލޫމާތު ލިބިފައިވާ ގޮތުގައި މި ހާދިސާ ހިނގާފައިވަނީ ވ. ސިނަމަން ވިލުފުށީ ރިސޯޓުގައެވެ. ކައިވެންޏެއް ނުކޮށް ހުރި އެ އަންހެން މީހާ ކުއްޖާ ވިހާފައިވަނީ ސްޓާފް އެކޮމޮޑޭޝަންގައެވެ. އަދި ނިޔާވެފައިވާ ތުއްތު ކުއްޖާ ފެނިފައިވަނީ އެކޮމޮޑޭޝަން ބްލޮކެއްގެ ތެރޭގައި ހުރި ޑަސްބިނަކަށް ލާފައި އޮއްވައެވެ.
މި ކުއްޖާ ފެނުނީ އެ ސަރަހައްދުން ކުނިވަސް ދުވާތީ އެކޮމޮޑޭޝަން ބްލޮކް ބަލަމުން ދަނިކޮށް ކަމަށް މައުލޫމާތު ލިބެއެވެ. ޑަސްބިނުން ފެނުނު މި ކުއްޖާގެ ބަރުދަނުގައި ގާތްގަނޑަކަށް ދެ ކިލޯ ހުރި ކަމަށްވެސް މައުލޫމާތު ލިބިފައިވެއެވެ.
ފުލުހުން މިހާރު ދަނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި އިތުރަށް ތަހުގީގު ކުރަމުންނެވެ. ނަމަވެސް މިހާތަނަށް މި މައްސަލައާ ގުޅިގެން އެއްވެސް މީހަކު ހައްޔަރުކުރި ކަމެއް ފުލުހުން ހާމަކޮށްފައެއް ނުވެއެވެ.