ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ތެރެއިން މިހާތަނަށް 399 ފަރާތަކަށް ތަޅުދަނޑި ހަވާލުކޮށްފައިވާ ކަމަށް ޢިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ. މި ފްލެޓްތަކުގެ ތަޅުދަނޑި ހަވާލުކުރުމުގެ މަސައްކަތް ފަހި ދިރިއުޅުން ކޯޕަރޭޝަން (އެފްޑީސީ) އިން ފަށާފައިވަނީ މިދިޔަ ސެޕްޓެމްބަރު މަހުގެ 28 ވަނަ ދުވަހުއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަޒީރު ވިދާޅުވީ، މިހާތަނަށް 3,879 ފަރާތަކާއެކު ފްލެޓް އެއްބަސްވުން ގާއިމްކުރެވިފައިވާ ކަމަށެވެ. އަދި އެއްބަސްވުން ހެދިފައިވާ ހުރިހާ ފަރާތްތަކަކަށް އަންނަ ޖަނަވަރީ މަހުގެ ނިޔަލަށް ތަޅުދަނޑި ހަވާލުކޮށް ނިންމުމަށް ސަރުކާރުން އަމާޒު ހިފާފައިވާ ކަމަށްވެސް ވަޒީރު ފާހަގަކުރެއްވިއެވެ.
ފްލެޓްތައް ހަވާލުކުރުން ލަސްވި ސަބަބާ ގުޅޭގޮތުން ވަޒީރު ވިދާޅުވީ، ކުރީގެ އެއްބަސްވުންތަކުގައި ފެނާއި ކަރަންޓުގެ މަސައްކަތްތައް ހިމެނިފައި ނެތުމުން އެކަންކަން ފުރިހަމަކުރުމަށް ވަގުތު ނެގީ ކަމަށެވެ. "މި ސަރުކާރު ހަވާލުވީއިރު މަސައްކަތް ނިމިފައިވަނީ %33، ނަމަވެސް ދެ އަހަރެއްހާ ދުވަހުގެ ތެރޭގައި %68 މަސައްކަތް ނިންމާ، ފެނާ ކަރަންޓު ގުޅުމުގެ މަސައްކަތާއި ލޭންޑްސްކޭޕިންގ ނިންމާ މިހާރު ފްލެޓްތައް މިދަނީ ހަވާލުކުރަމުން" ވަޒީރު ވިދާޅުވިއެވެ.
ފްލެޓްތަކުގެ އަގުތަކަށް ގެނެވުނު ބަދަލުތަކުގެ ތަފްސީލުތައް ތިރީގައި އެވަނީއެވެ:
- 3 ކޮޓަރީގެ އެޕާޓްމަންޓް: ޑައުންޕޭމަންޓް 8,500 ރުފިޔާ އަދި މަހު ކުލި 10,000 ރުފިޔާ.
- 2 ކޮޓަރީގެ އެޕާޓްމަންޓް: ޑައުންޕޭމަންޓް 6,000 ރުފިޔާ އަދި މަހު ކުލި 7,000 ރުފިޔާ.
މީގެ އިތުރުން، ކުރިން ބޮޑު އަގުގައި ޑައުންޕޭމަންޓް ދައްކާފައިވާ ފަރާތްތަކަށް، އައު އަގަށްވުރެ އިތުރަށް ދެއްކި ފައިސާ މަހު ކުލިން އުނިކޮށްދިނުމަށް ވަނީ ނިންމާފައެވެ. އަދި ގަވާއިދުން ކުލި ދައްކާ ފަރާތްތަކަށް ސަރުކާރުން ބޮޑު ސަބްސިޑީއެއް ދިނުމަށް ހަމަޖެހިފައިވާއިރު، ފްލެޓްތައް ހަވާލުކުރަނީ ފިނިޝިންގެ ހުރިހާ މަސައްކަތެއް ނިންމުމަށްފަހުގައެވެ.
ސަރުކާރުގެ ނިންމުމާ އެއްގޮތަށް، ތަޅުދަނޑި ހަވާލުކުރާ ތާރީޚުން ފެށިގެން ފުރަތަމަ ތިން މަސް ދުވަހު ކުލި ދައްކާކަށް ނުޖެހޭނެއެވެ. ނަމަވެސް މި މުއްދަތުގެ ތެރޭގައި ފްލެޓްގެ މެއިންޓެނަންސް ފީ ދައްކަން ޖެހޭނެ ކަމަށް ގެދޮރުވެރިކަމާ ބެހޭ ވުޒާރާއިން މައުލޫމާތު ދެއެވެ.