ސްރީލަންކާސް ގޮޓް ޓެލެންޓުގެ ތިން ވަނަ ސީޒަންގައި ދިވެހި ކުޑަ އަންހެން ކުއްޖަކު ހުށަހަޅައިދިން ފުރިހަމަ ލަވައާއެކު ފަނޑިޔާރުންގެ ބޮޑު ޝައުގުވެރިކަމެއް ހޯދައިފިއެވެ. ލަންކާގެ ސިރާސާ ޗެނަލުން ބްރޯޑްކާސްޓު ކުރަމުން އަންނަ މި މުބާރާތުގައި ފަނޑިޔާރުންގެ ހިތް އަތުލާފައިވަނީ އުމުރުން 10 އަހަރުގެ މަރިޔަމް ރުބީން މުއާޒް އެވެ.
ސްރީލަންކާސް ގޮޓް ޓެލެންޓަކީ ދުނިޔޭގެ މަގުބޫލުކަން ހޯދާފައިވާ ސައިމަން ކޮވެލްގެ “ގޮޓް ޓެލެންޓު” ފްރެންޗައިޒްގެ ދަށުން ކުރިއަށްގެންދާ މުބާރާތެކެވެ. މި މުބާރާތުގައި ރުބީން ހުށަހަޅައިދިނީ ކެޓީ ޕެރީގެ މަޝްހޫރު ލަވަ “ރޯރް” އެވެ. ރުބީންގެ މި ހުށަހެޅުމުގެ ވީޑިއޯ ރޭގެ ވަގުތެއްގައި ސްރީލަންކާސް ގޮޓް ޓެލެންޓުގެ ޔޫޓިއުބް ޗެނަލްގައި ވަނީ އާންމުކޮށްފައެވެ.
ރުބީންގެ ހުށަހެޅުމަށް ފަހު ފަނޑިޔާރުންގެ ފަރާތުން ވަނީ ބޮޑު ތަރުހީބެއް ލިބިފައެވެ. އެގޮތުން ފަނޑިޔާރު ދަނޫ އިންނަސިތަމްބީ ބުނީ ރުބީންގެ ހުށަހެޅުމާ މެދު ވަރަށް ބޮޑަށް ހިތްހަމަޖެހޭ ކަމަށެވެ. އަދި ފަނޑިޔާރު ސްޓެފަނީ ސިރިވާޑެނާ ބުނީ “ރުބީންއަށް ލިބިފައި ވަނީ ވަރަށް މާނަފުން ރީތި އަޑެއް” ކަމަށާއި، އޭނާގެ ލަވަކިޔުން ވަރަށް ކަމުދާ ކަމަށެވެ. މި ކާމިޔާބީއާއެކު ރުބީން މިހާރު ވަނީ މުބާރާތުގެ ދެވަނަ ބުރަށް ދަތުރުކޮށްފައެވެ.
ރުބީންގެ މަންމަ ހަމްނާ ބުނި ގޮތުގައި، މި މުބާރާތުގައި ބައިވެރިވުމުގެ ފުރުސަތު ލިބުނީ ލަންކާ ހައިކޮމިޝަން މެދުވެރިކޮށެވެ. ރުބީންއަކީ މިއުޒިކީ އާއިލާއަކަށް ނިސްބަތްވާ ކުއްޖެކެވެ. އެގޮތުން އޭނާގެ ބައްޕަ ހުސައިން މުއާޒަކީ ލަވަކިޔުންތެރިއެއްގެ އިތުރުން، ބޮޑުދައިތަ އައިޝަތު އިނާޔާއަކީ ވެސް މިއުޒިކީ ދާއިރާގައި ފާހަގަކޮށްލެވޭ ފަންނާނެކެވެ. ރުބީން މީގެ ކުރިން ވެސް ވަނީ ސްކޫލް ކުދިންގެ ލަވަ މުބާރާތާއި “އެ ހަނދާނުގައި” ޝޯވ ފަދަ ޕްރޮގްރާމްތަކުގައި ލަވަ ހުށަހަޅައިދީފައެވެ.
ބައިނަލްއަގުވާމީ މިފަދަ ބޮޑު މުބާރާތެއްގައި ރުބީން ދެއްކި ހުނަރާ މެދު އާއިލާއިން ފަޚުރުވެރިވެއެވެ. “ފަނޑިޔާރުންގެ ކޮމެންޓް އެހާ ރަނގަޅުވީމައި، އެހާ ކޮންފިޑެންސާ އެކީގައި ލަވަ ކިޔާލީމަ، ވަރަށް ޕްރައުޑް ވޭ އަސްލު ހަމަ،” ހަމްނާ ބުންޏެވެ. ރުބީންގެ ލަވަކިޔުމުގެ ހުނަރު އިތުރަށް ތަރައްގީ ކުރުމަށްޓަކައި މިހާރު ލަންކާގައި ވޯކަލް ކްލާސްތަކަށް ވެސް ގެންދާ ކަމަށް އާއިލާއިން ބުނެއެވެ.
މުބާރާތުގެ ދެވަނަ ބުރުގައި ރުބީން ހޯދާނެ ކާމިޔާބީއަކަށް އާއިލާގެ އިތުރުން ގިނަ އަދަދެއްގެ ދިވެހިން ވެސް އަންނަނީ އިންތިޒާރު ކުރަމުންނެވެ. މިއީ ބައިނަލްއަގުވާމީ މައިދާނެއްގައި ދިވެހި ކުޑަ ކުއްޖަކު ފާހަގަކޮށްލެވޭ ފަދަ ހުނަރެއް ދައްކަމުންދާ މިފަދަ ފުރަތަމަ ފަހަރެވެ.