ކ. ހުރާގެ ސިއްޙީ މަރުކަޒުގެ އައު އިމާރާތް ބިނާކުރުމުގެ ޢަމަލީ މަސައްކަތް ރަސްމީކޮށް ފަށައިފިއެވެ. މި މަސައްކަތް ފައްޓަވައިދެއްވީ ސިއްޙީ ވަޒީރު ޢަބްދުﷲ ނާޘިމް އިބްރާހީމްއެވެ.
މި މަޝްރޫޢުގެ ދަށުން ހުރާގައި ތަރައްޤީކުރަނީ 15,650 އަކަފޫޓުގެ ސަރަހައްދެއްގައި ބިނާކުރާ 2 ފަންގިފިލާގެ އިމާރާތެކެވެ. މި އިމާރާތަކީ 16 އެނދުގެ ޖާގައާއެކު ތަރައްޤީ ކުރާ ތަނެކެވެ. މަސައްކަތުގެ ކޮންޓްރެކްޓަރ އެމްޓީސީސީން މަޢުލޫމާތު ދެއްވާގޮތުގައި، މި އިމާރާތުގެ ކޮންމެ ފަންގިފިލާއެއްގައި 7,825 އަކަފޫޓު ހުންނާނެއެވެ.
އެމްޓީސީސީއާ މި މަސައްކަތް ހަވާލުކޮށްފައިވަނީ 27.23 މިލިޔަން ރުފިޔާއަށް، 360 ދުވަހުގެ ތެރޭގައި ނިންމާގޮތަށެވެ. މި މަޝްރޫޢުގެ ދަށުން ބިންގަނޑު އެއްވަރުކުރުމާއި، ކޮންކްރީޓް މަސައްކަތް، މޭސަނަރީ މަސައްކަތް އަދި ޓައިލްސް ޖެހުމުގެ މަސައްކަތް ހިމެނޭހެން އިމާރާތް ފުރިހަމަކުރުމަށް ބޭނުންވާ ހުރިހާ މަސައްކަތެއް އެ ކުންފުނިން ކުރާނެއެވެ.
މަސައްކަތް ފެށުމުގެ ރަސްމިއްޔާތުގައި ހުރާ ދާއިރާގެ މަޖިލިސް މެންބަރު އަނާރާ ނަޢީމާއި، އެމްޓީސީސީގެ ޑެޕިޔުޓީ މެނޭޖިން ޑިރެކްޓަރ މުޙައްމަދު ޖަމްޝީދު އަދި ހުރާ ކައުންސިލްގެ މެންބަރުންނާއި ސަރުކާރުގެ އިދާރާތަކުގެ އިސްވެރިން ބައިވެރިވެވަޑައިގެންނެވިއެވެ.
1,380 މީހުންގެ އާބާދީއެއް އޮންނަ ހުރާގައި މި އައު އިމާރާތް ނިމުމުން، ރަށުން ލިބޭ ސިއްޙީ ފަރުވާ ފުޅާވެ، ރައްޔިތުންނަށް އަމިއްލަ ރަށުގައި ތިބެގެން ބޭނުންވާ އަސާސީ ސިއްޙީ ޚިދުމަތްތައް ހޯދުމަށް ބޮޑެތި ފަސޭހަތަކެއް ލިބިގެންދާނެއެވެ.
ސަރުކާރުގެ އަމާޒަކީ ރަށްރަށުގެ ސިއްޙީ މަރުކަޒުތަކުގެ ޖާގަ އިތުރުކޮށް، ޚިދުމަތުގެ ފެންވަރު މަތިކުރުމެވެ. މިގޮތުން ގިނަ ރަށްތަކެއްގައި އައު އިމާރާތްތައް ބިނާކުރުމުގެ މަސައްކަތް އެކި ކުންފުނިތަކާ ހަވާލުކޮށްގެން މިހާރުވެސް ކުރިއަށްދާކަން ފާހަގަކުރެވެއެވެ.